Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Rama, ky “Vigan Reformator”

Politiko 29 Tetor 2017, 11:39

Naum Mara

Para zgjedhjeve të fundit parlamentare, u krijua një “legjendë“ se kryeministri Rama kishte nisur një sërë reformash dhe prandaj meritonte edhe një mandat të dytë për t’i shpënë deri në fund. Më shumë se në zyrën e Endri Fugës, e njohur për spërdredhjet e së vërtetës, kjo legjendë ishte thurur në zyra të tjera, të cilat për shkak të interesave apo bindjeve, dëshironin edhe një mandat të dytë të Edit.

Raporti i Ramës me reformat është pak më i vjetër se kaq. Në fillimet e qeverisjes së tij, Ben Blushi e kritikonte hapur, që Rama nuk dinte të bënte reforma, por si të tilla quante masat shtrënguese apo ndryshimin e sipërfaqshëm të institucioneve.

Dhe fakti është, që nga gjithë reformat e trumbetuara prej tij dhe mbështetësve të tij në funksionimin e ekonomisë, shtetit dhe shoqërisë shqiptare, asnjëra nuk ka dhënë rezultat.

Reforma e Territorit

Edhe pse është më tepër një riorganizim i bashkive dhe komunave për të siguruar më shumë vota për partinë, që ishte në pushtet, e ashtuquajtura Reformë e Territorit, e kritikuar që në fillim nga opozita, nuk i ka sjellë asnjë dobi të vërtetë Shqipërisë. Pushteti, në vend të decentralizohet për të funksionuar më mirë dhe në interes të banorëve, përqëndrohet akoma më shumë në qendrat e mëdha, të lidhura ngushtë me Tiranën. Zonat e thella kanë mbetur akoma më të izoluara dhe me më pak mundësi për të zgjidhur hallet që kanë. Ndaj edhe Rigertës i duhet të lutet për rrugën e fshatit, sepse vetë fshati nuk ka as mundësi të sigurojë fonde dhe as fuqi të ushtrojë trysni mbi pushtetin qëndror.

Se sa e dështuar është kjo reformë duket edhe nga lëvizja e re e Ramës “për të bashkëqeverisur me qytetarët”, që është jo vetëm propagandaë populiste, por edhe dëshmi e dështimit të ndërtimit të shtetit.

Reforma e Ndërtimit

“Entuziastët” e Ramës e cilësuan ndalimin e lejeve të ndërtimit për dy vjet si “reforma në ndërtim”. Ndalimi ishte jo për t’i shërbyer vendit dhe as sektorit të ndërtimit, por për të mos lejuar rënien e çmimit të apartamenteve të pashitura të ndërtuesve dhe të vetë politikanëve ndërtues. “Ndalimi” u bë edhe me miratimin e plotë, por të heshtur, të opozitës. Dëmet e tij në ekonominë e vendit nuk i ka përllogaritur kush, ose më mirë askush nuk i nxjerr në dritë.

Reforma e Arsimit

Më e përfolura dhe më e diskutueshmja, reforma në Arsim dhe sidomos në atë të lartë, ka shumë dritëhije. Grupet e interesit janë përplasur për këtë reformë të domosdoshme , por që sipas vëzhguesve të paanshëm, jo vetëm nuk shkon në rrënjët e arsimit, por kryesisht favorizon universitetet private për të fituar edhe nga studentët, edhe nga taksapaguesit.

Reforma në Polici

Edhe pse nga autorësia e kësaj të fundit, Kryeministri u distancua pas çështjes “Tahiri”, duke ia lënë meritat dhe dështimet këtij të fundit, ajo rezultoi si një ndryshim i sipërfaqshëm i Policisë, pasi la të paprekur korrupsionin e madh në radhët e oficerëve madhorë të institucionit si dhe implikimin e tyre me krimin.

Reforma në Drejtësi

E vetmja Reformë e vërtetë, në të cilën merita e vetme e Ramës është se nuk e pengoi, si u përpoqën të tjerë politikanë. E megjithatë e mbetur në mes të udhës edhe pas përpjekjeve titanike të ambasadorit Lu. Siç kanë vërejtur kritikë të Ramës, “përkushtimi” i tij për Reformën ishte rrjedhojë e dëshirës për të hequr nga duart e Berishës dhe Metës, segmentet kryesore të sistemit juridik. Idetë e tij luhateshin nga një kontroll më i madh i ekzekutivit mbi to, e deri në krijimin e “organeve hetimore të ngjashme me ato të kohëve të Baba Takut”. Dhe nuk ka se si të ishte ndryshe. Nuk ka politikan shqiptar që të dëshirojë pavarësinë e pushtetit juridik edhe pse me fjalë mund të shprehet ndryshe.

Për më tepër, një politikan i tipit të Ramës, që dallohet për mikro-manaxhim. Eshtë kjo arsyeja, që Reforma do vonohet. Nga një anë Kryeministri dëshiron që kundërshtarët të kenë më pak ndikim, por edhe një Prokurori dhe Gjykatë krejtësisht jashtë kontrollit e rrezikon edhe të ardhmen e atij vetë.

Për të gjitha sa më sipër dhe për të ruajtur imazhin e “kampionit” të Reformave, Edi Rama ka nisur zhurmën rreth Reformës në Administratë, asaj në Diplomaci dhe më të bujshmes, asaj të Bashkëqeverisjes me popullin.

Ashtu si të parat edhe këto “flluska” do pëlcasin shpejt pa arritur ndonjë rezultat, sepse në konceptin bazë të Ramës për shtetin është “UNI” dhe jo institucionet. Në një monarki absolute ai edhe mund të arrinte suksese duke ndërtuar ‘objekte gjigande” pasi të kishte rënduar së tepërmi popullin në taksa.

Për fat të mirë ai ka lindur në një shekull të gabuar dhe në një kontinent të gabuar.