Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Qetësia e Lulzim Bashës

Politiko 1 Qershor 2018, 20:16

Gentian Gaba

Dikur, përpara lindjes së Facebook-ut dhe mediave online, e premtja ka qenë një ditë e veçantë për politikën. Në një farë mënyre përcaktonte një armëpushim dyditor midis palëve, të cilat, i ngrinin tensionet deri të hënën në mëngjes. Kjo traditë përshkruhet më së mirë nga shprehja “të bësh politikë do të thotë të mbijetosh deri të premten mbasdite”. Mirëpo, koha pa kohë në të cilën jetojmë, po dikton një ritëm të ri, gati fët-e-fët, në përleshjen politike. Duke tejkaluar neutralitetin politik të fundjavës, por edhe çdo orë të dhënë nga Zoti në këtë tokë . Një turravrap për të kapur vëmendjen e opinionit publik, duke komunikuar çdo hap, edhe më të panevojshmin, sikur turma të priste lajme nga politika, si një endacak që kërkon ujë në shkretëtirë.

Nën ritmin e këtij hiperkomunikimi vallzon mazhoranca e sotme, e cila, pas fushatës fituese, nxori në një tjetër ekspeditë elektorale, 365 ditëshe, gjithë ushtrinë e saj partiake, bashkiake, parlamentare dhe qeveritare.

Nesër, për shembull, politika lenkaçukase që nuk njeh shabat, do jetë në ndalesën llogaridhënëse të radhës.

Një zaptim i çdo kanali komunikativ, të ri e të vjetër, që synon informimin total nëpërmjet një propagande, në dukje fituese, por që mbart rrezikun që, herët apo vonë, të kthehet në një boomerang; pasi hendeku, midis Shqipërisë reale dhe shqipërisëqëduam.al, është i madh se diferenca në shtat midis Ramës dhe Ballës.

Përballë një mazhorance që komunikimin e ka armën më të fortë, opozita është dukur përherë në vështirësi. Megjithatë, ndjekja hap pas hapi, e veprimtarisë së një kundërshtari që vetëm komunikon, por nuk ekzekuton apo qeveris, duket se nuk është zgjedhja e duhur. Hiperkomunikimi i Ramës nuk mund të mposhtet po me të njëjtën armë nga Basha, dhe, mesa duket, lideri i opozitës e ka kuptuar këtë.

Një kundërveprim në të njëjtën oktavë të mazhorancës, e cila prodhon vetëm zhurmë, do të prodhonte akoma më shumë ndotje akustike, duke lënë pasivë qytetarët.

Stratagjemat e hershme të përballjes, pavarësisht mjeteve dhe kontekstit, sugjerojnë se në terrenin e kundërshtarit nuk fitohet, ai duhet sjellë në terrenin e zgjedhur nga sfiduesi.

Alternativa më e mirë, në këtë kontekst, është krijimi i një antimodeli, i një politikani dhe një opozite që komunikon atë që duhet, kur duhet dhe për hatër të asaj që i duhet vendit.

Një treguese i qartë i vetëdijes që ka krijuar kryeopozitari mbi natyrën e liderishipit të tij; duke mos synuar imitimin e kryeministrit aktual, por tejkalimin e tij në stil dhe përmbajtje.

Qetësia me të cilën Lulzim Basha po shfaqet këto javë, nuk ngjason aspak me histerinë komunikuese të Ramës. Flet pak lideri i PD-së, sidmos këto ditë të nxehta për politikën; komunikon vetëm atëherë kur duhet; cakton betejat sipas agjendës me të cilën kërkon destrukturimin e propagandës së mazhorancës, në pikat e shumta të dobëta që ajo ka.

Kundërshtarët e opozitës e trajtojnë këtë qetësi si dobësi, madje edhe kundërshtarët e Bashës në radhët e PD-së i bëjnë jehonë këtyre qëndrimeve.

Mirëpo, nëse do të ishte realisht në vështirësi, nuk do t’i shmangej publikut, por do të qëndronte gjithë ditën në syrin e kamerave dhe të transmetimeve "live" të Facebook-ut, për të kompensuar zbrazëtinë me zhurmë. Mirëmenaxhimi i daljeve, zgjedhja e mesazhit, i momentit, dhe i njerëzve që duhet ta përcjellin atë, tregon se kemi të bëjmë me një strategji të mirëfilltë, e cila, deri më tani, e ka coptuar moralisht mazhorancën dhe ministrat e saj.

Skandalet, të vjetrat, aktualet, dhe ato që shumë shpejt do të dominojnë debatin publik, i japin kreut të PD-së një avantazh që ai po përdor sipas një tempi me të cilin kërkon të diktojë agjendën e Kryeministrit; dhe të diktosh atë do të thotë të jesh në kontroll të debatit publik.

Sigurisht, nuk është një gjë e re për opozitën, Basha e ka fituar këtë përvojë gjatë drejtimit të debatit mbi dekriminalizimin, me të cilën ekspozoi, në sytë tanë dhe të ndërkombëtarëve, paktin e mazhorancës me krimin.

Sot, skenari është po ai i 2015, palët gjithashtu, kështuqë rezultati mund të vonojë, por do të vijë. Basha këtë e di, prandaj është kaq i qetë.

Nuk duhet të ngatërrojmë, megjithatë, një gjë thelbësore: ndryshe nga sa mund të jetë rasti i Ramës, për shefin e opozitës nuk është shtabi i komunikimit që ia jep këtë teh apo përparësi, por thjesht stili i tij, le të themi, kalvinist.