“Siguria, një nga hallkat e dobëta” – dje lavdëronte policinë, sot ngre alarmin: si ndryshoi narrativa e Ervin Hoxhës

Çfarë ndodhi?

Ish-ministri i Brendshëm Ervin Hoxha reagoi pas një aksidenti të rëndë në Durrës, ku një drejtues mjeti në gjendje të dehur dhe me shpejtësi në një rrugë lagjeje shkaktoi një ngjarje fatale.

Hoxha kërkoi ndërhyrje urgjente në rrugët e brendshme të lagjeve, duke i cilësuar ato si hapësira ku mungojnë standardet e sigurisë dhe kontrolli i vazhdueshëm policor.

“Mund të them se kemi disa problematika me të cilat përballemi sot; siguria mbetet një nga hallkat e dobëta që kërkon ndërhyrje të menjëhershme. Nuk mund të pranojmë që rrugët e brendshme të kthehen në hapësira të rrezikshme për jetën”, deklaroi ai.

Konteksti

Deklarata vjen pas aksidentit tragjik në Durrës, i cili ka rikthyer debatin mbi sigurinë rrugore në lagje, ku sipas vetë Hoxhës, problem mbetet mungesa e kontrollit dhe standardeve të qarkullimit. Ai pranoi se ndërhyrjet në rrugët kryesore kanë përparuar, por sipas tij, “brenda lagjeve situata mbetet e ekspozuar ndaj rrezikut”.

Në thelb, debati pas ngjarjes nuk lidhet vetëm me një aksident të izoluar, por me modelin e kontrollit të sigurisë, ku qarkullimi i automjeteve shpesh mbetet jashtë standardeve të unifikuara të policimit rrugor.

Çfarë thoshte Hoxha kur ishte ministër?

Gjatë kohës në detyrë, Hoxha mbante një linjë dukshëm më optimiste për gjendjen e sigurisë në vend.

Më 23 shtator 2024, gjatë një raportimi në Komisionin e Sigurisë, Hoxha teksa fliste për kriminalitetin në vend, vetëm luhatje të përkohshme, por theksonte se në bilancin 8-mujor “siguria ishte pothuajse në të njëjtat parametra me vitin e kaluar”.

“Rendi e siguria në vend në parametra shumë të mirë dhe krahasimin e bëjmë me vende e BE. Shqipëria edhe këtë vit ka pasur rritje të numrit të turistëve. E vërtetë që në gusht kishim një rritje të vrasjeve në krahasim me muajt e tjetër, por në statistikat e 8 mujorit, jemi pothuajse në të njëjta parametra sigurie me vitin e kaluar”, deklaronte Hoxha.

Në të njëjtën linjë, ai theksonte se Policia e Shtetit ishte një strukturë e konsoliduar dhe profesionale, duke e vendosur theksin tek modernizimi dhe rritja e besimit të qytetarëve.

Kontrasti i qëndrimeve

Ndryshimi në ton është i dukshëm: nga një periudhë kur siguria përshkruhej si “në parametra të mirë” dhe policia si “profesionale dhe e konsoliduar”, sot Hoxha flet për “mungesë kontrolli”, “rrugë të brendshme të rrezikshme” dhe nevojë për ndërhyrje urgjente.

Ky kontrast ngre pyetjen mbi vlerësimin real të situatës së sigurisë: a ka pasur një përkeqësim të shpejtë të situatës në terren, apo një ndryshim të optikës politike pas daljes nga detyra ekzekutive?

Ky ndryshim në diskurs vjen në një moment kur debati për sigurinë publike është rishfaqur, sidomos në zonat urbane, duke ngritur pyetje mbi efektivitetin e politikave të kontrollit rrugor dhe nivelin real të prezencës policore në terren.

Tragjedia në Durrës dhe debati për sigurinë

Ngjarja në Durrës, ku Nikoll Radacci përplasi për vdekje dy fëmijë, përkatësisht 10 dhe 12 vjecc teksa luanin para banesës, ka rikthyer debatin për sigurinë rrugore. Pikërisht mbi këtë rast, Hoxha sot kërkon masa më të forta kontrolli dhe standarde sigurie në brendësi të lagjeve, duke theksuar se këto hapësira nuk mund të mbeten jashtë vëmendjes së policisë./ Politiko.al