Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Shkëlqimi dhe rënia e Saimir Tahirit. Karriera politike e ish-mikut të Edi Ramës

Politiko 18 Tetor 2017, 17:23

Shkëlqimi dhe rënia e Saimir Tahirit. Karriera politike e ish-mikut

Në 2005-ën, kur Edi Rama ju drejtua Partisë Socialiste për t’u bërë kryetari i saj, aso kohe mbante çorapet shumëngjyrëshe dhe ishte ende i pamartuar, Saimir Tahiri ishte personi që po e shoqëronte. Raporti mes tyre ishte aq i fortë sa në korridoret e selisë rozë, Tahiri cilësohej si krahu i djathtë i kryetarit të ri të socialistëve të sapo dalë në opozitë.

Me mbështetjen e pakushtëzuar të Edi Ramës, Saimir Tahiri do të niste me vrull karrierën politike duke marrë mandatin e deputetit në zgjedhjet e ardhshme, teksa në daljet publike, ai do të pozicionohej në çështjet që lidheshin me rendin dhe sigurinë.

Në tetë vitet e opozitës, me mbështetjen e Ramës, Tahiri krijoi profilin e Minsitrit të Brendshëm “në hije”. Në shtator të 2013-ës, kur socialistët erdhën në pushtet, Rama nuk zhgënjeu as pritshmëritë dhe as Saimir Tahirin duke e emëruar atë në postin e Ministrit të Brendshëm.

Zgjedhjet lokale të 2015-ës, do të sillnin krisjen e parë në marrëdhënien Rama-Tahiri. Ky i fundit ju desh ta përtypte jo pa vështirësi vendimin e Ramës për të mbështetur Erjon Veliaj në garrën për Bashkinë e Tiranës.

Në dy vitet e para, performanca e Tahirit si Ministër i Brendshëm pati ulje-ngritje, për të mbërritur më pas në vitin 2015-2016, kur mbjellja e kanabisit doli jashtë çdo kontrolli të policisë duke u përhapur në çdo cep të vendit. Por pavarësisht kësaj situate Tahiri vijonte të fliste ende për “sukseset” e punës së tij, por duket se këtë herë “sukseset” nuk po bindnim më as Edi Ramën.

Largimi i Tahirit nga Ministria e Brendshme, katër muaj para zgjedhjeve, do të sillte tronditjen e dytë në raportin mes tyre, ndërsa hendeku u thellua edhe më tej me lënien jashtë në kabinetin “Rama 2”.

Dita e djeshme ka qenë padyshim, nga ditët më të vështira politike të Saimir Tahirit. Teksa zbuloheshin, “e zeza mbi të bardhë”, përgjimet që autoritetet italiane kishin mbledhur në atë që u pagëzua si “Dosja Habilaj”, reagimi i Ramës, si dhe heshtja e kolegëve të PS-së, duket se “vulosi” fundin e një miqësie të vjetër.

Saimir Tahri mban ende postin e kryetarit të PS-së për Tiranën ndërsa është emëruar nga Rama edhe koordinator i platformës së bashkëqeverisjes me qytetarët. Fundi i miqësisë me Edi Ramën a do të sjellë edhe “fundin politik” të ish-ministrit të Brendshëm brenda PS-së? Kjo mbetet për tu parë./Politiko.al