Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Si e sulmuam gjermanin Krichbaum, si shqiptarë apo si europianë?

Politiko 23 Prill 2018, 16:36

Si e sulmuam gjermanin Krichbaum, si shqiptarë apo si europianë?

Alfred Lela

Daily Mail, një tabloid britanik, në vitin 2016 e pat quajtur 'qen sulmi' të Angela Merkel deputetin kristian-demokrat gjerman, Gunther Krichbaum. Deklarata e gjermanit që 'nxehu' pasionet nacionaliste të britanikëve të Mail-it, i përmbahej mendimit se "nëse Britania largohej nga BE nuk do mund t'ia dilte më vete".

Megjithatë, e përditshmja britanike nuk harronte ta konsideronte Krichbaum si politikan prominent (i rëndësishëm). Këtë status të tij e theksojnë edhe disa dekorata të marra nga shtete europiane si Austria, Holanda dhe Rumania, ndër të cilat edhe një Legion d'honneur nga Franca.

Në Shqipëri, z. Krichbaum u bë kontroversial (kundërthënës) fundjavën që shkoi, kur mediat proqeveritare shpërndanë një tekst i cili u përsërit pa ndryshime në disa sosh, çka dëfton se është shkruar nga e njëjta dorë në 'kabinetin' e propagandës së kryeministrit Rama.

Në këtë 'tekst me porosi', deputeti gjerman i partisë së Merkelit konsiderohej 'i paguar nga Basha' dhe në 'borderonë e Putinit'. Nuk është më shumë se pjesë e kronikës të thuhet se reagimi i Bashës dhe i opozitës ka qenë i menjëhershëm.

Nuk është ky thelbi, i cili qëndron te padurimi politik në Tiranë për të konsideruar si armik, të shitur, tradhtar dhe diversant çdo politikan dhe diplomat të huaj që është kritik me mënyrën si shkojnë punët në mëhallën tonë ballkanike.

Krichbaum nuk është kritik i herës së parë. Ai e ka parë me të njëjtin skepticizëm hapjen e negociatave të Shqipërisë edhe në vitin 2016, duke përmendur drogën si pengesë. Edhe asokohe kryeministri Rama nuk e kurseu mllefin për politikanin e së djathtës gjermane, por fakti që sot shefit të qeverisë shqiptare i duhet të menxhojë, edhe ish-ministrin e tij të Brendshëm, edhe deputetin gjerman, tregon se Krichbaum ka patur të drejtë dy vjet më parë.

A ka të drejtë edhe tani?

Nëse duam ta zhveshim veten nga çdo status tjetër, dhe të përgjigjemi si shqiptarë, jo, nuk ka të drejtë. Nëse bëjmë të kundërtën, duke e veshur veten si gjermanë, holandezë, francezë apo europianë të tjerë, atëherë Krichbaum, po, ka të drejtë.

Ka edhe një alternativë të tretë. Trajtimi i kriticizmit apo skepticizmit (mosbesimit) të Gunther Krichbaum nga pozitat e ekspertit. Pra, renditja kronologjike dhe logjike e arsyeve se pse Shqipëria i plotëson kushtet për çeljen e negociatave, dhe ku është gabim politikani gjerman në argumenetet e tij.

Vetëm nëse tezat pro hapjes janë solide, atëherë kriticizmi i Krichbaum është i paguar nga Basha, nga Putini apo nga dreqi dhe i biri bashkë.

Në raportet e 'kabinetit' të Ramës, të paraqitura si lajme, binte në sy 'fake news' i fjalimit në çadër të Gunther Krichbaum. Nuk ka qenë në Çadër. (Nuk e di për ndonjë çadër kampingu në Pyllin e Zi në Gjermani).

Po aq bërtiste dhe 'lajmi' tjetër se ai ka qenë i përfshirë në trafik të fëmijëve rumunë. Ndoshta për këtë Bukureshti e paska dekoruar gjermanin 'për bashkëpunim në trafikimin e fëmijëve rumunë'.

Një tjetër 'lajm qeveritar' për Krichbaum ka të bëjë me jetën personale. "Ai la gruan e një jetë të tërë", raportonin mediat e 'Papa don't preach', a thua se nuk e shesin libertinizmin martesor të shefit të tyre si gjënë më moderne që ka parë Shqiëpria. E dyta pas atleteve 'Adidas' që 'janë bërë modë edhe në Hollivud', thonë skupicat.

Në shumë prej lajmeve të shpërhapura, apo të paguara, nga zyrat e qeverisë, ajo që ndodh më shumë se çdo gjë, dhe është më e rënda, është cënimi i dinjitetit njerëzor të deputetit gjerman. Dinjiteti i njeriut është një prej vlerave themelore europiane.

E shihni pra, se nuk i kemi plotësuar kriteret për hapjen e negociatave? Në letër dhe as në mendje.