Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

'Senatorët' e PS duhet të marrin një vendim në lidhje me Ramën

Politiko 16 Janar 2018, 18:24

'Senatorët' e PS duhet të marrin një vendim në

Red Varaku

Antarët më të rëndësishëm të Partisë Socialiste, të ashtuquajturit senatorë të saj, kanë bërë një marrëveshje Faustiane me Edi Ramën. Kjo marrëveshje, me kalimin e kohës, sa vjen e bëhet më e qartë. Ata i kanë premtuar atij besnikëri në këmbim të favoreve politike dhe financiare. Por këtë “marrëveshje me djallin”, ata nuk është se e kanë bërë ngaqë kanë ndonjë vlerësim të veçantë për Ramën, përkundrazi ata nuk i besojnë “as gomarin”, dhe jo më fatin e tyre.

Ata e konsiderojnë atë në rrethet e tyre të ngushta si “tradhtar, mosmirënjohës dhe të pabesë”, dhe këtë konsideratë, pas Tahirit, guxoi ta deklaronte hapur edhe Pjerin Ndreu, edhe pse më pas u detyrua të tërhiqej nga mendimi i tij, që në fakt gjeti mbështetje në komentet e shumë socialistëve. Por ja që Rama, si asnjë kryeministër tjetër më parë, ka sot në dorë të gjitha pushtetet dhe atyre nuk është se i mbetet rrugë tjetër përveçse të puthin dorën të cilën nuk e kafshojnë dot. Deri diku kjo është mëse e kuptueshme.

Por, me situatën e krijuar me reformën në drejtësi, me rastin “Tahiri”, me “marrjen” përdhunshëm të kryeprokurores Marku, me “tradhtinë” ndaj deputetit Aqif Rakipi, dhe shumë kontribuesve të shquar në Partinë Socialiste, ata kanë filluar të kuptojnë që Rama nuk është aq besnik dhe i fuqishëm sa ç’do të duket. Edhe pse përpiqet fort, që të ketë gjithçka nën kontroll, e vërteta është se tashmë atij çdo gjë po i del jashtë kontrollit. Ai dhe kukullat e tij aktualisht janë në qeveri, por nuk po qeverisin. Ata i janë sulur tepsisë dhe kanë harruar timonin.

Pra, qeveria e tij është tejet e rrezikuar dhe ndodhet në fije të perit. Ai mund të rrëzohet nga çasti në çast dhe marrëveshja që “Faustët” kanë bërë mund t’i kushtojë atyre shumë shtrenjtë. Cilat janë arsyet që mund të rrëzojnë tepsi-qeverinë Rama ll ? Së pari, zhgënjimi dhe hatërmbetja e socialistëve të ndershëm. Megjithëse Rama u përpoq “ta ndreqte” këtë duke rikthyer “xhaketa të vjetra” si Ruçi e Xhafa, ai përsëri me përzgjedhjen e kabinetit të ri tregoi që administrata e tij vetëm e socialistëve të vërtetë nuk është. Ai dëshmoi edhe njëherë që, gjëja më e rëndësishme për të nuk është kontributi shoqëror dhe politik i askujt, por vetëm besnikëria ndaj tij si kryetar.

Në fakt, për çdo shqiptar me “dy gramë tru”, kjo nuk është gjë tjetër veçse admistrata e një pakice që në fillim u shfaq si 'mish i huaj' në Partinë Socialiste dhe pastaj u pagëzua me emrin 'Rilindje'. Rama dhe ushtarët e tij tashmë janë përfundimisht ngadhënjimtarë. Ata i kanë mposhtur dhe turpëruar socialistët e vërtetë dhe e kanë uzurpuar plotësisht Partinë Socialiste dhe nëpërmjet legjitimitetit që buron nga ky fakt ata po e përçajnë rëndë partinë duke përjashtuar personalitete thellësisht të majta si Ben Blushi, Koço Kokëdhima etj.

Së dyti, kriza ekonomike ndër më të rëndat, që ka përfshirë vendin tonë. Qeveria Rama ndryshe nga qeveria Berisha është një qeveri antitreg, me një qasje jo vetëm përbuzëse, por edhe shkatërruese ndaj tregut të lirë. Rama është i njohur për paaftësinë e tij në fushën e ekonomisë dhe për adhurimin e tij për “shtetin e fortë” si reminishencë e vjetër e regjimit antitreg. Taksat e larta nuk përkthehen në investime publike. Ato mbushin tepsinë, të cilën më pas e ndajnë si “plaçkë lufte” midis tyre, (në formë tenderash), grupet paramilitare të vjedhjes dhe blerjes së votave në çdo qark. Ndërsa Oligarkët që ka përreth i kanë zënë frymën biznesit duke eliminuar konkurencën e ndershme dhe duke shkatërruar ekosistemin për një kapitalizëm të vërtetë. Ai po e çon vendin drejt një katastrofe ekonomike me pasoja shumë të rënda .

Së treti, paaftësia e tij legjendare për të bërë shtet, siç pretendon në takim -funeralet e tij me administratën dhe popullin. Ai e ka mbushur administratën e lartë me amatorë, të cilët më së shumti bëjnë punën e blogerit për qeverinë. Këta janë njerëz që paraqiten nëpër zyrat e shtetit me makina super të shtrenjta, pallto, çanta e parfume që kushtojnë disa herë më shumë se rroga e tyre. Ata nuk e kanë idenë e seriozitetit të punëve të shtetit, këtë e tregojnë dokumente të rëndësishme të cilat janë të tejmbushura me gabime ortografike dhe nonsense ligjore.

Së katërti, dhuna dhe represioni ndaj të mjerëve. Në kujtesën shqiptare, pas regjimit Hoxhist , kjo është qeveria më mizore dhe më e dhunshme me popullin e saj. Pothuajse çdo ditë kemi raste, të cilat tregojnë hapur pabesinë dhe brutalitetin e shtetit ndaj shtresave të pambrojtura të shoqërisë. Është shumë e lehtë të arrestosh të mjerë, të cilët mezi mbahen në këmbë dhe dalin në rrugë për bukën e gojës, ashtu siç është shumë e vështirë për të ndalur pangopësinë e kleptokratëve rreth pushtetit. Ekranet i kemi të tejmbushura me pamje të familjeve krejtësisht të braktisura nga qeveria, e cila me ç’duket nuk e ka ndërmend të përmirësojë asgjë në lidhje me këtë gjë, sepse dhuna dhe represioni nuk ka të bëjë me modelin qeverisës, por me vetë natyrën shumë të komplikuar të personalitetit të Ramës i cili adhuron” të fortët” dhe përbuz të dobëtit.

Me kalimin e kohës represioni shtetëror do të vijë duke u shtuar dhe me shumë gjasa do të shkaktojë revoltë dhe protesta masive, të paralajmëruara edhe nga opozita. Ato do të rezultojnë në një kolaps të plotë të ekonomisë dhe të qeverisjes,si pasojë, Rama do të detyrohet të japë dorëheqjen për t'i hapur rrugë qeverisë Antimafia.

Ka ardhur koha që 'Faustët' e Partisë Socialiste të marrin një vendim: ose të vazhdojnë marrëveshjen e tyre me Ramën, dhe të marrin kështu mbi vete edhe rrezikun e humbjes së pushtetit bashkë me të, ose të fillojnë distancimin prej tij sa nuk është vonë. Duke u distancuar nga Rama, ata ruajnë në këtë mënyrë kësisoj integritetin e tyre dhe aksionet e tyre politike, si dhe vazhdimësinë e qeverisjes socialiste. Një gjë është e sigurt, në rast se marrin një vendim, do të duhet të jetojnë me pasojat e këtij vendimi pjesën tjetër të jetës së tyre politike.