Ku gaboi Arben Ahmetaj? Sinjalet që i dha Rama para se ta ‘zhveshë’ nga të gjitha postet në PS

Është cilësuar si krahu i djathtë i kryeministrit Edi Rama dhe njeriu i tre kabineteve, por nga dje Arben Ahmetaj nuk do të drejtojë asnjë post në PS, veç atij të deputetit.

Dje, pas mbledhjes së Kryesisë, Rama njoftoi se Ahmetj nuk do të jetë më drejtuesi politik i qarkut të Vlorës dhe në vend të tij caktoi Sekretarin e Përgjithshëm Blendi Klosi, dhe kjo duket të jetë edhe ‘shuplaka’ e fundit për njeriun e tij më të afërt.

I pyetur se ku gaboi, kryeministri Edi Rama është shprehur se zëvendësimi i Arben Ahmetaj me Blendi Klosin si drejtues qarku politik i Vlorës ishte një vendim që u mor për të riorganizuar, sipas tij, skuadrën që do punojë për zgjedhjet vendore.

Sinjalet e Ramës

Në fund të korrikut të këtij viti, Rama njoftoi shkarkimin e tij si zv.kryeministër dhe si ministër i Shtetit për Rindërtimin, duke e zëvendësuar me Belinda Ballukun, duke ndryshuar fokusin nga ‘rindërtimi’ tek energjetika dhe infrastruktura.

Gjithashtu, një tjetër sinjal i Ramës erdhi në prill të këtij viti, i cili e shmangu Ahmetajn nga Kongresi i PS. Atë ditë folën të gjithë ministrat e qeverisë, veç Ahmetajt dhe ky fakt nuk u kalua në heshjte nga media. Asokohe u komentua se mund të ketë lidhje me çeshtjen e ‘nxehtë’ të inceneratorëve.

Rama u pyet dje nga mediat edhe nëse me këtë lëvizje po paralajmëron hetim të Ahmetaj për inceneratorët.

“Këto janë ato përrallat, ju jeni në të drejtën tuaj të tregoni përralla duke përkuar pas çdo vendimi dhe hapi qëllime që nuk ekzistojnë”, tha Rama.

SPAK ka hapur disa nga petët e byrekut, ku në skenë janë Klodian Zoto dhe Mirel Mërtiri, të shpallur në kërkim.

Ndonëse pas shkarkimit të tij si zv.kryeministër u përfol se ishte i përfshirë në aferën e inceneratorëve, SPAK reagoi publikisht duke thënë se ish-zëvendës/kryeministrit nuk është regjistruar në asnjë vepër penale.

Megjithatë, pak ditë më parë, vetë kreu i SPAK, Arben Kraja ka bërë me dije se për aferën e inceneratorëve ka në hetim ministra e deputetë. Në një intervistë për RTSH Kraja është shprehur se hetimi i korrupsionit në nivele zyrtarësh është i vështirë, por pavarësisht kësaj, ai thotë se tashmë dosja është hapur dhe se hetimi është shtrirë deri në postet më të larta.

Deri më tani, Rama ka “shitur” shumë nga bashkëpunëtorët e tij, deputetë e ministra, kryebashkiakë apo kandidatë, dhe nuk është çudi që i shituri i radhës te jetë pikërisht Ahmetaj.  

Njeriu i tre kabineteve të qeverive socialiste

Ahmetaj është një emër i spikatur që ka arritur që të jetë pjesë e të tre kabineteve të qeverive socialiste.

Në mandatin e parë, ai shërbeu si Ministër i Zhvillimit Ekonomik, Turizmit, Tregtisë dhe Sipërmarrjes përgjatë periudhës shtator 2013- shkurt 2016. Nga shkurti i 2016 deri në janar të 2019, Ahmetajt iu besua një tjetër post me shumë rëndësi në qeveri, çelësat e financave të vendit.

Nga Dhjetori 2019 dhe në vazhdim Arben Ahmetaj mori një tjetër përgjegjësi duke drejtuar Ministrinë e Shtetit për Rindërtimin, pas një viti në drejtimin e Komisionit Parlamentar të Ekonomisë dhe Financave. Puna e bërë në procesin e rindërtimit, bëri që kryeministri Edi Rama ka vendoste në krahun e djathtë.

Ahmetaj ka qenë edhe drejtues politik i qarkut të Vlorës.