“Do vendos standardin”, ç'premtoi Klodian Braho para KLP dhe a do t’i mbajë ai në 3 vitet e ardhshme?

Në seancën dëgjimore para Këshillit të Lartë të Prokurorisë, Klodian Braho, tashmë i zgjedhur drejtues i ri i SPAK, paraqiti një platformë të detajuar mbi sfidat, standardet dhe drejtimin që synon t’i japë Prokurorisë së Posaçme gjatë tre viteve të mandatit të tij.

Ai iu përgjigj shumë pyetjeve, duke dhënë përgjigje të drejtpërdrejta. Por, a do t’i mbajë dot Braho këto premtime në realitetin kompleks të drejtësisë shqiptare?

“Prokurorët nuk bëjnë jetë normale
Që në nisje të fjalës së tij, Braho theksoi kufizimet që mbart puna e prokurorit, duke dhënë një shembull të thjeshtë se edhe para se të shkojnë në një lokal, prokurorët kontrollojnë në QKB se kujt i përket prona.

“Prokurorët s’mund të bëjnë jetë normale si të gjithë. Unë përpiqem të mos ndryshoj mënyrën time të jetesës, por duke respektuar kufizimet që sjell profesioni.” 

Standardet dhe pavarësia  
Në platformën e tij, Braho e përcaktoi qartë sfidën kryesore të SPAK: “SPAK duhet të jetë institucioni që i imponon njerëzve standard, që maturohet dhe kalon në pikën e pakthyeshme.”
Ai premtoi se pavarësia e prokurorëve do të jetë e patjetërsueshme, ndërsa çështjet me ndjeshmëri të lartë sipas tij  nuk duhet të përdoren kurrë si pretekst për destabilizim politik apo institucional.

Nga Kraja te Dumani, tiparet që do të marrë me vete në drejtim
Braho tregoi se cilat cilësi vlerëson nga dy drejtuesit e mëparshëm të SPAK:

Nga Altin Dumani proaktivitetin dhe vendosmërinë, kurse nga Arben Kraja qetësinë në kryerjen e detyrës. 
“Do merrja tiparet e mira të të dyve për të krijuar kombinimin më të mirë.”
Ai shtoi se si drejtues, tre cilësitë që do ta karakterizojnë janë: proaktiviteti, vendosmëria dhe standardi.

Presionet dhe mënyra e menaxhimit të tyre
I pyetur për presionet, Braho pranoi se ato kanë ekzistuar para dhe pas krijimit të SPAK por se gjithmonë ka ndjekur një parim të vetëm: “Çdo çështje e vështirë ka një zgjidhje të thjeshtë: të zbatosh ligjin.”
Kjo deklaratë tingëllon e fuqishme, por në tre vitet e ardhshme do duhet të matet me realitetin e një institucioni që godet fort korrupsionin në nivelet më të larta.

Pikat e forta dhe të dobëta  
Braho deklaroi se pika e tij më e fortë është eksperienca shumëvjeçare në hetimet e korrupsionit, ndërsa pika e dobët, sipas tij, është ekspozimi i madh publik. 

“As ne nuk kemi qenë të përgatitur për vëmendje publike. Kjo është një nga pikat e mia të dobëta.” 

Rformat që Braho synon të bëjë
Disa nga angazhimet më të rëndësishme të tij ishin krijimi i një njësie taktike brenda BKH, që të ekzekutojë masat e sigurisë pa varësi nga Policia e Shtetit.
Forcimi i kapaciteteve të përgjimeve dhe vëzhgimeve, të cilat sot janë të kufizuara.
Krijimi i një sektori të analizës së informacionit, që do të sistemojë të dhënat kriminale, matë riskun dhe prodhojë raporte strategjike.
Miratimi i një Kodi Etike për hetuesit e BKH, me procedime disiplinore për sjelljet joetike.

Premtimet mbi barazinë para ligjit 
Braho u ndal edhe te çështjet konkrete që ka hetuar ndër vite, duke përmendur konfiskimin historik të 18.4 milionë eurove, sa dyfishi i buxhetit vjetor të SPAK.

Premtimi i tij kryesor për tre vitet e ardhshme se çdo çështje korrupsioni dhe krimi i organizuar do të shoqërohet me hetim pasuror, barazia para ligjit do zbatohet pa përjashtime, do forcohet bashkëpunimi me partnerët ndërkombëtarë, do trajnohen hetuesit dhe prokurorët për standarde më të larta.

A do t’i mbajë Braho premtimet?
Klodian Braho hyri në SPAK që prej themelimit të institucionit dhe është një nga prokurorët me dosjet më të ngarkuar të çështjeve VIP, nga inceneratorët te 5D, Toyota Auris, Gërdeci, Llalla dhe aferat me ndjeshmëri të lartë politike.

Tre vitet e mandatit do të tregojnë nëse Klodian Braho do të jetë drejtuesi që i çon hetimet e korrupsionit në një nivel të pakthyeshëm, ashtu siç ai vetë deklaroi , apo nëse do përballet me të njëjtat pengesa që kanë shoqëruar drejtuesit e mëparshëm. Prandaj edhe koha do të jetë testi i tij kryesor.