Vetëvendosja i kujton Ramës helikopterin: Kush loboi për Specialen?

Protesta në mbështetje të ish-liderëve të UÇK-së e cila do të mbahet të premten në Tiranë, ka shkaktuar një përplasje virtuale mes Lëvizjes Vetëvendosje të Albin Kurtit dhe kryeministrit Edi Rama.

Vetëvendosja, në një reagim në profilin e saj zyrtar, e akuzoi Ramën si lobues i Gjykatës Speciale që së pari, duhet të tregojë pendesë, dhe më pas të protestojë për UÇK-në.

“Para se të protestojnë, këta aktorë dhe politikanë duhet të tregojnë të paktën një minimum pendese për qëndrimet e tyre të gabuara në të kaluarën. Një shembull i qartë është vet Kryeministri aktual i Shqipërisë, Edi Rama, i cili madje kishte ardhur në Kosovë në vizitë emergjente me helikopter për të bindur palët këtu që të votonin pro themelimit të kësaj Gjykate”, shkroi Vetëvendosja në reagim.

Deklaratës së Vetëvendosjes i pasoi një reagim i frustruar i Ramës i cili sulmoi VV-në me argumentin se ai kishte protestuar më shumë për ish-presidentin Thaçi.

“Ndërkohë unë e kam denoncuar farsën ndaj Hashim Thaçit e të tjerëve kurdo e kudo ka qenë rasti a nevoja, ndërsa Lëvizja dihet se sa ka lëvizur në atë drejtim... më vjen keq që Lëvizja i ngatërron marrëdhëniet institucionale të Kosovës me Shqipërinë në çorbën e balotazheve komunale, ndërsa për qëndrimet e para 10 vjetëve - kur ajo nuk njihte as himnin e Kosovës e jo më pafajësinë e Hashim Thaçit...”, shkroi Rama në reagimin e tij.

Vizita me helikopter që përmend VV

Në vitin 2015, mediat raportuan për një udhëtim me helikopter të kryeministrit drejt Prishtinës, të cilën e përmendi edhe Vetëvendosja në reagimin e bërë sot. I shoqëruar asokohe nga ministri i Punëve të Jashtme, Ditmir Bushati, dhe nga drejtori i Zyrës për Komunikim, Endri Fuga, Rama mbërriti në Prishtinë në një vizitë që e raportoi si “koordinim i dy qeverive për Samitin e Vjenës”.

Por mediat, raportuan se kryeministrat dhe ministrat e pranishëm në takim, diskutuan për nevojën e formimit të Gjykatës Speciale për krimet e luftës.

Kryeministri i atëhershëm i Kosovës Isa Mustafa dhe zëvendëskryeministri Hashim Thaçi i thanë Ramës se janë në koordinim e sipër me të gjithë faktorët relevantë dhe se Gjykata do të miratohet së shpejti në Kuvend.

Deklaratat e Ramës për Gjykatën Speciale

Më 5 Nëntor 2020, Hashim Thaçi dha dorëheqjen nga posti i Presidentit të Kosovës përpara se të nisej për në Hagë. Po atë ditë, ai u transferua në qendrën e paraburgimit të Dhomave të Specializuara të Kosovës (KSC) në Hagë. Së bashku me të u arrestuan edhe ish-kryeparlamentari Kadri Veseli, ish-zëdhënësi i UÇK-së Jakup Krasniqi dhe ish-deputeti Rexhep Selimi.

Akti i akuzës ndaj tyre ishte konfirmuar pak javë më parë dhe i ngarkonte me krime lufte dhe krime kundër njerëzimit të supozuara gjatë luftës së Kosovës (1998–1999). Asokohe, pas aktakuzave të Hagës tha se akuzat nuk ndikojnë vetëm tek individët, por “hedhin baltë jo vetëm mbi Thaçin/Veselin, por mbi Kosovën dhe shqiptarizimin”.

Vite më vonë, Rama dënoi ndalimin që Haga i bëri Thaçit për të marrë pjesë në funeralin e të atit, duke e përshkruar këtë vendim si një akt të ulët dhe një tjetër provë të padrejtësisë që po bënte gjykata.

“Ky është një pengesë e re nga një gjykatë që ka humbur çdo besueshmëri, një institucion që është njëkohësisht i turpshëm dhe i paturp! E ka shndërruar drejtësinë ndërkombëtare në një farsë, të drejtat demokratike në fjalë pa vlerë dhe vullnetin e Parlamentit të Kosovës në një bumerang të dhunshëm!” , shkroi Rama në X.

I njohur gjërësisht si një diplomat që e prezanton veten ‘lider Ballkani’, Rama pasoi me një seri reagimesh ndaj Thaçit që e ka quajtur edhe më parë “vëlla”.

Në një intervistë televizive të këtij viti, Rama akuzoi qeverinë e Kosovës se nuk ka vullnet për të dalë me një rezolutë ndaj Gjykatës Speciale.“Nuk ka vullnet në Kosovë për të dalë me një rezolutë të Parlamentit të Kosovës, një rezolutë përtej partive politike të cilës ne do t’i bashkoheshim menjëherë ndaj Gjykatës Speciale dhe ndaj gjithë kësaj farse sepse ka shumë farsë në këtë mes”, deklaronte Rama.

Por, kryeministri harronte se vetë qeveria e tij ka rrëzuar disa herë rezolutën e propozuar nga opozita për të dënuar gjenocidin serb.

Protesta në Tiranë ndez debatet

Të premten në Sheshin "Skënderbej" do të mbahet një protestë në mbështetje të liderëve të UÇK-së që ndodhen në Hagë. Kjo protestës nxiti reagimet mes VV-së dhe Ramës. Ky i fundit madje ka deklaruar se nuk është organizatori i protestët, edhe pse e mbështet atë.

Protesta është mbështetur edhe nga Endrit Thaçi, djali i ish-presidentit Hashim Thaçi, i cili në llogarinë e tij në Instagram bëri thirrje për bashkim.

Kryebashkiaku i Prishtinës, Përparim Rama njoftoi se ka nënshkruar një shkresë, e cila mundëson transport falas për të gjithë veteranët e Ushtrisë Çlirimtare të Kosovës, që më 17 tetor do të protestojnë në Tiranë për burgosjen e Thaçit dhe të tjerëve.

“Sot kam nënshkruar vendimin për të siguruar transportin për veteranët e Ushtrisë Çlirimtare të Kosovës, që do të marrin pjesë në protestën gjithëkombëtare më 17 tetor në Tiranë”, njoftoi Përparim Rama.

Tre pyetje nga Vetëvendosja për Ramën

Zëdhënësi i Lëvizjes Vetëvendosje, Arlind Manxhuka përmes një postimi në “Facebook” ka replikuar me kryeministrit Rama. LVV ka ngritur disa pyetje për Ramën ndër të cilat, nëse ai ka mbështetur themelimin e Gjykatës Speciale.

1. Ka ardhur apo jo me helikopter në Kosovë për të bindur deputetët e Kuvendit të Kosovës që ta votojnë themelimin e Gjykatës Speciale? Pra, a e ka mbështetur dhe shtyrë ai themelimin e Gjykatës Speciale?

2. Cili ka qenë dhe vazhdon të jetë qëndrimi i LVV rreth Gjykatës Speciale? E ka votuar dhe mbështetur, apo e ka refuzuar dhe është përndjekur duke protestuar kundër themelimit të saj?

3. Në cilat raste dhe në cilat data, në cilat organizata ndërkombëtare ku Shqipëria është anëtare me të drejta të plota, apo pjesëmarrëse në takimet zyrtare, Rama ka ngritur shqetësimet e tij rreth padrejtësisë që po i bëhet Kosovës në Hagë?

Përplasja Rama-Kurti

Dyshja pësuan një krisje që erdhi fill pasi Rama prezantoi krah Aleksandër Vuçiçi, nismën e “Ballkanit të Hapur”. Kurti u pozicionua kundër nismës, gjë të cilën Rama e nënvlerësoi dhe filste vazhdimisht për bashkëpunim të suksesshëm mes tre vendeve anëtare (Shqipëri, Serbi dhe RMV).

Nisma e krijuar në Novi Sad e cila solli përçarjen e tyre, pasoi një seri reagimesh direkte dhe indirekte mes tyre, deklarata që haptazi tregonin ftohjen mes dy liderëve shqiptarë.

“Lidhur me nismën “Ballkani i Hapur”, kemi qasje dhe qëndrime të ndryshme, por duhet të kuptoni gjithashtu se mund të mos mendojmë gjithmonë njësoj për shumë gjëra, por kjo nuk do të na pengojë të bashkojmë përpjekjet për të bërë gjënë e duhur për të ardhmen e të dy vendeve”, tha Rama asokohe në në konferencë me Kurtin.

Kurti e kundërshtoi ashpër nismën “Ballkani i Hapur”, të promovuar nga Rama, Vuçiç dhe Zaev.

“Nuk mund të jemi pjesë e një iniciative që e udhëheq Serbia, një shtet që s’e njeh Kosovën. Edi Rama po i bën jehonë projekteve të Beogradit”, shprehej Kurti.

Në vitin 2021, Rama komentoi deklaratat e Kurtit për “Ballkanin e Hapur”, i cili e quajti këtë iniciativë pa vizion.

"Nuk dua të hyj në një polemikë me Albinin. Albini ka vizionin e tij. Unë dua më të mirën për Kosovën dhe nuk mund të mos them se qasja aktuale është një qasje e destinuar të dështojë dhe është një qasje që nuk po e çon askund Kosovën, përkundrazi, për disa vite e ka shndërruar Kosovën nga një forcë shumë pozitive dhe një partner shumë i besueshëm dhe shumë i dëshiruar i aleatëve shqiptarë në një problem të tyre. Dhe kjo nuk është një gjë pozitive”, deklaronte Rama.

Kurti ka akuzuar po ashtu Ramën se “po ndërhyn në punët e brendshme të Kosovës” dhe se po mban anë në politikën e brendshme kosovare, kryesisht në favor të Hashim Thaçit.

“Edi Rama po sillet sikur është kryeministër i shqiptarëve, jo i Shqipërisë. Kjo është arrogancë politike që dëmton raportet mes dy vendeve”, ka thënë ai.

Këto deklarata nxitën një marrëdhënie të ftohtë institucionale që solli pezullimin e mbledhjes së përbashkët të qeverive për tre vite. Komunikimi mes Ramës dhe Kurtit ishte minimal dhe shpesh me tone të ftohta. Vetëm në vitin 2023 u rikthye ideja e një takimi të përbashkët, por jo me të njëjtin intensitet si dikur. Takimi u mbajt në Gjakovë dhe pati theks simbolik, më shumë se praktik./ Kristina Tepexhiku