Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Xeni? Nuk kishit parë Olsin akoma...

Politiko 17 Mars 2017, 18:43

Alfred Lela

Shkëlzen Berisha, i biri i ish-kryeministrit Berisha, vazhdon të jetë personazh që thirret në skenë. Dhe këtu fillon paradoksi: ai mbetet djali i Berishës, por i ati nuk është më kryeministër i Shqipërisë. Berisha junior, si target, vazhdon, megjithatë, të jetë i preferuar, po aq sa kur i ati, një politikan i fortë, luftarak, kundërthënës dhe paradigmatik, e udhëhiqte Shqipërinë.

Pse kështu? Sepse, socialistët në pushtet, kanë dashur dhe duan ta përdorin Sali dhe Shkëlzen Berishën si scapegoat-s. Nuk jam duke e përdorur për vanitet fjalën e anglishtes por, sepse mendoj se e ilustron më mirë idenë që kam ndërmend të parashtroj. Në mend kam bash një pasazh apso parabolë biblike, atë të 'një qingji të lëshuar në shkretëtirë pasi kryeprifti hebre i kishte kaluar mbi të, simbolikisht, mëkatet e njerëzve" (Lev. 16).

Në këtë kuptim, Shkëlzeni dhe i ati duhet të marrin, simbolikisht, 'mëkatet e njerëzve' (lexo të demokratëve si kundërshtarë politikë) në shkretëtirën e politikës shqiptare. Të kuptohemi: unë nuk mendoj se, Berisha dhe as i biri, janë 'biblikë' në kuptimin e pastërtisë që evokon parabola e përdorur këtu. Askush në politikë nuk është i tillë, aq më pak atë shqiptare. Berisha senior ka mëkatet e tij. I riu, sikur asnjë tjetër të mos kishte, i mjafton vaniteti i shpallur në formën e postimeve në Facebook që i shpallin një populli, 50 përqind e të cilit është i varfër, jetën luksoze të vetes dhe grave të tij.

Aq më pak parabola biblike është përdorur këtu për të ilustruar Berishën senior dhe junior si 'purifikues të demokratëve'. Jo, ata përdoren si 'qingjat simbolikë të katarsisit' apo 'deshër kurbani' (në shqip) prej socialistëve dhe në favor të socialistëve. Me socialistë kupto: hierarakët e partisë dhe sejmenët e tyre.

Taulant Balla, deputet i PS, është përfaqësuesi tipik i një antiberishizmi që vazhdon edhe kur pushteti politik i Berishës është ndërprerë. Kurthi është i qartë: të mbajmë 'gogolin' e Berishës dhe të birit sa më gjatë në vëmendje të publikut, shpesh të paditur. Pandershmërisht, në këtë taktikë futen edhe tre njerëz, 'në punën e tyre', krejtësisht të papërzier, si vajza, dhëndrri e madje edhe e bija e tyre, e mbiquajtura 'supermbesa' (në fomë qesëndisëse nga shtypi i majtë). Se cili është ky kurth dhe pse është ngritur, duhet kërkuar te filozofia e shprehjes popullore shqiptare 'ma mbaj këtë kopil, sa ta thërras atë tjetrën kurvë".

'Kopili' në derën e qeverisjes së Ramës është i vëllai, Olsi. Flagranca e këtij dështimi të Edi Ramës për ta mbajtur 'familjen' jashtë zullumeve dhe përfoljes, është demonstruar në një rast të të fundit korruptiv, arrogant, nepotik, mujshar, të pabesë ndaj fondeve publike dhe demonstrativ në fuqinë e paanë të oligarkisë së vjetër komuniste të shndërruar në 'rilindje ekonomike'. Pikërisht në një koncesion për Mbikqyrjen e Lojrave të Fatit, i cili shënon një rast rekord të përfshirjes së disafishtë politiko-ekonomike të interesave oligarkike. Politiko.al, në një raportim të mëparshëm, i ka listuar katër konfliktet e interesit të demonstruara në këtë koncesion 30 vjeçar. Më flagranti ndër ta është përfshirja e vëllait të kryeministrit, Olsi Rama, në grupin e njerëzve që do të komandojnë këtë 'sipërmarrje hileqare'.

Linkun e shkrimit e gjeni këtu:

http://politiko.al/web/2017/03/13/skandali-koncesioni-mbikqyrjes-se-bixhozit-jepet-kompanive-te-bixhozit/

Xeni, që tashmë nuk është më emër apo person, por koncept parapolitik, mbahet kështu në qarkullim, diabolikisht për të mbuluar zullumet e "Familjes" së re, asaj Rama. Eshtë e tepërt që, katër vjet më vonë, vazhdojmë të dëgjojmë refrenin "Fajin e ka Saliu" dhe "Xeni, Xeni, Xeni...".

Kjo narkozë propagandistike mund t'i ketë zënë shumë, por jo të gjithë.

P.S. Politiko.al do të vazhdojë me investigimin e koncesionit të Mbikqyrjes së Lojrave të Fatit ku është i përfshirë Olsi Rama.