Flash News
Video/ Tensione në mbledhjen e Këshillit Bashkiak të Himarës, qytetari pështyn në fytyrë Vangjel Tavon
Olsi, ashtu si Edi, qenka burrë p….
Nën hetim për trafik k*kaine, SPAK sekuestron pasuritë e Princ Dobroshit dhe Olsi Syziut
Atentat në Memaliaj, qëllohet me breshëri arme avokati
Posta e mëngjesit/ Me 2 rreshta: Çfarë pati rëndësi dje në Shqipëri
Kryeministri i Maqedonisë së Veriut, Zoran Zaev i ka bërë ftesë opozitës së vendit të tij, për të bashkëqeverisur me synim për të çuar reformat përpara, në veçanti departizimin e administratës dhe pavarësimin e sistemit gjyqësor.
Por, ai shtoi më tej se për këtë gjë duhet të ketë me kë të bisedojë, pasi sipas tij, me liderin aktual të VMRO-DPMNE-së, Hristijan Mickoski nuk bisedohet.
“Ofrojmë bashkëpunim në çdo aspekt të mundshëm. Gjithçka që duhet të bëjmë, por patjetër që duhet të kesh dikë në anën tjetër për të folur. Po e them këtë për herë të parë, dua të hap një debat për qeveri të përbashkët, qeveri me opozitën. Por të ketë person me të cilin mund të bisedohet, me z. Mickovski nuk bisedohet. Ose, nëse ata kanë një person të arsyeshëm, e nëse ne nuk e kemi, le ta heqin Zaevin, vetëm që të dy palët të mund të flasin. Duhet ta bashkojmë popullin tonë, sepse për këtë kemi nevojë, ata e dinë këtë, dhe unë e di, njerëzit tanë janë shumë të përçarë”, tha Zaev në një intervistë për gazetën “Slloboden Peçat”.
Kreu i qeverisë maqedonase propozimin e krahason me qeverisjen në Gjermani, ku CDU dhe SPD kanë qenë në pushtet së bashku për 15 vjet. Ai gjithashtu thotë se në Zvicër, të gjithë janë në Qeveri, kështu që kush fiton është më i përfaqësuar ose është kryeministër. Në atë mënyrë, sipas Zaevit, bllokadat në Kuvend do të përfundojnë dhe gjithçka do të zgjidhet së pari në ekzekutiv.
“Unë u përpoqa në çdo mënyrë, thashë se mund të gjeja një zgjidhje me Gruevskin, por nuk mundem me Mickovskin. Nuk di çfarë të bëj tjetër! Ja tani po e hap edhe këtë, edhe pse kam mandat deri në vitin 2024, por edhe në rrethana të tilla hap mundësinë për të debatuar. Kur të duan ata, atëherë, nga nesër, pas zgjedhjeve lokale, kur të gjithë të jeni gati – atëherë”, tha Zaev.
VMRO-DPMNE-ja i është përgjigjur përmes deputetit Antonio Milloshoski, duke theksuar se me propozimin e bërë Zaev ka pranuar se “vendi ka nevojë për zgjedhje të parakohshme pasi kemi të bëjmë me një shumicë parlamentare joefikase”.
“Para zgjedhjeve do të ishte mirë të kishim një qeveri ekspertësh, e cila do të ketë kapacitet dhe mbështetje më të gjerë që të ofrojë projekte reale për dalje nga kjo krizë, të cilën Zaev nuk është i aftë ta menaxhojë. Kështu që ne jemi të gatshëm të bisedojmë për një qeveri ekspertësh me në krye një person që do të jetë i pranueshëm për të gjithë, figurë mbipartiake që mund ta udhëheqë qeverinë deri në zgjedhje lokale, e më pas të organizohen zgjedhje të parakohshme parlamentare dhe lokale”, ka deklaruar Antonio Milloshovski nga VMRO-DPMNE-ja.
Por partneri i koalicionit qeveritar, kreu i BDI-së, Ali Ahmeti ka dalë kundra propozimit të kryeministri maqedonas, pasi vlerëson se puna e opozitës është të bëjë opozitën.
“Misioni i opozitës është t’i shprehë vërejtjet e veta, qofshin ato edhe pa vend, sepse roli i opozitës, jo vetëm tek ne por tek të gjitha vendet e përparuara demokratike, është që ato vetëm në rastër të veçanta mund të bëhen pjesë e një procesi të rëndësishëm për vendin, përndryshe ato detyrë e kanë që të japin dhe të mos pajtohen me shumicën parlamentare”, ka deklaruar Ali Ahmeti.
Zaev të mërkurën kërkoi votëbesimin e qeverisë për shkak të krizës politike nëpër të cilën po kalon Maqedonia e Veriut, për shkak të bllokimit të punës së kuvendit, por edhe deklaratave të opozitës se së shpejti do të rrëzojë qeverinë. Zaev mori mbështetjen e 62 deputetëve nga 120 sa numëron Kuvendi i Maqedonisë së Veriut.