Rama për “Corriere della Sera”, sulmon protestën: Histeri digjitale, nuk më rrëzojnë megafonët

Edi Rama ka zgjedhur t’i përgjigjet protestave kundër projekteve në zonat e mbrojtura përmes një interviste për “Corriere della Sera”, ku e paraqet përplasjen jo vetëm si një debat për natyrën, por si një betejë mes qeverisë dhe asaj që ai e cilëson si “histeri digjitale”.

Sipas kryeministrit, shqiptarët po protestojnë kundër diçkaje që ende nuk ekziston.

“Nuk ka leje ndërtimi. Nuk ka kantier. Nuk ka një vendim përfundimtar mbi të cilin mund të thuhet: ndalojeni. Të kërkosh anulimin e një projekti që ende nuk ekziston në formën e tij përfundimtare është një kërkesë politike, jo një vendim qeveritar”, deklaroi ai.

Por përballë zemërimit të mijëra qytetarëve që kanë dalë në rrugë prej javësh, kryeministri këmbëngul se protesta nuk është më vetëm një çështje mjedisore, por është kthyer në një betejë politike kundër qeverisë së tij.

Duke folur për projektin e lidhur me familjen Trump, Rama tha se nuk do të ndikohet as nga presioni publik dhe as nga emri i investitorëve.

“Nuk kam frikë as nga administrata amerikane, as nga rrjetet sociale, as nga turma. Kam një përgjegjësi ndaj Shqipërisë. Kriteri do të jetë vetëm një: a plotëson projekti standardet ligjore, mjedisore, arkitekturore dhe strategjike që meriton Shqipëria europiane? Nëse po, vazhdon. Nëse jo, nuk vazhdon”, tha ai.

Kryeministri iu rikthye edhe përplasjeve verbale me protestuesit, por nuk bëri një tërheqje të plotë nga gjuha e përdorur ndaj tyre.

“Nëse ndonjë fjalë e imja ka lënduar njerëz të sinqertë që protestojnë për natyrën, them pa problem: më vjen keq. Por nuk pranoj të barazoj qytetarët e sinqertë me fabrikat e baltës, llogaritë anonime, shpifësit dhe prodhuesit e histerisë”, tha Rama.

Kryeministri pranoi se disa nga kritikat ndaj qeverisë lidhen me probleme reale, duke përmendur pensionet, shëndetësinë dhe pasigurinë juridike.

“Pensionet janë ende të ulëta. Shëndetësia ka plagë të hapura. Të rinjtë kërkojnë më shumë dhe kanë të drejtë”, tha Rama.

Për kërkesën e protestuesve për dorëheqjen e tij, Rama tha se në demokraci vendimin e marrin institucionet dhe qytetarët përmes votës.

“Dorëheqjet nuk i vendosin megafonët, por institucionet dhe qytetarët me votë. Kush mendon se duhet të iki, ka të drejtë të organizohet, të konkurrojë dhe të fitojë zgjedhjet”, u shpreh ai.

Ndërsa për ndikimin e protestave në procesin e integrimit europian, Rama tha se një shoqëri që proteston nuk është kërcënim për demokracinë.

“Një vend ku njerëzit protestojnë lirshëm është një vend demokratik, jo një vend i rrezikshëm. Ajo që do të dëmtonte procesin europian do të ishte zëvendësimi i shtetit të së drejtës me presionin e rrugës”, deklaroi Rama.