Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Raporti i KE/ Bushati “hyn sërish në rresht”: Reagimet e opozitës, pasqyrë e kulturës së dëshpërimit

Politiko 30 Maj 2019, 11:01

Raporti i KE/ Bushati “hyn sërish në rresht”:

Duket se ish ministri i Jashtëm, Ditmir Bushati ka rihyrë “sërish në rresht”, pasi kritikoi disa javë më parë qeverinë dhe deputetët e PS se vendi po shkon drejt përplasjes dhe se duhet gjetur një urë kompromisi me opozitën.

Duke komentuar raport-progresin dhe rekomandimin e Komisionit Evropian për Shqipërinë, Bushati i përgjigjet opozitës se reagimet e saj janë pasqyrë e kulturës së dëshpërimit.

“Reagimet e opozitës janë pasqyrë e kulturës së dëshpërimit, kemi kultivuar e poshtërimin e kundërshtarit. Është koha për mirëkuptim më të madh politik për interin e vendit dhe shqiptarëve”, u shpreh Bushati sot në Kuvend.

Fjala e plotë:

Sot mendoj që jemi në një moment shumë të rëndësishëm siç e thanë dhe para meje zonja Hajdari dhe zoti Balla, jo thjesht për raportin e përgatitur nga Këshilli Kombëtar i Integrimit Evropian, por sepse ky raport miratohet vetëm një ditë pas publikimit të raportit të Komisionit Europian ku vetë Komisioni Europian përsëriti rekomandimin për fillimin e bisedimeve për anëtarësim për Shqipërinë, bazuar në kalendarin e rënë dakord unanimisht nga të gjitha vendet anëtare në qershor të 2018, në përgjigje gjithashtu të rekomandimit të vjetshëm të Komisionit Europian.

Kjo nuk është një dhuratë e Komisionit Europian për qeverinë e Shqipërisë, dhe as për Shqipërinë. Raporti është pasqyrë e progresit në ecurinë e reformave që ka bërë vendi ynë dhe në konsolidimin e këtyre reformave gjatë vitit të kaluar, sidomos përsa i përket reformave në fushën e sundimit të së drejtës me fokus të posaçëm në procesin e pastrimit të gjyqësorit dhe prokurorisë dhe ndërtimit të arkitekturës së re në sistemin e drejtësisë.

Reformave në fushën e zhvillimit ekonomik e social që pavarësisht se mban larg Shqipërinë dhe Ballkanin Perëndimor nga mesataraja e vendeve anëtare të BE na tregojnë se vendi është në rrugën e duhur. Reformave që synojnë zbatimin e standardeve evropiane dhe Acquis Communautaire në jetën tonë të përditshme.

Ky raport gjithashtu konfirmon rolin e pazëvendësueshëm të Shqipërisë në rajon, Shqipërinë si spirancë stabiliteti dhe sigurie, frymëzimi paqeje dhe mirëkuptimi për fqinjët. Nuk është rastësi që raporti specifikon dhe njëherë tjetër faktin që vendi ynë linjëzon qëndrimin e tij në politikën e jashtme dhe në fushën e sigurisë dhe të mbrojtjes 100% me BE. Siç u tha këtu pak më parë që ka vende të tjera që edhe pse janë bërë para Shqipërisë vende kandidate apo janë në tryezën e bisedimeve për anëtarësim, ia lejojnë vetes që të aplikojnë politikën e lisharësit dhe të ulen në dy karrige.

Kjo është dëshmia më e qartë e vokacionit europian dhe euroatlantik të Shqipërisë. Nuk është rastësi që raporti gjithashtu identifikon mbështetjen e fuqishme dhe rolin e pazëvendësueshëm të Shqipërisë përsa i përket firmosjes së Marrveshjes se Prespës dhe fuqizmin e veprimit politik e shoqëror të shqiptarëve që jetojnë në Maqedoninë e Veriut.

E pra, raporti ofron një pasqyrë të qartë të të gjitha arritjeve. Po nga ana tjetër ofron edhe një rrugë përpara dhe një pasqyrë ku ne të gjithë duhet të shihemi për të mos përsëritur gabimet e së shkuarës apo për të mos rënë në kurthin e vetëkënaqësisë.

Zoti Balla e përmendi që ka 14 vjet në këtë sallë. Unë kam 10 vite në këtë sallë dhe me erdhi keq dhe u ndjeva disi i trishtuar kur pashë dje reagimet e opozitës në lidhje me këtë sukses të Shqipërisë. Ato ishin pasqyrë e kulturës së dëshpërimit. Mund të shkoj dhe më larg nëse mund të them që në vitet e tranzicionit të Shqipërisë gjatë këtyre tre dekadave ne të gjithë së bashku kemi kultivuar kulturën e poshtërimit të kundështarit a thua se kjo është dita jonë finale.

Kam qenë ministër i Jashtëm dhe në 2016 kam pasur përballë kolegë të tjerë nga Partia Demokratike e kemi bërë ekzaktësisht të njëjtin debat kur Komisioni erdhi me një rekomandim që e lidhi me procesin e vettingut. Po kështu vjet, në 2018 kemi bërë një debat të madh me opozitën, për fat të keq këtu në Parlament nëse rekomandimi do të shtronte rrugën për fillimin e bisedimeve për anëtarësim apo jo, dhe në rast se kalendari i miratuar nga vendet anëtare do të respektohej apo jo, dhe i kujt isht faji. Dhe për fat të keq, kam përshtypjen që harrojnë se para partive politike, interesit tonë politik, partiak, përsonal, Shqipëria është Atdheu ynë i përbashkët.

Kam qejf që sot ta bëj të qartë dhe njëherë tjetër që qeveria në këtë proces ka thjesht barrën kryesore, duhet të bëjë detyrën, por përgjegjësia është e përbashkët, e atyre, e neve që jemi në krye të vendit dhe atyre apo jush që jeni opozitë, qoftë opozita parlamentare po dhe opozita politike.

Merita? Merita është vetëm e shqiptarëve. Dhe faktit që që nga shembja e regjimit komunist mbi 90% e shqiptarëve nuk kanë asnjë mëdyshje sa i përket kursit të Shqipërisë. Është kjo arsyeja që në raportin e Komisionit Europian evidentohen disa mangësi të cilat nuk mund t’i plotësojë dot shumica për shkak të mungesës së opozitës politike, qoftë për sa i përket kontrollit parlamentar, cilësisë së ligjeve, institucionalizimit të reformës së drejtësisë, dhe plotësimit të të gjitha vendeve vakante e kështu me radhë.

Çështja e tretë që unë sot kisha dëshirë të shtroja së bashku me ju, ka të bëjë me atë çka unë besoj mendojnë shumica e heshtur, qytetarët e zakonshëm të këtij vendi. Qytetarët e zakonshëm të këtij vendi nuk është se po presin negociatat me Bashkimin Evropian në kuptimin klasik të fjalës, sepse e dimë shumë mirë që nuk jemi ne që po negociojmë me BE, por jemi ne që duam të imitojmë dhe ta ndërtojmë disa standarde për të rritur mirëqënien në këtë vend dhe për të mbajtur këtu shqiptarët, për ti krijuar këtu prespektivën shqiptare. Prandaj e kam quajtur gjithmonë që ky është testi i modernitetit të shoqërisë shqiptare. Përcaktimi në radhë të parë i një emëruesi të përbashkët, se si do të lëvizim ne politikisht për të përmirësuar në radhë të parë standardet e jetesës këtu. Prandaj është koha për një mirëkuptim më të madh politik.

Unë kam hyrë në politikë në 2009, ditën kur qeveria Berisha aplikoi për anëtarësimin e vendit në BE. 10 vjet më pas nuk ia vlen që të bëjmë më lojëra kukamfshehti, ne ende nuk kemi nisur procesin e bisedimeve për anëtarësim, por jemi më afër se kurrë këtij realiteti. Prandaj nuk duhet ti biem me gurë,sepse në fund të ditës ne penalizojmë Shqipërinë, nuk penalizojmë as qeverinë, as opozitën, por Shqipërinë.

Jam i bindur që shumica e heshtur e këtij vendi sot kërkon dialogun dhe mirëkuptimin dhe jo konfrontimin.

Sot kërkon një Shqipëri Evropiane me mundësi të barabarta dhe jo diskriminimin dhe përjashtimin.

Sot kërkon një Shqipëri që bazohet tek ekonomia e dijes dhe jo një Shqipëri që bazohet tek fuqia e lirë e krahut të punës.

Sot shqiptarët kërkojnë një kapitalizëm progresiv i cili i krijon mundësi të barabarta të gjithëve dhe jo një kapitalizëm që bazohet te politikat grabitqare.

Kjo është arsyeja që ne duam dhe 90% e shqiptarëve kërkojnë Bashkimin Evorpian. Kjo është arsyeja që ne socialistët dhe progresistët shqiptarë e shtrijmë dorën e bashkëpunimit në kuadrin e reformës zgjedhore, qoftë për opozitën parlamentare, ashtu dhe për opozitën politike. Kjo është arsyeja që ne socialistët dhe progresistët shqiptare e shtrijmë dorën e bashkëpunimit për të kapërcyer çdo lloj ndasie politike sepse më e rëndësishme për ne është Shqipëria. Jo sepse na u desh të dilte Teresa May dhe të na kujtonte që kompromisi nuk është fjaleë e pisët, por se ne jemi të ndërgjegjshëm që Shqipëria evropiane kërkon një përgjegjësi tjetër.

Ky Kuvend, e gjithë klasa politike, të paktën dhe për sy e faqe, sot njëzëri duhet ti kërkojë vendeve anëtare të Bashkimit Evropian fillimin një orë e më parë të bisedimeve për anëtarësim për Shqipërinë. Është në interesin e Shqipërisë, është në interesin e qeverisë, është në interesin e opozitës, është në interesin e shqiptarëve në rajon që janë mësuar ta shohin Shqipërinë, ta shohin Tiranën si burim frymëzimi. Por është gjithashtu dhe në interesin e Bashkimit Evropian, sepse vijimësisht Shqipëria dhe populli shqiptar e kanë demonstruar që janë evropianë në frymë dhe në veprime.