Nga dosja 5D, inceneratori i Elbasanit te ish-ministrat e kryeprokurorët, ja dosjet e 'nxehta' të Klodian Brahos

Klodian Braho është zgjedhur sot kreu i ri i SPAK, pas më shumë se 17 vitesh karrierë të ndërtuar brenda sistemit të drejtësisë dhe një profili të lidhur ngushtë me hetimet e korrupsionit dhe krimit të organizuar.

Braho u emërua prokuror më 14 nëntor 2007, pasi përfundoi studimet në Fakultetin e Drejtësisë në Universitetin e Tiranës dhe u diplomua në Shkollën e Magjistraturës.

Karrierën e nisi në Prokurorinë e Beratit, ku shërbeu deri në vitin 2012, për të vijuar më pas në Prokurorinë e Vlorës, ku për një periudhë mbajti edhe detyrën e zëvendësdrejtuesit të institucionit.

Në vitin 2015 u transferua në Prokurorinë për Krime të Rënda, ku u përfshi në hetime të çështjeve të veçanta me ndjeshmëri të lartë publike.

Me krijimin e SPAK në dhjetor 2019, pas konfirmimit të tij në detyrë nga Komisioni i Pavarur i Kualifikimit, Braho u bë pjesë e strukturës së re antikorrupsion.

Hetimet dhe çështjet e 'nxehta'
Gjatë karrierës së tij, Klodian Braho është vlerësuar si një nga prokurorët më aktivë në ekspozimin e aferave të korrupsionit me zyrtarë të lartë dhe dosjeve të krimit të organizuar.

Ai është aktualisht shef i seksionit kundër korrupsionit në SPAK dhe ka udhëhequr një sërë hetimesh të rëndësishme si: 

Dosja e inceneratorit të Elbasanit, një nga hetimet më të bujshme të viteve të fundit, ku ka firmosur urdhër-arreste për Mirel Mërtirin, Stela Gugalljan, Klodian Zoton dhe ka ndarë pjesën hetimore që lidhet me ish-zv.kryeministrin Arben Ahmetaj.
Dosja 5D, çoi në gjyq edhe disa ish-drejtorë të Bashkisë së Tiranës.
“Toyota Auris”, një çështje komplekse me disa fraksione hetimore, ku përfshihen persona me lidhje në sistemin e drejtësisë.
Ai është gjithashtu pjesë e grupit të prokurorëve që firmosën dosjen e ish-ministrit të mbrojtjes Fatmir Mediu, i akuzuar për “shpërdorim detyre” në lidhje me tragjedinë e Gërdecit.
Më herët, ka hetuar edhe arrestimin e ish-kryeprokurorit të Vlorës dhe çështje të tjera të krimit të organizuar.
Në Krimet e Rënda, një prej dosjeve të rëndësishme të tij ishte ajo ndaj ish-kryeprokurorit Adriatik Llalla.

Braho është prokurori që firmosi arrestimin e ish-ministrit të Mjedisit Lefert Koka në vitet 2013-2017 për aferën korruptive të inceneratorëve.

Braho e kërkoi arrestimin e ish-ministrit të qeverisë “Rama 1” me tri akuza të forta nga “Korrupsioni”, “Pastrim i parave” dhe “Shpërdorimi i detyrës”, ndërsa hetimet vazhdojnë.
 
Braho u konfirmua në detyrë nga KPK në korrik 2019, çka i hapi rrugën emërimit në SPAK. Në vitin 2022 ai u kandidua për postin e drejtuesit të SPAK, por më vonë u tërhoq nga gara.

Ndërkohë, në mars 2023 dha dorëheqje nga një pjesë e hetimit për çështjen e inceneratorëve, pas pretendimeve të ngritura për mungesë transparence procedurale nga palë të përfshira.