Një Avokat Populli pa konsensus, si u zgjodh Endrit Shabani me votat e PS

Në një seancë maratonë dhe të mbushur me debate politike, Kuvendi zgjodhi mbrëmë Endrit Shabanin si Avokatin e ri të Popullit me 85 vota pro.

Zgjedhja e tij u shoqërua me debate të forta dhe braktisja e sallës nga deputetët e opozitës. Madje, edhe pse në një orë të vonë, gjatë votimit, i pranishëm ishte edhe kryeministri Edi Rama, i cili tashmë ka filluar të shfaqet rrallë në seancat parlamentare. 

Procedurat
Ndërsa në rend dite ishte vendosur votimi për gjashtë kandidaturat e miratuara më herët në Komisionin e Ligjeve, Partia Demokratike kërkoi që pika të hiqej nga diskutimi, duke argumentuar se procedura ishte shkelur.

Opozita ngriti pretendimin se kandidaturat nuk kishin më mbështetje të vlefshme, pasi PD-ja kishte njoftuar zyrtarisht tërheqjen e firmave për të gjithë emrat, përfshirë edhe vetë Endrit Shabanin.

Por, mazhoranca e rrëzoi kërkesën, duke argumentuar se firmat ishin depozituar sipas rregullores dhe se tërheqja e tyre pas dorëzimit nuk kishte efekt për prishjen e procedurës.

Kështu, përplasja e vazhdueshme çoi në largimin e deputetëve të PD-së nga seanca, duke i hapur rrugë votimit pa praninë e tyre.

Endrit Shabani, figurë përçarjeje

Endri Shabani, ish-drejtues i lëvizjes qytetare “Nisma Thurje”, ishte ndër gjashtë kandidaturat e miratuara nga Komisioni i Ligjeve për t’u votuar në seancë. Fillimisht, ai kishte edhe firmat e deputetëve të opozitës, por më pas PD-ja i tërhoqi ato, duke argumentuar se procesi kishte devijuar nga konsensusi i kërkuar për këtë institucion.

Kreu i PD-së, Sali Berisha, akuzoi dje mazhorancën se kishte “paracaktuar fituesin” dhe se Komisioni i Ligjeve kishte lejuar kandidatura që, sipas tij, nuk kishin më mbështetje reale. Ai tha se Shabani kishte lidhje të afërta me kryeministrin Edi Rama dhe se mazhoranca kishte vepruar në mënyrë të njëanshme për të çuar përpara zgjedhjen e tij.

“Unë nuk them që nuk i mori firmat Endri Shabani. I mori në një periudhë kur ai mbështeti Florian Binajn, se nuk mund të them që nuk ishte një koalicion moral i plotë i të gjitha forcave politike.

Por pastaj dolën një seri problemesh që faktuan se ai që kishte atë fjalor si opozitar i opozitës, nuk ishte vetëm kaq, por ishte një person me lidhje kryekëput me Edi Ramën.

Grupi parlamentar i PD dërgoi një shkresë në Kuvend ku e informonte se tërhiqte çdo firmë për çdo kandidat.

Dhe këtë vendim të Komisionit të Ligjeve, në mënyrë të habitshme, e hodhi poshtë mazhoranca pa asnjë vendim, vetëm që të mos humbiste firmat për Endrin Shabanin,” u shpreh Berisha për mediat. 

Përballë këtyre akuzave, mazhoranca mbrojti qëndrimin se procesi ishte në përputhje me rregulloren dhe se Kuvendi duhej të mbyllte një herë e mirë vakumin e krijuar në institucion. Sipas tyre, PD-ja nuk mund të tërhiqte firmat në mënyrë retroaktive dhe prandaj kandidaturat mbeteshin të vlefshme.

Ndërkohë, Partia Socialiste zgjodhi të mos depozitonte asnjë kandidaturë zyrtare, duke e lënë qëllimisht situatën në dorë të opozitës. 

Zgjedhja e Shabanit vjen pas tre vitesh ngërçi, gjatë të cilëve institucioni drejtohej nga Erinda Ballanca përtej mandatit të saj, për shkak të mungesës së konsensusit mes palëve politike. S.GJ