Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Desktop - General - 1

KRYESORE

'Nderi i humbur' merret me celular në dorë

Politiko 31 Korrik 2017, 12:57

'Nderi i humbur' merret me celular në dorë

All - Paragraf - 1

Alfred Lela

All - Paragraf - 3

Të gjithë i futën hundët, gjuhët, duart dhe thikat në top story-n e javës që shkoi: gruaja, me burrin emigrant, shpirtërisht dhe seksualisht e vetmuar dhe frustruar, ndante shtratin me dashnorin, dhe në atë shtrat u kap.

Ndodhia bëhej, kinematografike për transgresivët dhe e pakonceptueshme për puritanët, kur ngrihej plotësisht perdja e skenës, në këtë rast çarçafi i shtratit dhe nën të shfaqeshin, jo vetëm dashnori kokë e këmbë (të kujt janë ato këmbë?), por edhe fëmijët e gruas tradhtare. Eshtë një skenë që dikush e pret prej Roman Polanskit apo Lars von Trier. Por, në fshatrat e Malësisë së Madhe, një nënë e re që ndan shtratin me dashnorin dhe fëmijët, është kapërcim i të gjitha hamendjeve erotike. Një revolucion seksual më vete nisur në malet e Shqipërisë. (Kot nuk thonë, se jeta ia kalon artit dhe teorisë). Që ç'ke me të!

Trauma në këtë ngjarje prek fëmijët dhe aspak shoqërinë, e cila, te traumat e të tjerëve gjen lubrifikantin që kondicionon dhe i bën të shtyshme ditët e veta, të cilat, përndryshe do të mbylleshin me selfie, thashetheme të vogla, foto të filtruara të vetes pa fotozheni, postime me suksese imagjinare, urrejtje për dikë që ke afër dhe dashuri për atë që ka larg, e me radhë.

Trauma e simuluar e shoqërisë shqiptare është neveria e vërtetë e top story-t të Koplikut. Protagonistët e saj, të rriturit, por edhe spektatorët, të rriturit e tjerë anekënd Shqipërisë, nuk kanë qenë tjetër në gjithë këtë veç prodhues të këtij perversioni. Duhet të presësh të kalojnë tri ditët për të kuptuar se cilat ekzigjenca (nevoja, dëshira apo kërkesa) e shtynë deri në sytë e njerëzve ngjarjen e Koplikut.

Filmimi i gruas së re në shtrat me dashnorin, është një operacion i pastër Pr-i (marrdhënie me publikun). Synimi i qartë: vrasja karakteriale, morale dhe publike e gruas, për të hequr çdo pretendim të saj të ardhëm mbi fëmijët, vendin e saj në familje, shoqëri etj. Gjakftohtësia e të shoqit, nga Amerika, për të urdhëruar filmimin e së shoqes dhe më pas vendimi i tij, apo kujtdo anëtari të familjes për ta bërë publike videon, nuk është hakmarrje e thjeshtë.

Ja si do të ishte zhvilluar ngjarja sipas 'epikës malësore': Një i afërm i të tradhtuarit do të ishte futur në dhomë me armë në dorë. Do të kishte ngritur mbulojat e 'flligshtisë martesore' dhe do t'i kishte 'qëndisur me plumba çarçafët e pajës'. Do të kishte 'rregulluar' kufomat duke u mbyllur sytë dhe do t'u çonte fjalë familjeve të prekura nga 'bëma e tij'. 'Vrasja për nder' dhe 'deka me turp', do të zgjidhej më pas në formën kanunore apo ligjore. Kjo formë e vjetër dhe transhendentale e shqiptarit të Veriut, do të kishte fituar, edhe pse Kanuni nuk do të ishte respektuar.

Ja si u zhvillua ngjarja: Kunata me kunatin hyjnë në dhomë. Në vend të armës kanë një telefon për të xhiruar skenën. Në vend të hakmarjes dhe tërbimit kanë një përllogaritje dhe qetësi të habitshme. Pyesin në fillim për sytjenta dhe më pas për këmbët (nuk pyet kush më për krena-as në Veri, mor burrë i dheut!). Vazhdon filmimi dhe biseda endet në ajrin e një negociate dhe të një hakërrimi.

Sa mirë që nuk ka ndodhur skena e parë e imagjinuar, por sa keq që ka ndodhur edhe e dyta. Kanuni është zëvendësuar me një Kod të ri ku rrinë bashkë manipulimi, marketingu, negociata dhe pandjeshmëria.

Pandjeshmëria ndaj fëmijëve, trauma që u shkaktohet atyre, i bashkon të dyja këto impostime sociale, të vjetrën me 'bashkëkohoren'.

'Fshati' i dikurshëm i Kanunit, që merrte pjesë në 'dbimin' e personit apo 'shtëpisë turpëruese', është zëvendësuar me 'fshatin global të komunikimit'. Tani, 'përzënia' bëhet me televizon dhe me pjesëmarrje të të gjitha fshatrave dhe qyteteve të të gjithë vendit. Bota e kthyer në 'fshat global' e ka nxjerrë dëbimin nga 'fshati i izoluar'. Tani të gjithë mund të bashkohemi në këtë 'luks' dhe të hedhim gurë në shpinën ikëse 'të turpëruarit' të radhës.

Vëreni sa zmadhohet dhe zvogëlohet në të njëjtën kohë 'fshati global' kur në prodhimin e top storyt- merr pjesë, me telefon dhe Western Union-i, edhe 'kozmopolitani' nga Amerika, burri i tradhtuar i gruas së kapur me dashnorin.

Ja pra, çfarë duhet për një operacion të suksesshëm marketingu: një ide, një pandjeshmëri, një telefon, një pikë Western Union-i dhe tabutë e simbolet e përhershme të njeriut. Me to, malësori në Detroit organizoi një 'puç shtrati' që i mundëson 'nderin e humbur, por të shpëtuar', linçimin e tradhtares, superioritetin në sytë e Kanunit dhe të ligjit për të fituar të drejtën e mbajtjes së fëmijëve, por edhe hapjen e rrugës për një grua të re në Amerikë.