Protesta në Tiranë merr përmasë ndërkombëtare, 5 kërkesat i përcillen ambasadave perëndimore

Një grup i organizuar protestuesish në Tiranë i ka dërguar një letër zyrtare ambasadorëve dhe shefave të misioneve diplomatike të vendeve perëndimore të akredituara në Shqipëri, duke paraqitur një platformë me pesë kërkesa kryesore drejtuar qeverisë dhe duke kërkuar mbështetje ndërkombëtare për zgjidhje të krizës politike që ata e konsiderojnë të thelluar.

Dokumenti, i nënshkruar nga “Grupi Koordinues i 27 protestave të zhvilluara deri më tani në Tiranë” siç përmendet në dokument, e cilëson situatën aktuale si një moment vendimtar për zhvillimin demokratik të vendit dhe thekson se lëvizja përfaqëson një mobilizim qytetar paqësor.

Në krye të kërkesave të paraqitura qëndron dorëheqja e kryeministrit dhe e Qeverisë aktuale, e konsideruar nga grupi si një hap “thelbësor dhe i panegociueshëm” për, siç thuhet në letër, “ripërtëritjen demokratike” të vendit.

Si alternativë, protestuesit kërkojnë krijimin e një qeverie tranzitore teknokrate dhe jopartiake me mandat 12-mujor. Sipas dokumentit, kjo qeveri do të kishte për detyrë mbikëqyrjen e një procesi reformash të besueshme dhe të paanshme, që do të synonin stabilizimin institucional dhe përgatitjen e kushteve për një fazë të re politike.

Një tjetër pikë e rëndësishme e platformës është kërkesa për një reformë të thellë kushtetuese, e cila duhet të mbështetet në parimin e barazisë së qytetarëve para ligjit dhe të miratohet përmes referendumit popullor.

Në këtë kuadër, grupi propozon:

• reformimin e Kodit Zgjedhor;
• ndryshimin e legjislacionit për financimin e partive politike dhe organizatave të shoqërisë civile;
• vendosjen e kufizimit të mandateve për postin e kryeministrit në maksimumi dy mandate, të plota ose të pjesshme.

Në letrën drejtuar diplomatëve kërkohet gjithashtu ndërhyrje e menjëhershme ligjore për shfuqizimin e një sërë aktesh ligjore, përfshirë:

• ndryshimet në Ligjin për Zonat e Mbrojtura;
• ndryshimet në Ligjin për Trashëgiminë Kulturore;
• paketën ligjore të njohur si “Paketa e Maleve”;
• kuadrin ligjor për Investimet Strategjike.

Sipas grupit, këto ndryshime duhet të rishikohen si pjesë e një procesi më të gjerë të korrigjimeve institucionale.

“Kontratë e re shoqërore”

Pika e fundit e platformës parashikon hartimin e një “kontrate të re shoqërore” mes qytetarëve dhe shtetit. Kjo, sipas dokumentit, duhet të realizohet përmes konsultimeve të gjera me ekspertë të pavarur, intelektualë dhe përfaqësues jopartiakë të shoqërisë civile.

Letra mban nënshkrimet e një grupi përfaqësuesish të protestës, mes të cilëve: Entela Koja, Arben Kola, Megan Balaj, Edviol Kulluri, Luçjana Kokaj, Gentjan Progni, Gjon Ndoj, Etleva Merko, Everest Bardhi, Përparim Gjeka, Mevlan Mata, Ilir Xhemalaj dhe Marjen Rama.

Sipas dokumentit, kjo nismë përbën “hapin e parë zyrtar” të organizimit të tyre dhe vjen pas 27 ditësh protestash të njëpasnjëshme në kryeqytet.

Në përmbyllje, grupi thekson se kërkesat e paraqitura përfaqësojnë vullnetin e një lëvizjeje qytetare paqësore dhe i bën thirrje komunitetit ndërkombëtar të mbështesë, sipas tyre, një zgjidhje demokratike dhe gjithëpërfshirëse të situatës politike në Shqipëri./AlbaniaPost