Bomba te "Albanian Files"/ Arkitekti i OMA-s: Rama të bëhet mbret, është më e lehtë për ne që të vazhdojmë punën

Akuzat se Edi Rama e ka kthyer Shqipërinë në një projekt personal, duke vizatuar një Shqipëri sipas dëshirës së tij, forcohet më shumë dhe nga një letër e publikuar në librin Albanian Files.

Arkitekti holandez Reinier de Graaf, një nga drejtuesit e studios OMA, (Office for Metropolitan Architecture) i shkruan kryeministrit se për arkitektët do të ishte më mirë që Shqipëria të mos zhvillonte më zgjedhje dhe ai të vijonte të qeveriste si "president i përjetshëm, ndoshta edhe mbret".

Në faqen 550 të librit, letra mban datën 3 mars 2025 dhe është shkruar nga Roterdami. Fillimisht, shkruan politiko.al, de Graaf shpreh vlerësime për transformimin e Shqipërisë, duke e cilësuar vendin si një model për bashkëjetesën, zhvillimin dhe arkitekturën.

Megjithatë, pjesa që ka tërhequr më shumë vëmendje është fundi i letrës, ku arkitekti, shkruan se për profesionin e arkitektëve do të ishte më mirë që zgjedhjet të anuloheshin  shkruan Politiko.

“Për ne arkitektët do të ishte më mirë nëse zgjedhjet e ardhshme thjesht do të anuloheshin. Do të shkoja edhe më tej.

Duke pasur parasysh statusin e Shqipërisë si një mbështetëse e arkitekturës, profesioni ynë do të përfitonte shumë nëse vendi nuk do të kishte më kurrë zgjedhje dhe nëse ju, pas mandatit të pestë si kryeministër, do të vazhdonit si president i përjetshëm – ndoshta edhe mbret”, thuhet në letër.

Më tej, de Graaf argumenton se në një botë ku autokracitë po fitojnë terren, ai do të preferonte “një autokrat dashamirës me shije”.

Letra është pjesë e librit Albanian Files dhe është botuar në faqen 550, ndërsa autori, Reinier de Graaf, është një nga figurat më të njohura të studios holandeze OMA, e themeluar nga arkitekti i njohur Rem Koolhaas. 

Po ashtu, në deklaratën e tij për mediat, kreu i Partisë Demokratike, Sali Berisha, publikoi atë që e cilësoi si prova për investimet në jug të vendit, duke thene se kryeministri Edi Rama ka projektuar përmes studiove arkitekturore 523 resorte, nga të cilat 53 janë në ndërtim dhe 47 të tjera presin miratimin e lejeve.

Sipas Berishës, për shumicën e këtyre projekteve nuk bëhen publikë zhvilluesit apo blerësit, ndërsa ai pretendoi se pas tyre fshihen persona me rekorde kriminale, duke përmendur emrat e Salvador Aliut dhe Franc Çopjës.

Kryedemokrati paraqiti edhe pamje të projektit që parashikohet të ndërtohet në Kanionin e Gjipesë, çështje për të cilën tha se ndodhet në një proces gjyqësor për shkak të deklaratave të mëparshme.

Berisha u bëri thirrje agjencive ndërkombëtare të zbatimit të ligjit të hetojnë transaksionet që lidhen me këto projekte, ndërsa pretendoi se të gjitha investimet janë të dokumentuara në një libër që, sipas tij, Edi Rama e ka mbajtur të fshehur nga publiku.

Duke iu referuar projektit në Gjipe dhe Livadh të Himarës, Berisha akuzoi kryeministrin për përvetësim të zonave më të lakmuara të bregdetit dhe tha se projektet luksoze po zhvillohen pa u bërë publik identiteti i zhvilluesve.