Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Trojet shqiptare; ngjarjet më të rëndësishme të 2019

Politiko 1 Janar 2020, 08:00

Protesta, zgjedhje të parakohshme, vizita të rëndësishme të zyrtarëve të lartë amerikanë. Ky vit ka qenë mjaft i ngjeshur me zhvillime në rajon.

Politiko.al rendit disa nga zhvillimet më të rëndësishme që karakterizuan 2019-ën në Kosovë, Maqedoninë e Veriut, Malin e Zi dhe në Preshevë.

Kosovë:

14 janar: Institucionet arsimore hynë në grevë për tri javë pasi kërkonin të ngritet koeficienti për paga për 30 për qind.

14 shkurt – Pas një takimi midis Delegacionit Shtetëror për Dialogun me presidentin Hashim Thaçi, kryeparlamentarin Kadri Veseli dhe kryeministrin Ramush Haradinaj, u finalizua Platforma për Dialogun me Serbinë, e cila sipas palëve paraqet “unifikimin e qëndrimit të institucioneve dhe Delegacionit Shtetëror në raport me pozicionin e Kosovës në dialogun për njohje me Serbinë”.

9 prill – Kryeministri Haradinaj shkarkon ministrin e Administratës së Pushtetit Lokal nga komuniteti serb, Ivan Teodosijeviq, vendim i marrë pasi “Teodosijeviq kishte shprehur gjuhë të urrejtjes dhe ka fyer viktimat e Reçakut”.

20 prill – Riatdhesohen nga Siria në Kosovë 110 shtetas të Kosovës.

19 maj – Në katër komunat me shumicë serbe (Mitrovicë Veriore, Zubin Potok, Leposaviq dhe Zveçan) mbahen zgjedhjet e jashtëzakonshme, pasi kryetarët e katër komunave dhanë dorëheqje për shkak të tarifës 100 për qind të vendosur nga Qeveria e Kosovës për mallrat serbe.

11 qershor – Ish presidenti amerikan, Bill Clinton dhe ish-sekretarja e Shtetit, Madeline Albright, vizituan Kosovën në kuadër të 20-vjetorit të çlirimit të vendit.

19 korrik – Kryeministri Kosovës, Ramush Haradinaj dha dorëheqje për shkak se u thirr nga Gjykata Speciale në Hagë si i dyshuar për krime lufte.

26 gusht – Presidenti i Kosovës, Hashim Thaçi, pas dorëheqjes së Haradinajt shpalli 6 tetorin si datë për mbajtjen e zgjedhjeve të parakohshme parlamentare.

6 tetor – Mbahen zgjedhjet e jashtëzakonshme parlamentare në gjithë territorin e Kosovës, në të cilat parti fituese del Lëvizja Vetëvendosje (LV), e pasuar me një diferencë të ngushtë nga Lidhja Demokratike e Kosovës (LDK).

12 nëntor – Presidenti i Kosovës, Hashim Thaçi takon në Paris presidentin serb Aleksandar Vuçiç në kuadër të Forumit të Paqes së Parisit, forum i cili ishte inicuar nga presidenti i Francës, Emmanuel Macron, për të diskutuar ruajtjen dhe forcimin e paqes në botë.

26 nëntor – Me urdhër të presidentit të Kosovës, njësitë e Forcës së Sigurisë së Kosovës (FSK) u nisën në Shqipëri për të ndihmuar në zonat e dëmtuara nga tërmeti.

10 dhjetor – Kryetari i Kuvendit të Kosovës, Kadri Veseli, i përgjigjet thirrjes nga Gjykata Speciale në Hagë ku shkoi dhe u intervistua, duke e quajtur këtë si “moment vendimtar për të rikonfirmuar pastërtinë e luftës së popullit tonë, luftën e Ushtrisë Çlirimtare të Kosovës”.

Ngjarjet në Maqedoninë e Veriut

6 shkurt - Në selinë e NATO-s në Bruksel u nënshkrua Protokolli për pranimin e Maqedonisë së Veriut në Aleancë.

7 maj - Për herë të parë në historinë e Maqedonisë së Veriut, Papa Françesku vizitoi Shkupin gjatë të cilës takoi presidentin e atëhershëm, Gjorge Ivanov, kryeministrin Zoran Zaev ndërsa në meshën e mbajtur në sheshin “Maqedonia” dërgoi mesazhe të paqes dhe bashkëjetesës.

4 tetor - Sekretari i Shtetit i SHBA-ve, Mike Pompeo vizitoi Maqedoninë e Veriut, ku në qytetin e Ohrit takoi zyrtarët e shtetit. Pompeo ishte sekretari i parë amerikan që viziton vendin që nga viti 2001 dhe përshëndeti angazhimin e vendit për integrimet në Bashkimin Evropian (BE) dhe NATO.

17 tetor / 18 tetor - Këshilli i Çështjeve të Përgjithshme të BE-së, në një takim dy-ditor në Luksemburg mori vendim kundër fillimit të bisedimeve të anëtarësimit me Maqedoninë e Veriut dhe Shqipërinë për shkak të kundërshtimit të Francës.

19 tetor - Pas vendimit për mosfillimin e bisedimeve për anëtarësim në BE për Maqedoninë e Veriut, kryeministri Zoran Zaev propozoi mbajtjen e zgjedhjeve të parakohshme parlamentare, pas së cilës presidenti Stevo Pendarovski inicoi takim me liderët e partive politike, duke u pajtuar për mbajtjen e zgjedhjeve të parakohshme më 12 prill të vitit 2020.

10 nëntor - Kryeministri i Maqedonisë së Veriut, Zoran Zaev, kryeministri i Shqipërisë, Edi Rama dhe presidenti i Serbisë, Aleksandar Vuçiç, zhvilluan një takim rajonal në Ohër, iniciativën e ashtuquajtur “mini-Schengen”, për të diskutuar përmirësimin e bashkëpunimit rajonal dhe lëvizjen e lirë të njerëzve, mallrave dhe kapitalit.

20 nëntor - Kombëtarja e Maqedonisë së Veriut në futboll, si pjesë e Ligës së Kombeve të UEFA-s, arriti të renditet në krye të tabelës në Grupin 4, duke hapur rrugën për kualifikim në Kampionatin Evropian 2020.

Në Malin e Zi

1 mars: Mali i Zi miraton protokollin për pranimin e Maqedonisë së Veriut në NATO.

3 mars: Partitë politike shqiptare bashkohen në koalicionin “Malësia na Bashkon”, me kryetar Nik Gjeloshaj dhe fitojnë për herë të parë komunën e Tuzit.

9 maj: Gjykata në Podgoricë, shpall fajtorë dhe i dënoi më 69 vjet e shtatë muaj heqje lirie, 14 persona të akuzuar për një përpjekje për grusht shteti në prag të zgjedhjeve parlamentare të tetorit të vitit 2016, në Mal të Zi. Ata u akuzuan si nacionalistët serbë dhe rusë për komplot për të pushtuar parlamentin dhe për të vrarë kryeministrin e atëhershëm, Millo Gjukanoviç si dhe për të vendosur një udhëheqje pro-ruse në Mal të Zi.

7 Qershor: Ndeshja e futbollit Kosovë-Mali i Zi (1-1) shoqërohet me debate politike. Ndeshja u bojkotua nga përfaqësuesit e Malit të Zi me prejardhje serbe.

9 qershor: Presidenti Milo Gjukanoviç akuzon Kishën Ortodokse Serbe (KOS) se po përpiqet të ruajë infrastrukturën e Serbisë së madhe në Mal të Zi. Ai deklaronte se do ta ripërtërijë Kishën Ortodokse pa marrë parasysh nëse i pëlqen dikujt kjo ose jo.

24 korrik: Pas dy vitesh anëtarësimi, nënshkruhet deklarata për integrimin e plotë të Malit të Zi në NATO.

9 shtator: Përfaqësuesi i posaçëm i Shteteve të Bashkuara për Ballkanin Perëndimor, Mathhew Palmer vizitë në Podgoricë. Ai tha se Mali i Zi është shteti më i suksesshëm shumetnik në rajon dhe se "nuk është rastësi” që Mali i Zi është shteti i parë që ai viziton pas emërimit.

4 tetor: Mike Pompeo viziton Malin e Zi, si i pari sekretar amerikan i shtetit që kur ky vend shpalli pavarësinë 13 vjet më parë. Ai përshëndeti shtimin e kontributit të Podgoricës në misionin e NATO-s në Afganistan.

18 nëntor: Autritetet e Malit të Zi gjobisin ish sportistin shqiptar, Irfan Domnorin pasi valëviti në publik flamurin shqiptar gjatë festimeve në “ditën e gështenjës”, që mbahet tradicionalisht në Ostros të Krajës. Kjo ngjarje shkaktoi shumë debate dhe reagime.

23 nëntor: Qeveria miraton projektligjin për simbolet kombëtare, përfshirë edhe përdorimin e flamurit shqiptar lirshëm në publik.

Preshevë

6 janar: Liderët e Luginës i dërgojnë letër BE-së dhe Hashim Thaçit, pasi insistojnë të përfshihen në dialogun Kosovë – Serbi.

26 shkurt: Presidenti Hashim Thaçi tha se nëse marrëveshja me Serbinë nuk do të kalojë në Kuvendin e Kosovës, ai do të japë dorëheqjen, për ta dërguar atë në referendum.

9 Prill: Debate për heqjen e qytetarëve shqiptarë në regjistrin civil, nga ana e policisë serbe në Preshevë, Bujanoc e Medvegjë, nga përfaqësuesit politik dhe institucional

1 korrik: Projekt-rezolutë në Kuvendin e Kosovës që çështja e Luginës së Preshevës të bëhet pjesë e përhershme e bisedimeve mes Kosovës dhe Serbisë.

4 korrik: Gjatë një vizite në Luginën e Preshevës, Ligjvënësi amerikan Eliot Engel tha se është kundër idesë për shkëmbim territoresh dhe se sipas tij përpjekjet duhet të përqendrohen në arritjen e një paqeje afatgjate ndërmjet Kosovës dhe Serbisë.

26 gusht: Ana Bërnabiç dhe Zoran Zaev lëshuan në përdorim sistemin e përbashkët të kontrollit të kalimtarëve dhe mallrave në pikën kufitare Preshevë – Tabanoc. Që prej gushtit, kontrolli bëhet vetëm në pikën kufitare të Preshevës.

25 tetor: Një delegacion nga Lugina e Preshevës në Berlin për të lobuar te qeveria gjermane për përfshirjen e pakicës shqiptare në dialogun Kosovë-Serbi.