Tensioni te Astiri, Avokati i Popullit apelon autoritetet: Mos tejkaloni me anë të zellit të pajustifikuar detyrën tuaj

Avokati i Popullit ka bërë thirrje që të ndalet konflikti në terren në zonën e Astirit, pas situatës së mëngjesit të sotëm ku banorët janë përplasur me policinë.

Në këtë situatë, Avokati i Popullit sqaron se prej një muaji ka dërguar në Kuvendin e Shqipërisë një raport të veçantë mbi çështjen e Astirit dhe ende është në pritje të përgjigjes, ndaj bën thirrje për vetëpërmbajtje, maturi, si dhe për garantimin e plotë të të drejtës së Mbrojtësve të të Drejtave të Njeriut për të kryer detyrën e tyre.

“Avokati i Popullit tërheq vëmendjen e autoriteteve shtetërore që të mënjanojnë konfliktin me qytetarët, të mos zbatojnë politikën e faktit të kryer e të mos e tejkalojnë me anë të zellit të pajustifikuar detyrën e tyre, sidomos në kushtet kur çështja për të cilën ka lindur ky konflikt nuk është sqaruar”, shkruan AP.