Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Rama e zë demin…për koqesh

Politiko 18 Korrik 2018, 12:31

Naum Mara

Në Bowling Green në Manhattan, dy blloqe më poshtë se Bursa e Nju Jorkut, ndodhet një nga skulpturat më të famshme të Mollës së Madhe (Big Apple-kështu quhet qyteti i Nju Jorkut), ‘Demi i bronztë’ i skulptorit Arturo Di Modica. Eshtë një pikë, që tërheq shumë turistë të huaj, sidomos aziatikë, që prekin Demin dhe dalin foto para tij, si për të patur një lloj bekimi financiar.

Skulptura simbolizon begatinë dhe optimizmin financiar, që shfaqet tek investitorët e Bursës në kohët më të mira, të quajtura “bull market”, kur të gjithë në eufori investojnë paratë e tyre në bursë, për t’i shumëfishuar.

Nga prekjet e shumta prej duarve të turistëve, pjesë të skulpturës ndrisin më shumë se i gjithë demi, që ka një ngjyrë bronzi në kafe. Çuditërisht, ato më të prekurat dhe më të shkëlqyeshmet, janë testikujt e Demit, të cilat populli na ka mësuar t’i quajmë shkurt dhe pa shumë ceremoni…koqe.

Ndoshta, aziatikët kanë shprehje që e lidhin suksesin financiar me fertilizimin, por fakti është që, as flegrat dhe as brirët e demit të inatosur nuk shkëlqejnë sa organet e tij gjenitale.

Këtë lloj “supersticioni” për begatinë financiare të kujton kryeministri Rama, ndërsa shikon treguesit ekonomikë të Shqipërisë në këto 5 vite të qeverisjes së tij, të cilat bien ndesh me propagandën e tij në ERTV.

Ka disa tregues, të cilët dëshmojnë amatorizmin e të gjithë ekipit qeveritar në qasjen ndaj problemeve të ekonomisë. Rritja e taksave, ajo e defiçitit tregtar dhe, sidomos, rritja e borxhit publik në raport me Prodhimin e Përgjithshëm Bruto, tregojnë se, edhe pse në kohën e “erërave të mira ekonomike” në botë, rritja e PPB-së në Shqipëri ka prirje të zvogëlohet.

Cila është alternativa?

Nëse Edi Rama nuk është në gjendje të “kapë për brirësh demin e ekonomisë”, atëherë duhet të japë një orë e më parë dorëheqjen.

Ka disa arsye, që Rama nuk është në gjendje të bëjë të parën.

E para, atij i mungon tërësisht një formim ekonomik dhe, më e keqja është se nuk ka bërë asnjë përpjekje në këto vite, që drejton Partinë Socialiste, të rrokë problemet komplekse të ekonomisë.

E dyta, kryeministri mendon se arti i qeverisjes është të bësh propagandë ose, me termat e sotme, të dish se si të manipulosh PR (Public Relations).

E treta, për interesa imediate të qëndrimit në pushtet, qeveria Rama ka inkurajuar, bile ka pasur drejtimin e prodhimit të kanabisit në vend, si edhe atë të pastrimit të parave të pista, që vijnë nga fitimet e bandave shqiptare në Europë. Me idenë se ky “lumë parash” do krijonte stabilitet në të ardhurat e shqiptarëve, qeveria ka dëmtuar direkt dhe indirekt degët e ekonomisë reale.

E katërta, me klientelizmin e hapur të shfaqur me koncensionet dhe PPP-të, ai ka larguar nga tregu shqiptar investiorët e huaj seriozë.

Ndaj, edhe pse nuk i mungon dëshira për të patur një vend të begatë, në mënyrë që të rrijë sa më gjatë në qeverisje, Rama i “mban sytë nga qielli” duke pritur rritjen e numrit të turistëve, rritjen e bamirësisë te biznesmenët privatë dhe mundësinë e rritjes së investimeve të dyshimta turke, pasi kanë marrë urdhërin dhe bekimin e Erdoganit.

Krejt njëlloj siç i mbajnë sytë turistët aziatikë, te koqet e Demit të bronxtë në Ëall Street.

Bashkë me stinën e verës, do largohen edhe turistët, si edhe do ndalen reklamat e agjensive europiane të udhëtimit, të cilat i propagandon me bujë në televizionin e tij personal kryeministri shqiptar.

Vjeshta do rrëzojë edhe plot gjethe të thata të ekonomisë së rreme shqiptare.

A do presim të mësojë se si të zërë demin e ekonomisë për brirësh, apo do vazhdojmë të mbajmë sehir se si Rama prek plot shpresë koqet e tij?