Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

SHBA refuzon pavarësinë e Katalonjës

Politiko 28 Tetor 2017, 22:04

SHBA ka refuzuar pavarësinë e Katalonjës. Me anë të një deklarate të Departamentit të Shtetit, Amerika është shprehur se mbështet shtetin spanjoll dhe unitetin e tij dhe se qëndrimi i Barcelonës në juridiksionin e Madridit është një e mirë reciproke për të dy shtetet.

“Katalonja është pjesë e integruar e territorit spanjoll dhe SHBA mbështet masat e marra nga qeveria spanjolle që kanë për qëllimin ruajtjen e një shteti të bashkuar dhe të fuqishëm, ku të gjithë jetojnë në prosperitet”-shkruhet mes të tjerash në deklaratën e DASH.

Kujtojmë që shteti i vogël i Sllovenisë është i pari që ka dhënë sinjale për një njohje të mundshme të Republikës së re në Europë.

Ministria e Jashtme e këtij vendi deklaroi pas vendimit të Parlamentit katalanas se “mbështet të drejtën e kombeve për vetëvendosje, e cila duhet të shprehet dhe të realizohet në mënyrë demokratike”.

10 ditë më parë, ministri i Jashtëm i Spanjës, Alfonso Dastis, i shprehu shqetësimin homologut të tij, Karl Erjavec, për solidaritetin e treguar ndaj katalanasve nga Parlamenti i Sllovenisë pas referendumit të 1 tetorit. Pyetjes së Dastis nëse Lubjana do të marrë “ndonjë vendim jashtë kuadrit ligjor të Spanjës”, Erjavec i është përgjigjur: “Për momentin është e vështirë të thuhet sepse Katalonja nuk ka bërë ende asnjë deklaratë (për pavarësinë)”.

Tashmë që Katalonja ka zyrtarizuar shkëputjen nga Madridi, Lubjana me deklaratën e djeshme të Ministrisë së Jashtme tregon se po ecën drejt njohjes. Ky pozicion i Slovenisë lidhet me të shkuarën e shtetit, i cili ishte i pari që u shkëput nga Jugosllavia dhe ndër të parët që njohu pavarësinë e Kosovës, raporton Politiko.al.

Lëvizje pro pavarësisë së Katalonjës ka patur edhe në veri të Evropës. Deputeti finlandez, Mikko Karna ka njoftuar se do të dorëzojë në Parlament një rezolutë për njohjen e pavarësisë. Karna është deputet i Partisë Qendrore, që drejtohet nga kryeministri Juha Sipila, ndërkohë ky i fundit përgëzoi katalanasit për referendumin e 1 tetorit. Por, disa orë pas kësaj deklarate, ministri i Jashtëm finlandez tha se vendi i tij mbështet integritetin e Spanjës.

Nëse Helsinki dhe Lubjana do të vendosin pro njohjes së Katalonjës, atëherë qëndrimi i këtyre dy shteteve të vogla, do ishte në kundërshtim me qëndrimin e Brukselit dhe shteteve më të mëdhaja anëtare të BE-së, Gjermanisë, Francës dhe Italisë.

Një tjetër goditje mund t’i vijë Spanjës nga ana tjetër e oqeanit. Argjentina ka dhënë shenja se mund të bëhet shteti i parë në Amerikën e Jugut që njeh Katalonjën. Deputeti socialist, Juan Carlos Giordano, ka paralajmëruar dërgimin e një rezolute në Parlament për të njohur shtetin e ri në Evropë. Megjithatë, Ministria e Jashtme argjentinase ka dhënë dje mbështetje për integritetin e Spanjës.

Meksika, Turqia, Ukraina, Serbia, Kanadaja, Çekia dhe Bullgaria janë disa nga shtetet e tjera që janë shprehur kundër pavarësisë së Katalonjës, duke iu bashkuar qëndrimit të SHBA-së dhe BE-së, ndërsa Skocia është vetëofruar për të ndihmuar katalanasit në njohjen ndërkombëtare.