Peter Lucas: Pse Trump e ngatërroi Armeninë me Shqipërinë, vendin që po humb luftën me korrupsionin

nga Peter Lucas/ Boston Herald

Është e kuptueshme pse presidenti Donald Trump ka Shqipërinë në mendje.
Kjo sepse vajza e tij, Ivanka, dhe dhëndri, Jared Kushner, janë në prag të një fitimi të madh me një resort luksoz prej miliarda dollarësh në Ishullin e Sazanit, ngjitur me bregdetin shqiptar.

Trump ngatërroi Shqipërinë me Armeninë kur, gabimisht, në një intervistë me Mark Levin javën e kaluar, pohoi se kishte ndërmjetësuar një marrëveshje paqeje mes Azerbajxhanit dhe Shqipërisë, kur në fakt donte të thoshte Azerbajxhanit dhe Armenisë.

Armenia është një shtet pa dalje në det në rajonin e Kaukazit Jugor të Euroazisë, që kufizohet me Turqinë. Shqipëria, një vend socialist, ndodhet në Ballkan, kufizohet me Greqinë dhe ka një vijë të gjatë bregdetare përgjatë Detit Adriatik përballë Italisë.

Duke folur për sukseset e tij të ndërmjetësimit nëpër botë, Trump tha: “E patë Azerbajxhanin. Ishte një çështje e madhe që zgjaste për tridhjetë, tridhjetë e pesë vjet me, uh, Shqipërinë. Mendoni pak për këtë.”

“Dua të them, që zgjaste për vite me radhë, dhe unë njoha udhëheqësit, i njoha ata përmes tregtisë. Po merresha pak me ta, dhe thashë, ‘Pse po luftoni ju djema?’ Pastaj thashë, ‘Nuk do të bëj një marrëveshje tregtare nëse ju do të luftoni. Është marrëzi,’” tha Trump.

“Dy djemtë” ishin presidenti i Azerbajxhanit Ilham Aliyev dhe kryeministri armen Nikol Pashinyan. Është e kuptueshme nëse Trump nuk guxoi të rrezikonte të kujtonte, dhe të përmendte dhe ngatërrohej me emrat e tyre.

Por ai do ta kishte kujtuar emrin e kryeministrit socialist shqiptar Edi Rama, me të cilin Ivanka dhe Jared Kushner janë miqësuar, dhe i cili i hapi rrugën investimit Kushner/Trump.

Është një investim i ndërlikuar prej më shumë se 1.4 miliardë dollarësh. Ndërsa Shqipëria nuk ka qenë kurrë në luftë me Azerbajxhanin, ajo ka qenë në luftë me korrupsionin e brendshëm politik. Dhe po e humb.

Ndërsa turizmi për përfitime të shpejta po lulëzon përgjatë bregdetit, Tirana, kryeqyteti, është bërë një parajsë për pastrimin e parave të drogës.

Një ish-president i Shqipërisë, Ilir Meta, është në burg për akuza korrupsioni, ish-kryeministri Sali Berisha është në gjyq politik për korrupsion dhe Erion Veliaj, kryetari i Bashkisë së Tiranës dhe trashëgimtari i pritshëm i Ramës, është në burg duke pritur gjyqin për akuza pastrimi parash.

Vetëm dy vite më parë Charles McGonigal, një ish-zyrtar i lartë i kundërzbulimit të FBI-së, u dënua me më shumë se dy vite burg për fshehjen e rreth 225 mijë dollarëve para të pastruara që kishte marrë nga një ish-oficer i shërbimit sekret shqiptar, i cili dikur punonte për Ramën.

McGonigal raportohet se paralajmëroi Ramën kundër dhënies së një kontrate të majme për shpime nafte një kompanie ruse fasadë, në të cilën oficeri i shërbimit sekret kishte interes financiar. Si shenjë mirënjohjeje, McGonigal i dhuroi Ramës një kapele të FBI-së.

Nuk ka prova që Ivanka dhe Jared Kushner i kanë dhënë Ramës diçka gjatë takimeve të tyre, përveç urimeve të mira nga Trump, që mund të kenë mjaftuar për të fituar miratimin e Ramës për projektin.

Rama, i cili dikur e quajti Trump një turp, tani e lavdëron, duke thënë, pas rikthimit të Trump në Shtëpinë e Bardhë: “Ndoshta Zoti e shpëtoi Donald Trump jo vetëm për ta bërë Amerikën të madhe, por për ta zgjuar edhe Europën.”

Kushner, së bashku me partnerë nga Arabia Saudite, planifikon të ndërtojë një seri vilash luksoze në Ishullin e Sazanit, një ishull i pabanuar në Gjirin e Vlorës që ka pamje mbi Adriatik dhe Jon. Pamjet janë spektakolare.

Ishulli, të cilin vendasit tani e quajnë “Ishulli Trump,” ka qenë i ndaluar për publikun për vite me radhë. Dikur shërbente si bazë ushtarake italiane gjatë Luftës së Dytë Botërore. Më vonë u pushtua nga rusët gjatë Luftës së Ftohtë. Ka ndërtesa ushtarake të rrënuara gjithandej në ishull, si edhe pajisje të vjetra ushtarake të shpërndara.

Projekti u nxit më tej nga përfundimi i një aeroporti të ri vetëm pak milje larg, në Vlorë. Kjo do të thotë që të pasurit mund të fluturojnë brenda e jashtë në ishullin e tyre ekskluziv në Shqipëri pa takuar asnjë shqiptar, përveç pastrueses. Është socializmi shqiptar.

Nëse gjërat nuk funksionojnë, ata gjithmonë mund ta kthejnë ishullin në Alkatrazin e Shqipërisë. Edhe kjo do t’i pëlqente Trumpit.