Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Pse e targetoi Amerika 'numrin 2' të Partisë Socialiste?

Politiko 31 Korrik 2019, 10:04

Pse e targetoi Amerika 'numrin 2' të Partisë

Red Varaku

Dje, u kalua gati në heshtje, një nga ngjarjet më të mëdha të ndodhura në Shqipëri vitet e fundit. Departamenti Amerikan i Shtetit shpalli non-grata ish-Kryetarin e Bashkisë së Durrësit, numrin dy të Partisë Socialiste, krahun e djathtë të kryeministrit Rama, z.Vangjush Dako, bashkë ne anëtarët e familjes së tij. Asnjëherë Departamenti Amerikan i Shtetit nuk kishte shenjuar kaq hapur një eksponent kaq të lartë politik.

Vendimi, i marrë nga Sekretari i Shtetit Mike Pompeo, thekson se kryetari i Bashkisë Dako dyshohet se është përfshirë në raste madhore korrupsioni dhe në bazë të ligjeve amerikane, kur Sekretari i Shtetit, ka informacione të besueshme se një zyrtar i huaj është përfshirë në raste madhore korrupsioni, ose shkelje të të drejtave të njeriut, atij dhe familjes së tij i ndalohet hyrja në Amerikë.

Qeveria amerikane thekson faktin se ka arsye të besojë se Dako është i përfshirë në korrupsion dhe në shkeljen e të drejtave të njeriut në atë shkallë, sa ata kanë aplikuar një ndëshkim ekzemplar, që i bëhet vetëm rasteve shumë të rënda të abuzimit me pushtetin.

Ky vendim vjen pas deklaratës së z. Palmer se krimet elektorale të dy dosjeve të famshme 339 dhe 184, të denoncuara vazhdimisht në media nga opozita, si dhe pas publikimit të përgjimeve nga gazeta gjermane BILD, duhen hetuar dhe gjykuar.

Ky vendim është fillimi i çlirimit të shqiptarëve nga korrupsioni. Ky vendim e kapi në befasi z. Rama dhe Partinë Socialiste, sepse ndryshe nga çfarë pretendonte z. Rama, i cili para 30 Qershorit nënkuptonte se drejtësia do të godiste z. Meta dhe z. Berisha, aksioni amerikan i pastrimit të politikës nga krimi dhe korrupsioni nisi nga vetë z. Rama, bash me bashkëpunëtorin e tij më të ngushtë.

Të gjithë e dimë se z. Dako është numri dy i Partisë Socialiste, dhe nëse ai hetohet dhe gjykohet me drejtësinë e re ‘amerikane,’ me siguri që do të dalin prova edhe për implikimin e z. Rama në krimin e shëmtuar elektoral të vitit 2017. Ndryshe nuk shpjegohet heshtja e varrit që ka mbuluar Partinë Socialiste pas këtij vendimi.

Në fakt, ky vendim më së shumti , është një goditje e fortë për mos reagimin e institucionit të akuzës në Shqipëri, që drejtohet nga PPP Arta Marku, si dhe një sinjal për mbrojtjen e heshtur dhe të koduar që po i jepet atij nga kryeministri dhe levat e tij në Prokurori.

Rasti i penalizimit të Vangjush Dakos nga vetë Sekretari Amerikan i Shtetit, Mike Pompeo dhe heshtja shembullore e kryeministrit dhe e amplifikatorëve të tij të propagandës Ulsiut , Spiropalit dhe Ballës për këtë vendim, është shembulli më i keq që PS po jep, sepse në një farë mënyre, me heshtjen e saj ajo po i dërgon një mesazh Prokurorisë dhe po mban anën e Dakos.

Kjo sepse ka dyshime të arsyeshme që z. Dako zotëron prova të forta që implikojnë z. Rama në krimin elektoral të vitit 2017, dhe si pasojë z. Rama i ka duart e lidhura në raport me z. Dako prandaj ka zgjedhur të mos hetojë dhe të heshtë. Sepse një arrestim i mundshëm i z. Dako, jo vetëm do të rrëzonte qeverinë, por do të çonte edhe në arrestimin e z. Rama.

Të gjithë e dinë ekzakt çfarë ka bërë Vangjush Dako. Tashmë ajo është e dokumentuar në një dosje zyrtare e cila fle në Prokurori dhe ka përgjime zyrtare që e vëtetojnë këtë, të cilat ne i kemi dëgjuar edhe të transkriptuara.

Ne kemi një gatishmëri politike të pazakontë nga ana e PS-së për ta mbrojtur Dakon me shokë. Kemi një Prokurori që nuk po e heton. Gjithashtu kemi edhe një opinion publik që intrigohet më shumë me teori konspiracioni me reforma që hanë politikanë, se sa kemi një vullnet për të bërë presion për hetimin e tij.

Heshtja e Prokurorisë dhe, akoma më keq, heshtja e Partisë Socialiste, e cila deri tani nuk ka bërë asnjë deklaratë politike, qoftë për t'u distancuar, është dëshmi se kemi të bëjmë me një drejtësi tërësisht të kapur.

Mosreagimi ndaj këtyre fakteve, mos nisja e një hetimi edhe pse ky hetim u kërkua nga vetë z. Palmer, tregon në fakt se kush në të vërtetë po e pengon reformën në drejtësi.

Heshtja e Partisë Socialiste dhe mos ngritja e zërit për të nxitur hetimin, nxjerr në pah hipokrizinë e madhe që ka kjo parti kur deklaron se e mbështet reformën në drejtësi dhe kur thotë se është gati të bëjë çdo sakrificë për të.