A mund të vjedhin hakerat gjurmët e gishtërinjve nga fotot në rrjetet sociale?

Postimet në mediat sociale në javët e fundit kanë nxitur shqetësime se hakerat, me ndihmën e inteligjencës artificiale, mund të nxjerrin gjurmë gishtash nga fotot e njerëzve që tregojnë shenjën e paqes ose që mbajnë duart afër kamerës.

Ekspertët konfirmojnë se kjo është teknikisht e mundur, por theksojnë se rreziku për personin mesatar është shumë i ulët.

Debati u përhap pas një programi televiziv në Kinë, në të cilin një ekspert tregoi se si detajet e gjurmëve të gishtërinjve mund të nxirren nga fotografi me rezolucion të lartë të bëra nga afë.

Nëse dikush arrinte të rindërtonte gjurmën e gishtit, teorikisht mund të përpiqej ta përdorte atë për të aksesuar pajisje ose sisteme që përdorin autentifikimin biometrik.

Profesori i sigurisë kibernetike në Universitetin e Nju Jorkut, Justin Cappos, beson se një skenar i tillë është i pamundur.

"Ka më shumë gjasa të të përplasë një makinë nesër sesa të të vjedhë dikush gjurmët e gishtërinjve në këtë mënyrë gjatë jetës sate", tha ai.

Gjurmët e Ursula von der Leyen

Ekspertët kujtojnë se ka shembuj individualë. Në vitin 2014, një haker pretendoi se kishte arritur të rindërtonte gjurmën e gishtërinjve të Ministres së atëhershme të Mbrojtjes gjermane, Ursula von der Leyen, duke përdorur foto të bëra në një aktivitet publik. Në të njëjtin vit, studiuesit nga kompania e kriptovalutave Kraken arritën të krijonin një kopje të gjurmës së gishtërinjve duke përdorur fotografi, Photoshop, një printer dhe ngjitës.

Megjithatë, edhe nëse dikush do të merrte gjurmët e gishtave tuaj, abuzimi zakonisht do të kërkonte akses fizik në një pajisje ose skaner për zhbllokimin e gjurmëve të gishtave, siç është një laptop ose sistem sigurie, raporton CBS News.

Profesori Vyas Sekar (Vyas Sekar) nga Universiteti Carnegie Mellon thekson se një sulm i tillë do të kërkonte shumë përpjekje dhe ka shumë të ngjarë të synonte persona me interes të veçantë, domethënë ata që kanë qasje në të dhëna të ndjeshme ose objekte me siguri të lartë.

Kujdesi është i nevojshëm, por...

Për shumicën e përdoruesve, një kërcënim shumë më i madh janë mashtrimet me phishing, emailet e rreme dhe lidhjet keqdashëse që kriminelët përdorin për të vjedhur fjalëkalime dhe informacione personale.

"Nuk i shohim kriminelët kibernetikë që e përdorin këtë metodë në masë. Ndoshta situata do të ndryshojë pas dhjetë vitesh, por sot nuk është diçka për të cilën përdoruesit e zakonshëm duhet të shqetësohen", përfundoi Kapos.

Ndërsa ekspertët rekomandojnë kujdes kur ndani foto me rezolucion të lartë në internet, ata thonë se nuk ka nevojë të ndaloni së postuari selfie ose të fshehni duart në foto nga frika e vjedhjes së gjurmëve të gishtërinjve.