Anatomia e plaçkitëses: Kur Arben Ahmetaj sinjalizonte hetimin e Belinda Ballukut...

Rrethi për Ramën po ngushtohet gjithnjë e më shumë. Të vetët, nga ministra, deputetë e kryebashkiakë, janë kthyer në ‘shokë qelie’, ku njëri pas tjetrit po bien në prangat e drejtësisë.

I njëjtë është edhe fati i Belinda Ballukut. Zv.kryeministrja ka marrë një fletë-thirrje nga Prokuroria e Posaçme e cila e ka regjistruar tashmë si person nën hetim. Pritet që Balluku të paraqitet në SPAK të hënën, e shoqëruar nga një avokat.

Hetimin ndaj saj duket se e paralajmëroi edhe Arben Ahmetaj, ish nr. 2 i qeverisë Rama, i cili pas shkarkimit me firmën e kryeminsitrit 3 vite më parë, u pasua nga Belinda Balluku.

Në një intervistë me gazetarin Çim Peka për Syri Tv, Ahmetaj foli nga Zvicra për aferat korruptive të qeverisë, duke u ndalur tek Balluku.

‘Plaçkitësja më e madhe e buxhetit të shtetit’

Duke iu referuar Ballukut, ish.zv-kryeministri e cilësoi si “plaçkitësen më të madhe të buxhetit të shtetit”, vjedhje që e përllogariti me një dëm “dyfish më të madh” se ai i tërmetit 2019.

“Më fal, se unë do t’i referohem edhe me shifra, por që nga koha e Ismail Qemalit, por jo atij virtualit që nxjerr kreu i organizatës, atij realit, Belinda Balluku është plaçkitësja më e madhe e buxhetit të shtetit. Më besoni, në përllogaritjet e mia, duke marrë referenca të drejtpërdrejta nga biznese sot, dhe ti e di mirë që unë jam bërë nukël informacioni, sot, dëmi që është shkaktuar nga Belinda Balluku në buxhet është dyfish më i madh se tërmeti i vitit 2019. Dëmi i vetë asaj, nuk po flas pastaj për dëmin e gjithë anëtarëve të tjerë, dëmi i vetë plaçkitëses, shkon dyfishi i tërmetit të 2019.”

‘Tenderat nën Ballukun u rritën me 11 miliardë lekë’

Aferat kapnin majat dhe sipas Ahmetajt, zv.kryeministrja aktuale ka bërë vjedhje masive aq sa ka rritur me 11 miliardë nivelin e tenderave. Ahmetaj theksoi se vetëm me tunelin e Llogarasë “, ka gëlltitur baras me dy inceneratorë të Fierit dhe të Elbasanit dhe baras me 15 shkolla të mëdha”.

“Vazhdon të mbajë rekord në historinë e Shqipërisë, e ka çuar me 11 miliardë nivelin e tenderave, më pas do t’ju tregoj edhe sukseset, se del në parlament dhe thotë kemi bërë shkolla, kemi bërë kopshte… Vetëm me tunelin e Llogarasë, që do ta them, ka gëlltitur baras me dy inceneratorë të Fierit dhe të Elbasanit dhe baras me 15 shkolla të mëdha, i ka gëlltitur plaçkitësja më e madhe, por do të kthehemi tek tuneli. Do bëj edhe ca pyetje që na çojnë në drejtimin e të vërtetës për të ndihmuar SPAK-un.”

‘Ka paguar njerëz për të protestuar kundër Veliajt’

Dikur ‘motër e vëlla’, Balluku – Veliaj u kthye shumë shpejt në një luftë të hapur për pushtet. Ndasia mes tyre nuk i shpëtoi lupës së mediave dhe as komentuesve në rrjet, mirëpo vetë Ahmetaj e përforcoi përçarjen brenda PS.

“Njerëz të saj kanë paguar njerëz për të shkuar në protestë. Ore shiko se kur të mbarosh këtë intervistën do ulesh me njerëz, kolegë të tu gazetar dhe do thonë, po ne i dimë këto o burrë, ca tha… thojini pra.”

‘Ministrja e 5B’

Ahmetaj e akuzoi Ballukun si emëruesen e 5 ministrave në qeveri, një prej të cilëve ishte edhe Pirro Vëngu i Mbrojtjes, me qëllim kryesor: plotësimin e zinxhirit të plaçkitjes.

“Sot po të shikosh nga ana e partisë, të shikosh qeverinë, sot qeveria është formati 5D i bashkisë së Tiranës, po nuk është 5D, është 5B. Plaçkitësja më e madhe në historinë e Shqipërisë të buxhetit të shtetit, ka emëruar 5 ministra, dy në bashkëpunim me eksponentët, 5 ministra për të plotësuar zinxhirin e plaçkitjes. Po me ca po merret Pirro Vëngu? Merret me pronat e ushtrisë. Ma tha njeri brenda Ministrisë së Mbrojtjes që ky njeri po vjen vetëm se është i zellshëm për të dorëzuar pronat. E keni parë narrativën, ka filluar të flitet për Porto Palermon, është ai masturbimi turistik që tha Quest-i, në DAVOS, shpresoj që ta kenë parë shqiptarët. Pra, nderuar z. Peka, 5B-ja, ministri i financave është marrë nga strukturat e ish-Ministrisë së Infrastrukturës, dakord, Ministri i Brendshëm është histori më vete, kapitull më vete që, 'for the record'. Kreu i organizatës, dikur, kur punonte si drejtor i hetimit tatimor e shkarkoi nga puna për korrupsion.”

Balluku, instrument i korrupsionit

Në vazhdën e akuzave, Ahmetaj i bëri Ballukun më së miri një portret të qartë të dorës së korrupsionit. E lidhur me mbylljen e njërit sy nga drejtësia, ish-zvkryeministri tha se frika nuk i lejon të bërtasin të vërtetën e Ballukut.

“Po. Ajo është instrumenti kryesor i korrupsionit. Është e pabesueshme, e paimagjinueshme. Të tjerët tashmë janë jashtë qeverisë. Disa prej tyre kanë frikë se mund të hiqen edhe nga lista e deputetëve. Të tjerë nuk janë më deputetë. Njëri prej tyre tani është drejtuesi politik i një qarku. Ai ka vendosur të heshtë. Ka bërë një kompromis me veten e tij, dhe unë nuk e gjykoj. Frika është penguesi kryesor. Dhe frikë për çfarë? Kryeministri përpiqet t’i verë në pozitë të pasigurtë për karrierën e tyre apo për sigurinë e tyre në të ardhmen, jo në kuptimin e sigurisë së jetës, por nga SPAK-u—kamxhiku në duart e Kryeministrit.”