Vetëm disa orë në Vjenë, Basha kthehet në Tiranë dhe mbledh Kryesinë e PD, ç’do të diskutohet

Ka zgjatur vetëm disa orë vizita e kreut të Partisë Demokratike, Lulzim Basha në Vjenë, ku zhvilloi një takim me përfaqësues të PPE-së në parlamentin e OSBE-së.

Mësohet se Basha kthehet po sot në Tiranë dhe pritet që të mbledhë Kryesinë e Partisë Demokratike.

Mësohet se  Kryesia do të mbahet pasdite në orën 18.00 dhe në fokus të diskutimit do të jenë hapat që do të ndërmarrë PD për vazhdimin e protestës.

Kujtojmë se një ditë më parë, Basha pasi firmosi aktin final të dorëzimit të mandateve parlamentare bashkë me opozitën e bashkuar, tha se pas Tiranës një valë protestash do të nisë në të gjithë vendin.

Takimi në Vjenë

Duke e cilësuar si shqetësuese situatën e krijuar në Shqipëri, grupi i PPE në OSBE bën të ditur se raportimi i kryetarit Basha ka patur në fokus protestat kundër qeverisë socialiste, korrupsionin, trafikun e drogës dhe zhvillimet jodemokratike në vend. Në këtë seancë të posaçme dëgjimore morën pjesë edhe anëtarë të Kongresit dhe Senatit amerikan.

“EPP ( The European People’s Party ) dhe grupi OSCEPA patëm një të ftuar special, Lulzim Basha i cili raportoi për situatën shqetësuese në Shqipëri, demonstratën kundër qeverisë socialiste, korrupsionin, trafikun e drogës dhe për zhvillimet demokratike”, shkruhet në faqen zyrtare të Twitter të OSCEPA.

Mësohet se gjatë qëndrimit disaorësh në Vjenë, Kreu i opozitës ka zhvilluar takime edhe me drejtues të tjerë të institucioneve ndërkombëtare.

Basha i ftuar special, nis takimet në Vjenë, raporton për situatën shqetësuese në Shqipëri