Ulet tensioni, Koreja e Veriut dhe ajo e Jugut në prag të bisedimeve për Lojërat Olimpike

Ministri koreano-jugor i Bashkimit tha sot se Seuli synon të takohet me diplomatë koreano-veriorë brenda një jave në fshatin Panmunjom që ndodhet në zonën e çmilitarizuar mes dy Koreve. Cho Myoung-gyon, Ministri Koreano-jugor i Bashkimit “Shpresojmë që përfaqësuesit e Koresë së Veriut dhe të Jugut do të ulen dhe do të diskutojnë hapur për pjesëmarrjen e sportistëve koreano-veriorë në Lojërat Olimpike të Piongçangut si dhe për përmirësimin e marrëdhënieve mes dy Koreve dhe çështje të tjera të interesit të përbashkët,” tha ministri. Seuli e bën këtë ofertë një ditë pasi udhëheqësi i Koresë së Veriut Kim Jong Un e shfrytëzoi fjalimin e Vitit të Ri për të deklaruar se po shqyrton mundësinë e dërgimit të një ekipi sportiv në Lojërat Olimpike. Presidenti i Koresë së Jugut e mirëpriti propozimin e Kim Jong Unit për të zhvilluar bisedime të hënën e ardhshme, por tha se përmirësimi i marrëdhënieve mes dy Koreve duhet të ecë paralelisht me braktisjen e programit bërthamor nga Pheniani.