“Rekordet e pathyeshme te pandemisë”, mjekja publikon statistikat: Shqipëria e fundit për testime COVID-i

Vijojnë akuzat e Partisë Demokratike ndaj qeverisë për mungesë të një strategjie të qartë në menaxhimin e pandemisë dhe numër të ulët të testeve.

Liljana Shyqyriu, anëtare e task-forcës ati-COVID të ngritur pranë opozitës, përmes një postimi në rrjetet sociale shprehet se Shqipëria klasifikohet gjithmonë e fundit përsa iu përket testimeve në masë gjatë kësaj periudhe pandemie.

“Që me fillimin e epidemisë së Covid-19 në vendin tonë ka pasur një rekord në nivel Europian i cili është mbajtur nga Shqipëria dhe ka qëndruar i pathyer për të gjithë periudhën. Ky është ai i testimeve për 1 Milion banorë ku ne klasifikohemi gjatë gjithë kohës në vendin e fundit dhe vendi i parafundit ka më shumë se dyfishin e testeve tona”, shkruan Shyqyriu duke shtuar më tej se këto janë rekordet më fatkeqe të perjudhës së pandemisë.

“Përfundimisht Institucionet Shëndetësore janë treguar të paafta në vënien në eficiencë të një strategjie por kanë arritur të mbajnë me fanatizëm rekordet negative”, përfundon Shyqyriu.

Postimi i plotë:

Rekordet e pathyeshme te Epidemisë

Që me fillimin e epidemisë së Covid-19 në vendin tonë ka pasur një rekord në nivel Europian i cili është mbajtur nga Shqipëria dhe ka qëndruar i pathyer për të gjithë periudhën. Ky është ai i testimeve për 1 Milion banorë ku ne klasifikohemi gjatë gjithë kohës në vendin e fundit dhe vendi i parafundit ka më shumë se dyfishin e testeve tona.
Këtij rekordi fatkeqësisht ju shtua me vonë rekordi i mungesës së një strategjie të qartë sidomos objektivi i cili do parandalonte parandalimin e përhapjes së Covid në grupet vulnerabël të popullatës :
personat me moshë mbi 65 vjec, personat e prekur nga sëmundjet kronike dhe
personeli shëndetësor , grupe të cilat gjate gjithe kohes u goditen vrullshëm nga epidemia.
Gjatë muajit korrik dhe në vazhdim këtyre dy rekordeve ju shtuan dhe dy rekorde të tjera të cilat penalizojnë direkt shëndetin dhe jetën e qytetarëve shqipëtarë.
Që prej fillimit të muajit korrik ne kemi qënë nje nga 10 vendet e para ne Europë përsa i takon numrit të rasteve të reja dhe numrit të vdekjeve për 1 milion banorë .
Këto janë dhe rekordet më fatkeqe te gjithë periudhës së epidemisë.
Përfundimisht Institucionet Shëndetësore janë treguar të paafta në vënien në eficiencë të një strategjie por kanë arritur të mbajnë me fanatizëm rekordet negative . Shpresojmë që kritikat dhe sugjerimet e shumta që janë bërë ndaj tyre në funksion të shëndetit të qytetarëve të mos vazhdojnë të bien në vesh te shurdhër dhe te shërbejnë për të rikthyer sigurinë, qetësine dhe garancinë qytetareve.