Foto & video / U hap Panairi i Librit

Nga Jona Kazani/Politiko

Panairi i 22-të i Librit “Tirana 2019”, u hap sot për të gjithë lexuesit, në ambientet e Pallatit të Kongreseve.

Për pesë ditë, 100 ekspozues, ndër të cilët botues, institucione kulturore, përfaqësues nga Shqipëria, Kosova, Maqedonia dhe Mali i Zi, do t’i prezantojnë lexuesve prurjet e fundit të librit.

Teksa ndodhemi në ditën e parë të këtij panairi të përvitshëm, atmosfera duket ende e vakët sa i përket numrit të vizitorëve dhe blerësve.

Edhe pse në numër të vogël, ka lexues që i përkasin moshave të ndryshme, duke filluar nga fëmijët e deri tek të moshuarit. Grupmosha që dominon është rinia, ku vihen re grupe nxënësish të shoqëruar nga mësues dhe studentë të shumtë.

Stendat nuk janë shumë të populluara, por interesi i lexuesve do të shihet edhe në ditët në vazhdim.

Kujtojmë se në konferencën e datës 11 nëntor, të zhvilluar në Pallatin e Kongreseve për Panairin e Librit “Tirana 2019”, u tha se sipas informacioneve nga libraritë, lexueshmëria e librit sa vjen dhe bie.

Panairi i 22-të i Librit do të vijojë të jetë i hapur deri në datën 17 nëntor 2019.