Shpërthejnë përsëri protestat në Barcelonë

Demonstruesit u mblodhën në rrugën pranë parlamentit të Katalonjës në Barcelonë të martën pas vendimit për të vonuar votimin për zgjedhjen e një presidenti të ri rajonal.

Kryetari i parlamentit katalan tha se zoti Puigdemont ishte i vetmi kandidat. Vendimi i tij bëri që protestuesit të dilnin në rrugë.

“Duam që presidenti ynë të kthehet në atdhe, pasi kjo nuk është demokraci. Ne kemi një diktaturë në Spanjë,” thotë Asuncion Jimenez, protestues pro-pavarësisë.

Puigdemont iku në Bruksel pasi u akuzua për rebelim dhe kryengritje në tetor, që nga shpallja e pavarësisë pas një referendumi të diskutueshëm.

Madridi shpërndau parlamentin katalanas dhe vendosi sundimin e drejtpërdrejtë. Zgjedhjet në dhjetor bënë që partitë pro pavarësisë të fitonin përsëri shumicën.

Puigdemont dhe mbështetësit e tij sugjeruan se ai mund të kryente detyrën si president në mërgim nëpërmjet telekonferencave nga Belgjika - por gjykata kushtetuese vendosi se kjo ishte e paligjshme. Tani ka një konkurrencë në rritje brenda lëvizjes pro pavarësisë mbi atë se kush duhet të jetë president.

“Ka një luftë shumë interesante dhe mendoj se një rezultat dhe negociata për të cilat është rënë dakord, janë shumë negative”, thotë blogeri Luis Cornago.

Ndërsa të dyja palët po i ngurtësojnë qëndrimet e tyre, qeveria në Madrid shpreson se lëvizja për pavarësi po venitet, thotë zoti Cornago.

“Kishte një lloj ndjesie se kjo ishte diçka e përkohshme, se kur kriza ekonomike do të përfundonte dhe do të fillonim rritjen ekonomike, kur faktorët makroekonomikë të ishin më pozitivë, e gjithë kjo lëvizje që ishte një lloj rebelimi kundër institucioneve do të venitej. Por mendoj se kjo lëvizje ka rrënjë që ndoshta do të qëndrojnë me ne për një farë kohe”, thotë blogeri Loius Cornago.

Nuk është e qartë se kur kryetari i parlamentit do të thërrasë një seancë të re votimi. Tani për tani, ngërçi mes Barcelonës dhe Madridit duket se po thellohet.