“Mesazhet e Ditës”, të gjithë i shkruajnë Taulant Ballës...

Kreu i Grupit Parlametar të Partisë Socialiste, Taulant Balla ka nisur një rubrikë të re në rrjetet sociale: publikimin e “mesazheve të ditës” nga qytetarë, emigrantë, turistë dhe mbështetës të qeverisë, të cilët gjoja ndjejnë nevojën t’i shkruajnë personalisht për t’i shprehur mirënjohjen për Edi Ramën dhe Partinë Socialiste.

Në një nga mesazhet e publikuara, një emigrant nga Puka që jeton në Mykonos i shkruan Ballës një tekst të gjatë ku lavdëron qeverinë për “Shqipërinë më të bukur, më të rregulluar dhe më të suksesshme ndër vite”, ndërsa shprehet edhe pro investimeve në Sazan dhe Zvërnec.

Në një tjetër rast, një i ri nga Kosova i tregon se ka blerë pronë në Shqipëri dhe se është i shqetësuar nga protestat kundër zhvillimit.

Ndërsa një tjetër mesazh vjen nga një person që prezantohet si luftëtar i UÇK-së dhe që përgëzon qeverinë për “maturinë” e saj përballë protestuesve.

Qytetarët: Kujt po i shesin këto histori?

Por në vend që të bindin publikun, këto mesazhe kanë prodhuar efektin e kundërt.

Shumë komentues kanë vënë në pikëpyetje autenticitetin e mesazheve, duke pyetur se si ka mundësi që kaq shumë njerëz të zakonshëm disponojnë numrin personal të Taulant Ballës dhe zgjedhin pikërisht atë për t'i rrëfyer emocionet e tyre politike.

"Beji pak më të besueshme këto mesazhe", "Si kaq veta ta paskan numrin dhe asnjë nga ne këtu?", apo "Të bëj unë ca SMS me ChatGPT që t’i kesh për vazhdim", janë vetëm disa nga komentet që kanë marrë vëmendje, shkruan Politiko.

Të tjerë kanë ironizuar hapur rubrikën e re të socialistit. "Postime për të rregulluar algoritmin", shkruan një komentues, duke lënë të kuptohet se pas këtyre publikimeve fshihet më shumë nevoja për të përmirësuar imazhin në rrjet sesa dëshira për të ndarë mesazhe reale nga qytetarët.

Nuk kanë munguar as komentet tallëse ndaj vetë Ballës. "O Taulant, po Trumpi çfarë SMS të dërgoi sot?", pyet një qytetar, ndërsa një tjetër shkruan: "Si kaq veta të kanë numrin, por asnjë nga ne?".

Një komentues tjetër shkon edhe më tej duke ironizuar mënyrën se si paraqiten këto mesazhe: "Në cilin dyqan i ke blerë ato syze me të cilat i sheh gjërat ndryshe nga sa i shohim ne të tjerët?".

Për shumë qytetarë, "mesazhet e ditës" nuk po shihen si dëshmi të mbështetjes popullore, por si një përpjekje e sforcuar për të krijuar përshtypjen se entuziazmi për qeverinë vazhdon i pandryshuar, pavarësisht kritikave dhe protestave të javëve të fundit.

Pas protestës, nis beteja për algoritmin

Nuk është rastësi që rubrika e re e Taulant Ballës me "mesazhet e ditës" po shfaqet pikërisht në kulmin e protestës kundër projekteve në Sazan dhe Zvërnec, e cila ka hyrë tashmë në ditën e saj të 25-të.

Teksa zemërimi qytetar vazhdon të prodhojë reagime dhe jehonë publike, drejtuesit socialistë duket se kanë zgjedhur një front tjetër beteje: rrjetet sociale.

Kjo situatë vjen në një moment kur kritikat nuk po vijnë më vetëm nga opozita dhe qytetaret. Zëra historikë të së majtës si Arta Dade dhe Arben Malaj kanë kërkuar reflektim publik. Ish-ministri i Jashtëm, Ditmir Bushati, e ka cilësuar atë që po ndodh me territorin si trajtim të atdheut si plaçkë tregu, ndërsa Elisa Spiropali ka folur hapur për nevojën e vetëpastrimit dhe heqjes së "ndryshkut" nga Partia Socialiste, shkruan Politiko.

Në këtë klimë, sipas raportimeve mediatike, edhe vetë Edi Rama duket se po ndjen mungesën e mbështetjes së zëshme nga figura të rëndësishme të partisë. Në mbledhjen e zgjeruar me qeverinë dhe grupin parlamentar në Pallatin e Brigadave, kryeministri thuhet se ka shprehur pakënaqësinë për heshtjen e shumë drejtuesve socialistë në rrjetet sociale.

Sipas burimeve Rama ka veçuar Taulant Ballën si të vetmin që po i qëndron publikisht në krah në këtë përballje, duke mbrojtur qeverinë dhe projektet e saj.

Ndoshta pikërisht këtu gjendet edhe shpjegimi i vërtetë për shpërthimin e papritur të "mesazheve të ditës". Teksa shumë figura të PS-së kanë zgjedhur heshtjen ose kanë shprehur rezerva, Balla ka marrë përsipër rolin e mbrojtësit më aktiv të qeverisë në rrjetet sociale./Politiko.al