Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Prefektët e Ramës, gjethe fiku mbi kanabisin dhe Tahirin

Politiko 1 Nëntor 2017, 20:18

Prefektët e Ramës, gjethe fiku mbi kanabisin dhe Tahirin

Gentian Gaba

Apostujt, nga greqishtja e lashtë “të dërguar”, në fenë e krishterë identifikohen me dymbëdhjetë nxënësit e Jezu Krishtit të cilëve iu dha detyra të përhapnin "Lajmin e mirë" në një botë pagane. Dymbëdhjetë të dërguar në dymbëdhjetë fiset hebraike të Izraelit.

Dymbëdhjetë prefektë për dymbëdhjetë qarqet e Shqipërisë, zëvëndësuan sot dymbëdhjetë prefektët e epokës “para Tahirit”. Dymbëdhjetë të dërguar për të përhapur “fjalën e mirë” të Ramës në epokën “pas Tahirit”: Të vijojmë të bëjmë shtet!

Një tjetër rokadë që kërkon të na rrëfejë një Ramë të furishëm; një shtetar të prekur nga dekadenca që po pësojnë institucionet. Një burrë shteti, që për të bërë shtetin që shqiptarët duan, mbjell erë dhe korr furtunë në administratën publike.

Prefektët e shkuar nuk mund t’i gjykojmë, pasi ashtu siç sot ikën, ashtu kishin ardhur...në anonimat. Sakaq, prefektët e rinj godasin për kalibrin (jo atë të armëve që kanë zotëruar si ushtarakë), për përvojën e gjatë në institucione të ndryshme dhe për moshë mesatare, mjaft mbi normat e preferencave ramiane.

Në një vështrim të parë duken njerëzit e duhur për punën e gabuar.

Të dërguarit në dymbëdhjetë qarqe tregojnë edhe një herë më shumë, se aftësia e Ramës për spektakël vijon të jetë më e madhe sesa aftësia për të bërë shtet.

Duke vendosur në krye të institucioneve të dobta, ndoshta të pa dobishme dhe anakronike, siç janë prefekturat, profile kaq të larta; dhe njëkohësisht duke emëruar në krye të ministrive, dhe superministrive, që janë përcaktueset e drejtimit të politikës së përgjithshme të Shtetit, persona pa përvojën dhe zotësitë e duhura, ilustron më së miri atë që nuk mund të quhet dëshirë për të reformuar rolin e prefektit (aty i kishte edhe gjatë katër viteve të mëparshme), por për të dhënë një tjetër spektakël në operacionin e gjatë të menaxhimit të krizës që lindi si pasojë e dosjes që erdhi nga Katania.

E do puna dhe zamani që gjatë menaxhimit të një krize të mos qëndrosh pasiv, në mbrojtje, por duhet të prodhosh, të sajosh, të orkestrosh dhe sulmosh.

Pra "fjala e mirë", po bëjmë shtet, është vetëm një tjetër gjethe fiku që po vendoset me ndihmën kësaj duzine mbi katër vitet e kanabizimit të shtetit, dhe sidomos mbi këto katërmbëdhjetë ditë emergjence.

Ndonëse njëmbëdhjetë burrat dhe zonja në krye të tyre, mund të jenë ndjerë protagonistë, duhet të kuptojnë se pas gjithë fotografive të gabuara, pas gjithë zërave të gabuar, pas gjithë zgjedhjeve të gabuara, Rama kishte nevojë të dilte parpara shqiptarëve me një grup që të shëmbëllente integritet, seriozitet dhe respekt.

Duhet të kuptojnë se rolin që kishin për të lozur në këtë shfaqje e kryen me prezantimin, pasi sot fillon dhe mbaron epoka që menduan se do të niste; edhe ata do shkojnë me heshtjen që shoqëroi paraardhësit e tyre. Një foto, një lajm, ose disa lajme, dhe përsëri te rutina, një ngjarje për të fshehur Ngjarjen me N të madhe.