"Amendamentet e opozitës u miratuan", Bardhi-Ramës: Në Parlamentin Europian të shohin si "klloun të korruptuar"

Kreu i Grupit Parlamentar të Partisë Demokratike, Gazment Bardhi, ka reaguar i revoltuar ndaj kryeministrit Edi Rama, duke deklaruar se eurodeputetët në Komitetin Parlamentar të Stabilizim-Asociimit BE–Shqipëri kanë miratuar amendamentet e propozuara nga opozita, të cilat sipas tij ishin kundërshtuar nga Partia Socialiste.

Përmes një postimi në rrjetet sociale, Bardhi hodhi poshtë deklaratat e kryeministrit dhe e akuzoi atë për keqinformim, duke deklaruar se qëndrimi i eurodeputetëve ishte në favor të kërkesave të opozitës shqiptare.

Në reagimin e tij, Bardhi përdori edhe gjuhë të ashpër ndaj kreut të qeverisë, duke shkruar se në Parlamentin Europian Rama shihet si një "klloun i korruptuar" dhe "zar i krimit të organizuar".  

Postimi i plotë: 

 VLERËSIMI: ★✩✩✩✩

Kaq përgjigje meriton, se të ka dalë boja fare! Vështirë të të marrësh seriozisht. Kushdo në Parlamentin Europian të shihte si Klloun të korruptuar dhe zar të krimit të organizuar!

Gënjeshtrat e tua nuk i beson as vetë.

Po! Rruga që ke marrë është e pandalshme. Ti dhe Rilindja do të përfundoni në koshin e plehrave të historisë!

Sqarim për qytetarët:

Dikush ta njoftojë Edi Ramën se eurodeputetët në Komitetin Parlamentar të Stabilizim-Asociimit BE–Shqipëri miratuan të gjitha amendamentet e opozitës, të cilat PS i refuzoi.

Amendamentet e miratuara kërkonin:

* ndalimin e blerjes së votës, patronazhimit dhe keqpërdorimit të burimeve shtetërore;

* rezultate konkrete në luftën kundër korrupsionit dhe krimit të organizuar;

* respektimin e standardeve europiane për imunitetin parlamentar;

* mbrojtjen e pavarësisë së SPAK-ut dhe të drejtësisë;

* transparencë për PPP-të, koncesionet dhe investimet strategjike;

* mbrojtjen e pronës, zonave të mbrojtura dhe lirisë së medias.

Një lojë me letra bixhozi në një lokal të Strasburgut mund të jetë e vetmja dorë që fitoi delegacioni i PS-së. Sepse në tavolinën politike të Europës, eurodeputetët u bashkuan me opozitën për të miratuar amendamente që denoncojnë pikërisht modelin e qeverisjes së Edi Ramës: blerjen e votës, patronazhimin, korrupsionin, kapjen e shtetit, cenimin e pavarësisë së drejtësisë, PPP-të, koncesionet dhe investimet strategjike.