Pas vendimit 4 me 4 të Kushtetueses, çfarë pritet të ndodhë tani me Belinda Ballukun?

Vendimi i Gjykatës Kushtetuese për të mos i dhënë zgjidhje konfliktit të kompetencave mes qeverisë dhe GJKKO-së ka lënë në fuqi masën e pezullimit nga detyra për zv.kryeministren dhe ministren e Infrastrukturës dhe Energjisë, Belinda Balluku.

Gjyqtarët u ndanë 4 me 4, dhe kjo barazi, sipas ligjit e rrëzon automatikisht kërkesën, sepse asnjë palë, as kryeministri dhe as SPAK, nuk bindën dot të paktën 5 gjyqtarë rreth vetes.

Votimi 4 me 4

Gjyqtarë pro Ramës: Sonila Bejtja, Marjana Semini, Fjona Papajorgji dhe Sandër Beci. 
Gjyqtarë pro SPAK: Gent Ibrahimi, Asim Vokshi, Marsida Xhaferllari dhe Ilir Toska. 

Barazimi i votave 4 me 4 jo vetëm që nuk zgjidhi përplasjen institucionale, por e thelloi paqartësinë juridike dhe politike rreth një prej figurave më të rëndësishme të kabinetit qeveritar.

Mosplotësimi prej gati një viti e gjysmë i një vakance në Gjykatë Kushtetuese solli barazimin 4 me 4 për çështjen Balluku, që në vend që të zgjidhte ngatërroi më shumë politikën shqiptare dhe marrëdhënien ekzekutiv-gjyqësor.

Kjo ndodhi pasi prej shtatorit 2024 kur dha dorëheqjen ish gjyqtarja Elsa Toska vendi i saj mbetet bosh për shkak të procedurave të tejzgjatura.

Ç'do të thotë ky vendim
Me rrëzimin e vendimit të kryeministrit Edi Rama, efekti juridik është i menjëhershëm që vendimi i GJKKO-së për pezullimin e Ballukut nga detyra rikthehet në fuqi. Kjo do të thotë se ajo nuk mund të ushtrojë funksionet ministrore, pavarësisht se nuk është e shkarkuar dhe as e dënuar penalisht.

Në terma praktikë, një nga ministritë më strategjike të qeverisë mbetet pa drejtim të qartë, ndërsa vendimmarrja në sektorë si infrastruktura, energjia dhe projektet e mëdha publike rrezikon të ngadalësohet.

Ç'pritet të ndodh

Pas vendimit të Gjykatë Kushtetuese tashmë pritet të mblidhet Këshilli i Imunitetit dhe Mandateve për të vendosur mbi kërkesën e SPAK për heqjen e imunitetit ndaj Ballukut, por deri tani ende nuk ka një datë konkrete për mbledhjen.

Opozita nuk humbi kohë dhe fill pas vendimit kërkoi të thërrasë kryeparlamentari Niko Peleshi mbledhjen e  Këshillit të Imunitetit dhe Mandateve. 

Mbledhja e parë dhe e vetme e Këshillit të Mandateve u zhvillua në 19 dhjetor, dhe pavarësisht se SPAK nënvizoi se çdo vonesë dëmton hetimin, socialistët thanë se do të shpreheshin pasi të fliste Kushtetuesja.

Vetë  Rama ditën e djeshme deklaroi se do të vijonte beteja për këtë çështje. Ai tha se Shqipëria bëhet për herë të dytë në dy muaj shembulli i budallallëkut, pasi Gjykata u mbyt me lugën e ujit të saj.

Belinda Balluku është marrë e pandehur për tenderin e tunelit të Llogarasë, si dhe është në hetim për të 7 lotet e Unazës së Madhe, si dhe për të paktën 3 procedura të tjera tenderuese. /S.Gj