Video/ Tabaku nxjerr shifrat: Taksa e pronës, një nga format si po skllavërohen bizneset

Ish-deputetja e Partisë Demokratike, Jorida Tabaku thotë se sot ‘bizneset paguajnë më shumë taksa’. Me anë të një video, Tabaku tregon se si taksa e pronës është kthyer nga qeveria në një nga format për të vështirësuar bizneset në Shqipëri.

“Taksa e pronës është një nga format e reja të cilat qeveria po përdor për t’i vështirësuar punën bizneseve. Para disa ditësh një biznes në qytetin e Elbasanit më paraqiti disa fatura të pagesave të kryera nga ai në lidhje me taksën e pronës. Rezulton se biznesi ka paguar në vitin 2019 rreth 5000 lekë më shumë taksë për pronën se sa një vit më parë. Sipas të dhënave të QKR ky biznes është një sipërmarrje familjare e vogël. Ai futet në grupin e atyre bizneseve që kanë të punësuar 1 në 4 veta dhe që mban me bukë një familje. Të dhënat e INSTAT tregojnë se Elbasani është një nga qytetet më të varfëra në vend, ndërsa bizneset e vogla mbyllen për shkak të uljes së xhiros dhe rritjes së taksave”, shkruan Tabaku.

Demokratja akuzon qeverinë e Edi Rama se po skllavëron bizneset për t’i përdorur si mjet për të paguar PPP-të e oligarkëve.

“Qeveria i ka skllavëruar tanimë bizneset, i përdor ato si një mjet për të paguar PPP-të që u ka falur oligarkëve me kontrata të dyshimta. Kjo mazhorancë nuk beson tek sipërmarrja e lirë, nuk beson tek tregu i lirë. Ne duhet t’i japim fund skllavërimit të punës dhe skllavërimit të sipërmarrësve. Shqiptarët nuk janë skllevërit e oligarkëve dhe as të mazhorancës së krimit. Jam e sigurtë që ka prova të tjera të shumta që dëshmojnë rritjen e taksës së pronës”, thotë Tabaku.