Kërkoi shpalljen zgjedhjeve në Tiranë, cilën pikë të Kushtetutës shkeli Rama

 

Një ditë pasi Erion Veliaj kundërshtoi në Gjykatën Kushtetuese shkarkimin si kryetar bashkie i Tiranës nga Këshilli i Ministrave, qeveria ka injoruar mekanizmat ligjor dhe sot më 30 shtator ka njoftuar zyrtarisht Presidentin Bajram Begaj për vakancën në Bashkinë e Tiranës.

Këshilli i Ministrave me firmë të sekretarit Engjëll Agaçi, njoftoi kreun e shtetit edhe për vakancat edhe në 5 bashkitë e tjera të vendit, Vlora, Berati, Mati, Cerriku dhe Tepelena.

Por sa e ligjshme është kjo e lëvizje e qeverisë? 

Ekspertët kanë deklaruar këto ditë se sipas nenit 115 të Kushtetutës, në kushtet kur Veliaj ka ankimuar shkarkimin brenda afatit 15 ditor që i përcakton ligji, automatikisht vendimi i Këshillit të Ministrave pezullohet deri në një vendim të Gjykatës Kushtetuese mbi ankimin e Veliajt.

Neni 115

1.  Organi  i  zgjedhur  drejtpërdrejt  i  njësisë  qeverisëse  vendore  mund  të  shpërndahet  ose  të  shkarkohet nga Këshilli i Ministrave për shkelje të rënda të Kushtetutës ose të ligjeve ;

2.Organi i  shpërndarë  ose  i  shkarkuar  mund  të  ankohet  në  Gjykatën  Kushtetuese  brenda 15 ditëve, dhe në këtë rast vendimi i Këshillit të Ministrave pezullohet;

3.Në rastin e mosushtrimit të së drejtës së ankimit brenda 15 ditëve, ose në rastin e lënies në fuqi të vendimit  të  Këshillit  të  Ministrave  nga  Gjykata  Kushtetuese,  Presidenti  i  Republikës cakton datën e zgjedhjeve në njësinë vendore përkatëse”

Po ashtu, bllokohet edhe mundësia e zgjedhjeve të parakohshme për bashkinë e Tiranës deri kur gjykata të dalë me një vendim.

Nga ana tjetër, edhe Veliaj argumento në shkresën e ankimit se shkarkimi i tij është bërë pa shkelje të rëndë të provuar, duke e konsideruar si të paligjshëm dhe antikushtetues.

“Neni 62 nuk mund të zëvendësojë nenin 115 të Kushtetutës, por interpretohet në pajtim me të. Shkarkimi pa shkelje të rëndë të provuar është i paligjshëm dhe antikushtetues. Kushtetuta mbi ligjin! Neni 115 është filtër i detyrueshëm për çdo shkarkim. Neni 62 i ligjit për qeverisjen vendore interpretohet vetëm brenda kornizës së nenit 115 të Kushtetutës”, thuhet në ankimimin e Veliajt.

Megjithatë, mbetet për t'u parë vendimi i Begajt në 48 orët e ardhshme, nëse do të dekretojë zgjedhjet në 6 bashkitë e vendit, apo vetëm në 5 bashkitë e tjera pa Tiranën.