Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Sfidat me të cilat do të përballet bota në të ardhmen

Politiko 1 Nëntor 2018, 15:15

Sfidat me të cilat do të përballet bota në të ardhmen

OKB vlerëson se 55% e popullsisë globale jeton në zonat urbane – një shifër që parashikohet të rritet në 68% deri në vitin 2050. Me disa përjashtime, qytetet pritet të bëhen më të mëdha dhe më të shumtë në numër. Ndërsa urbanizimi përshpejtohet, veçanërisht në vendet aziatike dhe afrikane, BusinessMag ju sjell në këtë artikull pesë nga sfidat më të mëdha me të cilat qytetet do të përballen me të ardhmen:

Rreziku mjedisor

Urbanizimi i shpejtë së bashku me ngjarjet më të shpeshta dhe ekstreme të motit të lidhura me ndryshimet globale të klimës po rrisin kërcënimet mjedisore. Kërcënimet mjedisore përfshijnë përmbytjet, ciklonet tropikale (në të cilat qytetet bregdetare janë veçanërisht të prekshme), valët e nxehtësisë dhe epidemitë. Për shkak të dendësisë fizike dhe popullsisë së qyteteve, kërcënimet e tilla shpesh rezultojnë në humbje financiare shkatërruese dhe vdekje. Kjo është një nga sfidat më të mëdha me të cilat përballen autoritetet dhe kërkon vëmendje urgjente.

Burimet

Qytetet kanë nevojë për burime të tilla si uji, ushqimi dhe energjia për të qenë të qëndrueshme. Urbanizimi po zvogëlon zonat në dispozicion të ujërave, tokat bujqësore dhe rrit kërkesën për energji. Ndërkohë që aplikimi më i mirë i teknologjisë mund të rritë produktivitetin bujqësor dhe të sigurojë një transmetim më efikas të energjisë elektrike, shumë qytete do të vazhdojnë të luftojnë për t’i siguruar këto burime një popullsie urbane gjithnjë në rritje. Përtej këtyre kërkesave themelore, rritja dhe zhvillimi i qyteteve do të shohë reduktimin e hapësirave të gjelbra brenda qyteteve, duke ndikuar negativisht në qëndrueshmërinë. Ndërsa uji i pijshëm po rrallohet, tokat pjellore po zvogëlohen, çmimet e ushqimeve po rriten, duke goditur më të varfërit.

Pabarazia

Kur bëhet fjalë për sigurimin e burimeve bazë dhe elasticitetin ndaj kërcënimeve mjedisore, parashikimi është i pabarabartë për grupe të ndryshme të banorëve urbanë. Ndërsa rritet numri i të pasurve urbanë, shumë qytete gjithashtu do të shohin rritje të numrit të të varfërve urbanë. Hendeku mes të pasurve dhe të varfërve pritet të rritet në të ardhmen. Pabarazi të tilla, kur mbeten të pakontrolluara, do të destabilizojnë shoqërinë. Ekziston një nevojë kritike për politikë-bërësit që të sigurojnë që frytet e progresit të shpërndahen në mënyrë të barabartë.

Teknologjia

Teknologjia do të përdoret gjithnjë e më shumë në zhvillimin dhe drejtimin e qyteteve të së ardhmes. Qytetet smart tashmë sa vijnë e po rriten dhe shumë vende po shfrytëzojnë energjinë diellore për përdorim në pronat e banimit. Teknologjia smart mobility mund të lehtësojë bllokimin e trafikut që vuajnë shumë qytete. Përdorimi i teknologjive në dobi të mjedisit do të çojë gjithashtu në qytete më të mira në të ardhmen. Instalimi i sensorëve në shtëpitë e të moshuarve që jetojnë vetëm mund t’i lidhë ata me komunitetin dhe të thërrasin për ndihmë kur janë të sëmurë ose kur lëndohen. Megjithatë, teknologjia mund të përjashtojë banorët urbanë që nuk mund ta përballojnë atë ose nuk kanë mundësitë e nevojshme për adaptimin e saj. Ndërsa qytetet e së ardhmes do të bëhen më të dizhitalizuara, duhet të tregohet kujdes për të parandaluar shfaqjen e një forme të re të ndarjes sociale në teknologji.

Qeverisja

Qytetet e së ardhmes ofrojnë mundësi të pafundme për të pasuruar jetën e banorëve të tyre edhe pse sfidat janë të paqarta. Për të bërë më të mirën nga urbanizimi i pashmangshëm, një qeverisje më e mirë është e domosdoshme. Qytetet do të rriten në madhësi dhe popullsia e tyre do të bëhet më e larmishme, shkruan Business AMag Albania .Prandaj, drejtimi i këtyre qyteteve do të jetë në mënyrë progresive kompleks dhe do të kërkojë mendje më të përkushtuara. Gjithnjë e më shumë, qytetet në mbarë botën po mësojnë rreth praktikave më të mira të qeverisjes dhe planifikimit nga njëra tjetra, edhe pse mbeten të përgjegjshëm ndaj qeverive të tyre përkatëse kombëtare. Qëllimet e qeverisjes urbane duhet të trajtojnë çështjet e barazisë dhe qëndrueshmërisë në qytetet e së ardhmes.