Provokon revista ‘Time’, Trump dhe Putin transformohen në një portret të vetëm

Nga Liridon Cecja Revista javore ‘Time’, ka publikuar numrin e saj të ri, i cili pritet të ngjallë mjaft debate, pasi në ballinën ka vendosur fytyrën e Presidentit të SHBA-së, Donald Trump dhe homologut të tij rus, Vladimir Putin, të cilat shkrihen në njëra tjetrën. Përmes përdorimit të teknikave 3D, figura e Trump transformohet në imazhin e Putin brenda 15 sekondave, siç shihet në videon e mëposhtme. Si pikënisje e idesë së autorit Brian Bennett është samiti i fundit i Helsinkit, ku ishin të pranishëm edhe dy udhëheqësit, të cilët patën polemika për atë që autori e quan si 'tërheqje e mistershme e Trump për Putin'. “Imazhi i përzier, i artistit visual Nancy Burson ka si qëllim të përfaqësojë këtë moment të veçantë në politikën e jashtme të SHBA-së, pas takimit të fundit të dy palëve Helsinki të Finlandës”, shkruan revista ‘Time’. Publikimi i ballinës, disa ditë pas konferencës së Trump dhe Putin nuk ishte i rastësishëm, pasi gjatë kësaj periudhe kreu i Shtëpisë së Bardhë ka shfaqur dyshime mbi përfundimet e agjensicë së inteligjencës sa i takon ndërhyrhes së Rusisë në Zgjedhjet Presidenciale të 2016-ës. Megjithatë, pas kritikave nga republikanët dhe demokratët, Trump pranoi se kishte gabuar me qëndrimet e tij të deri tanishme dhe se pranonte konkluzionet e agjensive amerikane të inteligjencës sa i takon ndërhyrjes ruse. "Unë ndiej se veprimet e Rusisë nuk patën asnjë ndikim në rezultatin e zgjedhjeve; më lejoni të bëhem krejtësisht i qartë duke thënë se, dhe këtë e kam thënë shumë herë, e pranoj konkluzionin e agjensive të inteligjencës se pati ndërhyrje nga Rusia në zgjedhjet e vitit 2016", tha ai, duke shtuar: "Mund të ketë edhe njerëz të tjerë. Ka shumë njerëz atje ". Të mërkurën, në një intervistë tjetër për "CBS Evening News" Trump u pyet nëse ai bën homologun rus përgjgjegjës për ndërhyrjen dhe përgjigja ishte: "Po, e bëj, sepse ai është përgjegjës për vendin, ashtu si unë e konsideroj veten përgjegjës për gjërat që ndodhin në këtë vend”. "Sigurisht, si udhëheqësi i një vendi, ai duhet të mbajë përgjgegjësi", sqaroi Trump. Ndërkohë një sondazh i CBS News i publikuar të enjten zbuloi se amerikanët i konsiderojnë qëndrimet e Trump ndaj Putin si shumë miqësore, madje më të afërta se sa vitin e kaluar. Ballina e ‘Time’ i cilëson dy udhëheqësit botërorë jo vetëm si miqësorë ndaj njërit tjetrit por edhe si një portret i vetëm.

TIME’s new cover: Trump wanted a summit with Putin. He got way more than he bargained for https://t.co/sUu9gGKmmP pic.twitter.com/qq6iOjlis1

— TIME (@TIME) July 19, 2018