Flash News
Vendimi për çështjen e vulës, Bardhi: Gjykata e Lartë t’i japë fund absurdit, PD i përket anëtarëve të saj
Nasip Naço del nga SPAK: U pyeta për çështjen ÇEZ-DIA, kam folur me letra, jo me heshtje
Shtyhet sërish seanca për Berishën, shkak mungesa e prokurorëve
Investimi në Sazan/ Rama pyetet pse nuk shpall tender kombëtar: Do shqyrtojmë aplikimin
Paraqitet në SPAK, ish-ministri dhe deputeti socialist, Nasip Naço
Alfred Lela
Sot në Kuvend u debatua shumë, por nuk mbeti asgjë. Përveç disa soundbite-ve apo disa grimasave. Mbeti për shembull stepja e kryeminsitrit kur i kaloi pranë deputeti demokrat E. Hasa që para pak javësh e lagu, jo me shampanjë, por me vezë; mbetën gishtat rreth hundës të ish-kryeministrit Berisha si reagim ndaj fjalimit të Ramës; mbeti 'rosaku me buzë' që bëri Rama gjatë një prej rikthimeve në panelin qeveritar përmbi deputetët.
Debati parlamentar në Shqipëri është kthyer në 'demokraci të soundbites'; të efekteve zanore dhe pamore që synojnë spektaklin, efektin dhe reagimin e aty-për-atyshëm.
Mbeti edhe më i lezetshmi ndër hamendësimet, shkëmbimi i mesazheve me nëntekst mes Ramës dhe Berishës. Të ka ardhur ai mesazhi, i pat thënë Rama paraardhësit gjatë seancës së kaluar. Ke marrë një mesazh në një takim në Berlin, ia ktheu më vonë Berisha. Sot, Rama u rikthye me një mjegull edhe më të dendur, atë të pamundësisë së Berishës 'për të kapërcyer oqeanin'.
Nënteksti i shkëmbimeve: ty ta kanë bërë benë gjermanët, ndërsa ty të kanë vënë ferrën te pragu amerikanët.
Amerikanët dhe gjermanët, të paktën nëpërmjet zgjatimeve mediatike zyrtare, Zërit të Amerikës dhe Dojçe Veles janë tashmë përtej efekteve të soundbite-ve. Të dy radiot që financohen me para publike dhe njihen si zë zyrtar i qeverive përkatëse, një përpjekje për të përhapur soft poëer-in (fuqinë e butë) e Uashingtonit dhe Berlinit, i kanë rënë një tjetër fyelli muajt e fundit.
Alarmi i mediave të dy demokracive të mëdha ka qenë i përzishëm. VOA ka qenë veçanërisht aktive duke e nisur me transmetimin e përgjimeve ku shfaqeshin eksponentë socialistë tek dhe bënin kërkesa dhe presione për emërime në administratën e burgjeve, për të arritur te një artikull i djeshëm, bashkëpunim me BIRN, ku rishfaqeshin sirena të cilave u ka rënë prej kohësh opozita politke në Tiranë, vjedhje dhe manipulimit të zgjedhjeve me dorën e elemenëtve të inkriminuar. Kryebashkiaku i Durrësit rishfaqej në 'dosjen 339' bashkë me Niçet e 'filozofisë së vjedhjes së zgjedhjeve'.
Panorama e shkrimit të gjatë mund të përmblidhej në esencën 'zgjedhjet janë marrë peng'. Përfundim i cili nuk ka shpjegim tjetër logjik përveçse pa zgjedhje të çliruara, të drejta, të hapura, të ndershme dhe konkurente nuk mund të ketë qeverisje, sepse nuk ka përgjegjësi, sepse nuk ka llogaridhënie.
Ky është debati që duhet të kumbonte të enjten në Kuvend.
Duke e kapur nga bishti, siç e bën zakonisht me gjërat e mëdha dhe të rëndësishme, kryeministri u ngut, për herë të dytë, ta etiketojë 'kazan' Zërin e Amerikës. Në përpjekje për ta zhurmuar me soundbite jehonën e asaj katedraleje të madhe që janë zgjedhjet e lira sipas konceptit amerikan.
Rama e di tashmë se Luftën e Ftohtë në fund e fiton Zëri i Amerikës; edhe sikur ai të ishte Brezhnjevi apo Gorbaçovi.
Debati nuk u dëgjua në lartësinë e nevojës kombëtare, megjithatë. Ai ra në ultësirat e veshëve që nginjen me tallava dhe gallatë politike.
Politiko.al