Rama “fshin” Veliajn nga Tirana, inauguron projektin e tij pa e përmendur

Teksa kryetari i Bashkisë së Tiranës, Erion Veliaj, ndodhet në burg prej muajit shkurt të këtij viti, Kryeministri Edi Rama u shfaq të shtunën mbrëma në inaugurimin e instalacionit “Tirana Moons” në Sheshin “Nënë Tereza”.

Ky projekt, një oaz i dedikuar librit dhe arkitekturës moderne, u prezantua si një hapësirë e re publike për qytetarët, por në thelb, pas tij dulet se qëndron një histori e tensionuar mes dy figurave kryesore të mazhorancës.

Kryeministrit Rama gjatë ceremonisë e cilësoi instalacionin si një “oaz kushtuar librit” dhe foli për projekte të reja që priten në kryeqytet, pa bërë asnjë referencë për autorësinë e projektit.

“Besoj se është një oaz kushtuar librit që do të qëndrojë për një kohë këtu dhe do të lëvizë. Ne do të lëvizim në gjëra edhe më të mëdha. Po përgatisim një projekt shumë të bukur. Të shohim si do të dalë. Ka një gjë interesante, se sa herë ka arkitektë në Tiranë, Shqipëria luan një ndeshje futbolli. Faleminderit për librat. Është kaq mirë të kesh jo vetëm libra, por të dhuruar nga njerëz që duan të japin diçka për kënaqësinë e tyre. Janë gjendur mjeshtra të punimit të drurit. Është thjesht çka për kënaqësinë e tyre. Uroj që të vazhdojë edhe nesër kjo fundjavë kaq e veçantë”,-tha Rama

Pas ceremonisë reagoi Bashkia e Tiranës përmes rrjeteve sociale duke theksuar se “Tirana Moons”, vepër e arkitektit të njohur Chris Precht, është një projekt i prezantuar fillimisht nga vetë Veliaj gjatë mandatit të tij si kryebashkiak, por Rama nuk e përmendi asapk emrin e tij. 

Ky instalacion, që dikur ishte një projekt i krenarisë për Veliajn, sot inaugurohet pa praninë e tij, ndërsa Rama e përdor si platformë për të shpalosur vizionin e tij për Tiranën, në një kohë kur raportet mes tyre janë më të acaruara se kurrë.

Por ky nuk është rasti i parë kur Rama nuk e përmend Veliajn në inaugurime të projekteve të nisura prej tij.

Pak kohë më parë, Politiko.al solli rastin e projektit për Muzeun e Artit dhe Trashëgimisë Islame në ambientet e Sarajeve të Toptanëve në kryeqytet.

Kryeministri Edi Rama prezantoi projektin pa përmendur aspak kontributin e Erion Veliajt, ndonëse ky i fundit kishte qenë nismëtari dhe mbështetësi kryesor i tij gjatë kohës kur drejtonte Bashkinë e Tiranës.

Ky veprim u interpretua si një  sinjal i qartë i përpjekjes për ta "zhdukur" Veliajn nga trashëgimia institucionale e kryeqytetit.

Me "zhdukjen" e Veliajt nga skena politike dhe me kontrollin e projekteve dhe pushtetit lokal nga Rama, kreu i qeverisë po na tregon cdo ditë e më shumë se tashmë të gjitha pushtetet janë në një dorë të vetme./S. GJ