Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Reforma Zgjedhore, sfida e sesionit të ri politik

Politiko 8 Shtator 2020, 13:06

Reforma Zgjedhore, sfida e sesionit të ri politik

Pasditen e së hënës, ndonëse zyrtarisht një ditë pushimi, rinisën punimet në Kuvendin e Shqipërisë.

Në fjalimet hapëse, theksi u vu kryesisht te Reforma Zgjedhore, si sfida kryesore e këtij sezoni të ri politik në vend, për shkak se në pranverën e 2021-shit pritet të mbahen edhe zgjedhjet e përgjithshme parlamentare.

Deri tani, vetëm data e zgjedhjeve është dekretuar nga presidenti Ilir Meta, 25 prilli, ndërsa ashtu siç e theksoi edhe kryeparlamentari Gramoz Ruçi, brenda këtij sesioni, duhet përmbyllur puna për Reformën Zgjedhore duke impelmentuar në Kodin Zgjedhor ndryshimet kushtetuese që u votuan në seancën e fundit parlamentare më 30 korrik, si dhe administrata e re zgjedhore.

“Ky nuk ishte oportunizëm politik, por një veprim me vetëdije të qartë kombëtare. Me këtë veprim, gratë dhe burrat e këtij Kuvendi u krijuam një mundësi forcave politike që kishin braktisur Kuvendin, të kontribuonin në legjislacionin për zgjedhjet. Kuvendi i Shqipërisë i rikrijoi një mundësi përfaqësimi asaj pjese të popullsisë që beson te opozita jashtëparlamentare dhe kontributi i saj për vendin. Produkt i bashkëpunimit me opozitën jashtëparlamentare ishte “përkthimi” i marrëveshjes së 5 qershorit në dispozita ligjore, nëpërmjet miratimit të ligjit “Për disa ndryshime dhe shtesa në ligjin nr. 10.019, datë 29.12.2008 “Kodi Zgjedhor i Republikës së Shqipërisë” të ndryshuar”, në seancën plenare të datës 23 korrik 2020”, tha Kreu i Kuvendit.

Ruçi tha se, “as gjithëpërfshirja e moraliteti dhe as kushtetutshmëria e legjitimiteti nuk mund të qëndrojnë pa njëri-tjetrin”.

“Këto ndryshime nuk ishin një vetëtimë në qiell të pastër, por ishin sinjalizuar nga opozita parlamentare në Komisionin e Posaçëm për Reformën Zgjedhore. Këtë vullnet politik konsistent ajo e solli në Kuvend, duke depozituar më 15 qershor nismën ligjore për ndryshime kushtetuese. Kuvendi u hapi rrugën këtyre ndryshimeve, i bindur se ato e bëjnë garën elektorale më konkurruese dhe qytetarët më përcaktues në zgjedhjen e grave dhe burrave që do t’i përfaqësojnë në Kuvendin e Shqipërisë.

Kuvendi ndan të njëjtin mendim me qytetarët shqiptarë se këto ndryshime janë në të mirë të vendit. Kriteri për refuzimin e një ndryshimi ligjor nuk është fakti se ky ndryshim nuk është i përsosur, por nëse ndryshimi përmban më shumë të mira sesa mangësi. Në këtë botë, të nderuar kolegë, sidomos në jetën politike, ka shumë pak gjëra që janë tërësisht të mira apo tërësisht të këqija. Prandaj unë ndaj të njëjtën bindje me shumicën e deputetëve të Kuvendit dhe të qytetarëve se këto ndryshime avancojnë demokracinë brenda partive dhe rrisin si përgjegjësinë e tyre dhe të qytetarëve në zgjedhjen e degës legjislative të qeverisjes”, – deklaroi Ruçi.

Ai tha se, këto ndryshime krijojnë një kuadër ligjor zgjedhor, në përputhje me standardet më të mira ndërkombëtare, ku zgjedhësi voton jo vetëm për subjektin zgjedhor, por edhe për kandidatin e parapëlqyer prej tij. Me këto ndryshime, plotësuam kuadrin ligjor për ndryshimet në Kodin Zgjedhor dhe mundësuam një garë të barabartë në zgjedhjet parlamentare të vitit 2021”.

Nga ana tjetër, drejtuesja e Shoqatës për Kulturë Demokratike, Gerta Meta thotë për VOA se “Kemi një premtim në parim se listat do të hapen, por ne nuk e dimë ende se si do të hapen listat. A do të hapen listat për qytetarët apo do të jetë një lojë e politikës, ku përsëri kryetarët e partive, majtas dhe djathtas, do të kenë gjithë ekskluzivitetin për t’i zgjedhur kandidatët për deputetë” .

18 shtatori është afati i fundit për propozimet, sipas marrëveshjes së qershorit, mbi emërimin e drejtuesve dhe përbërjes së Komisionit Qendror të Zgjedhjeve, por politika po përpiqet ta kapë sërish, thotë zonja Meta, sepse ka vendosur disa kritere, që pengojnë çdo qytetar me integritet për të konkurruar për ato poste.

“Përsëri politika po tenton ta kapë KQZ-në, sepse kriteret e përzgjedhjes së kandidatëve në të gjithë nivelet e strukturës së re të Komisionit Qendror të Zgjedhjeve nuk janë aspak transparente, janë shumë hileqare për faktin se kanë vënë një klauzolë të tillë se kandidati duhet të jetë një ish-përfaqësues i një institucioni, ish-funksionar, ish-drejtues i lartë, apo ish-drejtues i një ojq-je, apo ish-gjyqtar apo ish-funksionar në sistemine drejtësisë” - thotë Meta.

Mbetet për t’u parë nëse kanë hyrë ende në fuqi ndryshimet kushtetuese të 30 korrikut dhe si do të ecet me akte të tjera nënligjore, sqaron Meta, për të nisur një garë zgjedhore të ndershme dhe ligjore. Sipas saj, situata politike nuk është aspak e qetë, edhe pse në dukje ka një heshtje të sforcuar artificialisht, dhe është e ngarkuar me surpriza të paparashikuara.

Lexo edhe:

https://politiko.al/a-do-te-jete-funksionale-gjykata-kushtetuese-me-1-janar/