Hysni Gurra: Mediat tradicionale kanë humbur besimin e publikut, hapësira e mendimit të lirë është zhdukur

Gazetari Hysni Gurra ka folur për largimin e tij nga ekranet tradicionale dhe angazhimin në platformën YouTube, ku zhvillon intervista dhe biseda të pavarura.

Në podcastin “Elevate” të Floriana Garos, ai kritikoi gjendjen e mediave shqiptare, duketheksuar se prej dekadash riciklojnë të njëjtët personazhe dhe të njëjtën retorikë, duke humbur aftësinë për të sjellë ide të reja dhe debat autentik.

Ai tha se publiku është lodhur nga formatet e njohura televizive dhe përpjekjet për të tërhequr audiencë përmes përplasjeve artificiale në studio.

Gazetari theksoi se kanali i tij në YouTube nuk synon të konkurrojë mediat tradicionale, por të krijojë një hapësirë ku zëri t’u jepet njerëzve të zakonshëm, intelektualëve, gazetarëve dhe profesioneve të ndryshme, përfshirë fermerët, për të folur për problemet dhe realitetin e tyre.

Në intervistë, Gurra argumentoi se ashtu si Shqipëria ka një elitë politike që dominon prej 35 vitesh, ekziston edhe një elitë mediatike që funksionon në simbiozë me politikën. 

Sipas tij, një pjesë e medias ka kontribuar në krijimin dhe mbështetjen e realitetit politik e social të vendit, duke u kthyer në një “nomenklaturë paralele” të politikës.

Pjesë nga biseda:

Gurra: Ja se atë doja të shpjegoja, që pse është mërzitur media tradicionale njerëzve, po edhe neve që punojmë në këtë, në këtë sektor, që duhet të kemi informacion të përditësohemi. Ka 35 vjet që media jonë qarkullon të njëjtët njerëz, që përdorin të njëjtën retorikë, dhe gjithçka dihet. Në qoftë se më thua që është filani sonte në X studio, e di se çfarë do të thotë po më the temën. Pra nuk ka, nuk ka më gjëra të reja, nuk ka më surpriza. Ju e keni parë ata, fillojnë tani që në ekranet tradicionale i bëjnë edhe këto cicmicet, jo po zihen me njëri-tjetrin, e kupton, për të kapur ndonjë audiencë, ose ndonjë gjë. Sepse nuk, nuk i ndjekin më njerëzit edhe i kanë kuptuar njerëzit këto. Sigurisht, thashë edhe njëherë, unë nuk jam, ato nuk do zhduken, ato do vazhdojnë. Ne nuk kemi dalë për t'i sfiduar ato. Unë këtë kanalin tim për shembull nuk e quaj as podcast, as emision, ashtu. Unë e quaj bisedë me njerëz të zakonshëm, intelektual, gazetarë. Do marr edhe fermerë aty në bisedë. T'i pyesim, të kenë njerëz të jetës reale, t'i dimë çfarë bëjnë, çfarë hallesh kanë.

Garo: Ti thua që qarkullojnë të njëjtët njerëz, pse qarkullojnë të njëjtët njerëz?

Gurra: Sepse kemi ashtu siç kemi një elitë politike që sundon Shqipërinë prej 35 vitesh, kemi dhe një elitë. Kjo elitë nuk mund të mbijetojë dot në qoftë se nuk ka një pasqyrë ose një ekran ku të shpalosë programet e veta, propagandën e vet, që është media. Këto janë në simbiozë me njëra-tjetrën. Po këto, këtë dekadën e fundit u zhduk çdo hapësirë e mendimit të lirë dhe fjalës së lirë në media. Nuk ka më, nuk, nuk kemi më ne, presion ndaj gazetarëve, ose dhunë, ose ku di unë çfarë, shkatërrime, dështime emisionesh në kanale, këto. Thjesht i blejnë. I paguajnë, i blejnë, edhe kjo, unë e quaj nomenklatura mediatike. Ashtu siç kemi këto politike, siç kemi dhe këtë. Janë njerëz që i kanë shkaktuar dëme edhe këta Shqipërisë, jo drejtpërdrejt siç i ka shkaktuar politika, po themi e ka shpopulluar, e ka plaçkit, e ka... nuk i ka dhënë shërbime, nuk ka ndërtuar një jetë të jetueshme për qytetarët e zakonshëm në Shqipëri. Këta kanë ndikuar duke bërë fakt këtë realitet.

Garo: Pra ata i kanë dhënë krahun realitetit thellë që po tregon.

Gurra: Po sigurisht, po sigurisht është një nomenklaturë paralele që ka ndërtuar politika. Edhe për mua, unë mendoj që kjo ka një, duhet, duhet thënë kjo.

Garo: A mendon që publiku e di mirë këtë? Nuk po flas për publikun që ndjek gjithmonë programet politike në darkë, por një publik pak më i shkujdesur, po të themi që është rastësor.

Gurra: Tani, publiku është edukuar, pra publiku edukohet. Qëllimi i medias është ta edukojë publikun. Dhe kjo që thamë deri tani është se e ka edukuar në mënyrë të qëllimshme. Unë e përdor termat që themi unë, ka shpëlarë trurin, i ka bërë lavazh truri njerëzve. Por, siç po e shohim në ditët e fundit, ka një publik, ai publiku i shkujdesur që thoni ju, që ai nuk është publik që, që janë shpëlarë trutë, ose që është i painformuar, ose, po themi, një publik që ça të dëgjojë në televizor thotë e tha televizioni, edhe kështu është. Ky lloj publiku, si po ngrihet, që po dalin protesta? Po ngrihet nga rrjetet sociale, nuk po ngrihet nga mediat tradicionale. Pra sot ne kemi sheshet e Europës ku ka shqiptarë dhe sheshet e Tiranës e të Shqipërisë i kemi plot me të rinj dhe të reja profesionistë. Sigurisht, unë kam një mendim tjetër pastaj për të elaboruarim pak më vonë atë çështjen e kësaj, këtij revolucioni që i thonë këta revolucioni i flamingove. Por, këta njerëz kanë dalë falë medias së re, falë rrjeteve sociale, kështu u thirrën.