Nga dështimi në shëndetësi tek rendi dhe siguria publike: Çfarë e pret Shqipërinë me Albana Koçiun?

Shqipëria është kthyer në një vend ku  bandat sundojnë çdo qoshe, droga është bërë ‘burimi jetës’ dhe rrjetet e  prostitucionit janë kudo, nga jugu deri në veri.

Trafikantët bëjnë ligjin edhe në zemër të Evropës, jo pak herë Shqipëria është shfaqur në mediat më të mëdha ndërkombëtare për këtë temë.

Çdo ditë kemi vrasje, plagosje, kush për pronën, kush për “pse më pe në sy”, kush nëpër shkolla, kush nga shpejtësia makabre, kush për vetëmbrojtje. Çdo ditë kemi abuzime, përdhunime, dhunë, braktisje.

Dhe më e rënda akoma, vrasje në sallë gjyqesh, sepse sistemi i sigurisë nuk është 0, po është minus.

Përballë këtij realiteti, kryeministri Edi Rama vendosi në Ministrinë e Brendshme, Albana Koçiun. Një ministre që di të shpërndajë formularë ndihme ekonomike, jo të komandojë operacione kundër krimit.

“Znj. Koçiu ka në tërësi një eksperiencë mbi 20-vjeçare në menaxhim, në pozicione drejtuese në administratën qendrore dhe vendore, me fokus të veçantë në fushën e menaxhimit të burimeve njerëzore, si dhe të shërbimeve sociale.

Znj. Koçiu ka përfunduar studimet e larta në Fakultetin e Shkencave Sociale (1996-2000), në Universitetin e Tiranës me arritje të  suksesshme duke u specializuar me një Master Shkencor mbi monitorimin e sistemit të shërbimeve sociale në Shqipëri (2005-2007). Ajo ka vazhduar duke dhënë kontributin e saj akademik si Profesor i Asociiuar që prej vitit 2010 deri në vitin 2022 pranë Departamentit të Shkencave Sociale në Universitetin e Tiranës.”, thuhet në jetëshkrimin e ministres tek faqja e kryeministrisë.

Kur Koçiu ishte ministre e Shëndetësisë, e gjithë vëmendja ishte tek mungesa e aparaturave, skandalet e onkologjikut dhe pacientët që prisnin me muaj për një trajtim bazik.

Kujtojmë që në qershor të 2024, Prokuroria e Tiranës zbuloi skemën e mashtrimit dhe zhvatjes së pacientëve të sëmurë me tumor në spitalin e Onkologjikut në QSUT.

 Ndërsa pacientët të diagnostikuar me tumor shkonin në spitalin shtetëror të Onkologjikut në QSUT, për të marrë shërbimin shëndetësor publik,  orientoheshin që shërbimet t'i merrnin në klinikën mjekësore “Megis” në pronësi të mjekut Edmond Gashi, që e kishte në zonën e Astirit  në Tiranë. 

Jo vetëm kaq.Telefonat e mjekëve dhe koordinatorëve të shërbimit kanë mbajtur në vëzhgim për një kohë të gjatë kanë rezultuar biseda e pazare të mirëfillta si në shitjen e medikamenteve citostatike me vlera të konsiderueshme që nxirreshin jashtë spitalit Onkologjik apo bliheshin me vlera të konsiderueshme për kimioterapi nga farmaci, si dhe tarifat që merreshin për ndërhyrje kirurgjikale.

Gjithashtu aparatura e vetme 'Kobalto Terapinë' e cila shërben për radioterapitë u la jashtë kushteve teknike me qëllim që pacientët të mos e merrnin shërbimin tek Onkologjiku por në klinika të tjera private, duke u kthyer në burim rreziku jo vetëm për mjekët që punonin por dhe pacientët.

Tani, si ministre e Brendshme, pyetja që ngrihet është e thjeshtë: çfarë do të bëjë me “sistemimin” e policisë, me krimin, bandat kur e ka pasur të vështirë të sistemojë një spital? Do të funksionojë me uniformat blu siç funksiononin aparaturat e onkologjikut?

Objektivat e Institucionit të Ministrisë së Brendshme janë:

1. Të sigurojë ruajtjen e rendit dhe sigurisë publike;

2. Të monitorojë dhe bashkëpunojë me institucionet e ngarkuara për zbatimin e masave në kuadër të luftës kundër trafikimit të qenieve njerëzore;

3. Të parandalojë dhe të mbrojë jetën e njerëzve dhe pronën nga rreziku i zjarrit dhe i fatkeqësive natyrore e fatkeqësive të tjera, në rastet e emergjencave civile;

4. Të organizojë  funksionimin e shërbimit të Gjendjes Civile, në Republikën e Shqipërisë;

5. Të bashkërendojë, nëpërmjet institucionit të prefektit, veprimtarinë e institucioneve qendrore në nivel vendor dhe funksionet e deleguara të tyre, me njësitë e qeverisjes vendore në komuna, bashki e qarqe;

6. Të krijojë kushte për garantimin e ushtrimit të së drejtës së votës dhe mundësive për funksionimin e plotë të organeve të zgjedhura vendore dhe qendrore, kontrollin e funksioneve të deleguar të pushtetit vendor, si dhe koordinimin e njësive të pushtetit vendor.

7. Të pajisë të gjithë shtetasit shqiptarë, personat pa shtetësi dhe shtetasit të huaj me qëndrim të përhershëm, brenda territorit të Republikës së Shqipërisë, me një dokument identifikues unik, me pasaportë, si dhe të përcaktojë kuptimin, mënyrën e formimit e të sferës së përdorimit të numrit personal;

8. Të hartojë politikat dhe planet strategjike përmes bashkërendimit, koordinimit dhe monitorimit të raportimeve në lidhje me dokumentet strategjike, duke përfshirë raportimet e BE-së, marrëveshjet ndërkombëtare, projektet si dhe hartimin dhe monitorimin e objektivave dhe prioriteteve të Ministrisë. / N.F