Një “mal” me kallëzime në SPAK, skandalet ku është përfshirë Belinda Balluku, nga inceneratorët te tenderat korruptivë

Ndaj ministres së Infrastrukturës dhe Energjisë, Belinda Balluku është ngritur një “mal” kallëzimesh në SPAK për shpërdorim detyre dhe dyshime për korrupsion, duke përfshirë akuzat për shkelje të barazisë në tendera, favorizim të kompanive të caktuara dhe abuzime me koncesione publike.

Sot situata u intensifikua, pasi në media u përfol se Prokuroria e Posaçme regjistroi emrin e saj si person nën hetim për shkelje të barazisë në tendera dhe e ftoi të paraqitet të hënën në SPAK mbi bazën e një shkrese të firmosur nga prokurori i Posaçëm, Dritan Priençi.

Fletëthirrja i është dorëzuar në Ministrinë e Infrastrukturës dhe Energjisë, duke e vendosur Belinda Ballukun zyrtarisht përballë hetimeve dhe duke rikthyer në qendër të vëmendjes publike shqetësimet për ligjshmërinë dhe transparencën në menaxhimin e projekteve të infrastrukturës. Më poshtë, rendisim disa prej kallëzimeve më të bujshme ndër vite. 

Afera e Tunelit të Llogarasë

Në vitin 2024, grupi Parlamentar i Partisë Demokratike, përmes kryetarit të tij Gazment Bardhi, ka kallëzuar në SPAK zëvendëskryeministren dhe Ministren e Infrastrukturës e Energjisë Belinda Balluku, e cila në bashkëpunim dyshohet se ka kryer veprat penale të “Shkeljes së barazisë së pjesëmarrësve në tendera apo ankande publike” dhe “Korrupsionit pasiv të funksionarëve të lartë shtetërorë ose i të zgjedhurve vendorë”, të parashikuar nga nenet 258 dhe 260 të Kodit Penal.

Ky kallëzim ka lidhje me kosotot e fryra të ndërtimit të Tunelit të Llogarasë, ku dyshohet se vlera e tij u shtua më 30 milionë euro që i shkuan një kompanie turke, e cila nuk bëri asnjë punim.

Për koncesionin e portit të Vlorës

Në prill 2021, Partia Demokratike e Vlorës ka kallëzuar në SPAK ministren Balluku për koncesionin e Portit të Vlorës.

PD Vlorë, përmes një daljeje për shtyp bëri me dije se në këtë koncesion janë konstatuar shpërdorime të detyrë dhe shkelje të barazisë së pjesëmarrjes në tender.

Po ashtu, PD theksoi se kompania fituese e ka marrë tenderin me një vlerë shumë më të lartë se sa konkurentët e tjerë në garë.

PD shtonte se kjo diferencë monetare midis ofertave është e konsiderueshme duke shkaktuar një dëm të madh ekonomik fondeve publike të buxhetit të shtetit.

Rruga Korçë-Ersekë

Një tjetër padi ndaj ministres së Infastrukturës është bërë edhe për rrugën Korçë-Ersekë, për fryrjen e kostove nga 1 në 5 mln euro për kilometër.

“Nisma Thurje” ka kallëzuar në Prokurorinë e Posaçme Antikorrupsion (SPAK) ministren e Infrastrukturës, Belinda Balluku për proçedurën e dhënies me koncesion të portit të Vlorës dhe dhënien e truallit prej 57 mijë metra katrorë me qira 1 euro për kompleksin rezidencial Vlora Marina.

Pano Soko nga Nisma Thurje ngriti dyshime se procedurat e dhënies së koncesionit për portin Marina Vlorë nga ana e ministres infrastrukturës dhe energjisë, si dhe dhënia e 57 mijë metra katrorë truall në pronësi publike janë bërë në kundërshtim me ligjin, duke shkelur barazinë në tendera dhe ka dëmtuar interesat e shtetit.

Kërkesa për përqindje në tendera

Në shtator 2025, kryetari i Grupit Parlamentar të PD, Gazment Bardhi, ka ngritur akuza të forta nga zv.kryeministres Belinda Balluku, lidhur me një videoregjistrim, ku ajo kërkon një përqindje të madhe për një tender nga një biznesmen.

Në një reagim në rrjetet sociale, Bardhi ngrinte dyshimet se ky videoregjistrim, sipas tij, mund të jetë edhe arsyeja e shantazhit dhe sulmeve ndaj prokurorit të SPAK, Dritan Prençi.

Afera për koncesionin e Portit të Durrësit

Në mars 2021, PD paditi zv/kryeministren në SPAK për koncesionin e Portit të Durrësit. Balluku akuzohej për të paktën 6 vepra penale në lidhje me koncesionin 30 milionë euro të kalatës së Portit të Durrësit. Kalata iu dha me koncesion për 5 vjet një kompanie të rregjistruar në parajsë fiskale, në shkelje flagrante të kërkesave për tënderin.

Po për Portin e Durrësit, PD ka bërë një padi të dytë një vit më pas ndaj Ballukut, por edhe ndaj kryeministrit Edi Rama e Delina Ibrahimajt, si të implikuar në aferën e Portit të Durrësit.

Po për Portin e Durrësit, PD ka bërë një padi të dytë një vit më pas ndaj Ballukut, por edhe ndaj kryeministrit Edi Rama e Delina Ibrahimajt, si të implikuar në aferën e Portit të Durrësit. 

Ministrja me numrin rekord të drejtorëve në pranga 

Sakaq, Balluku është zyrtarja e lartë e cila ka numrin më të madhe të drejtorëve në hetim nga Prokuroria e Posaçme apo janë të arrestuar për korrupsion dhe abuzim në tendera. 

Kujtojme rastin e Ergys Verdhos, kreu i ARRSH dhe ish kreu i KESH , i cili përfundoi në pranga në muajin mars. Drejtori i ministres Balluku akuzohet për  “Korrupsion” dhe “Pastrim parash”.

Me dyshimet për të njëjtat vepra penale, nën arrest kanë përfunduar po ashtu dhe dy sipërmarrës, të lidhur me të, Valter Begaj, dhe Ervis Lamaj./S.Gj