10 librat e Vitit të Monika Stafës

Monika Stafa është gazetare, përkthyese, autore librash dhe drejtuese e emisionit “Vitrina e Librit” në Top Channel

1.            Vajzat e Jaltës- Catherine Katz

Është një roman historik për të gjithë të apasionuarit në këtë gjini. Vajzat e liderëve më të mëdhenj që udhëhoqën Luftën e Dytë Botërore përmes penës së autores tregojnë se cilat janë prapaskenat e ngjarjes së Jaltës, konferencës që u mbajt menjëherë pas luftës. Ka dashuri, histori, politikë dhe intriga.

2.  Mossanga – Fate Velaj;

Romani është një zë i kohës, një vepër artistike, ku mes një morie ngjarjesh plot ritëm që shtrihen në një strukturë të mirëndërtuar lexuesi mëson se çfarë ishte e natyrshme në Shqipërinë socialiste. “Mossanga” cilësisht, bazohet mbi traditën e mirë të një letërsie tjetër, që sot në auolat mësimore dhe jo vetëm europiane po shërben edhe si një dëshmi e një kohe jo fort të largët. Epokës komuniste për të cilën sot ende shkruhet pak.

3.            Dëmi – Josephine Hart

është vlerësuar si një roman tronditës dhe i shkëlqyer, madje si një kryevepër e kohës. Romani është një rrëfim i guximshëm për rreziqet e obsesionit dhe se sa shkatërruese mund të jenë pasojat e tij duke na shpjeguar sesa e koklavituar është qenia njerëzore.

4.            Komploti- Ben Blushi

kur shkrimtarët paralajmërojnë, ata nuk i dëgjon njeri. Po për këtë ata nuk mund fajësohen. Ndaj për këtë arsye, në çdo regjim apo pushtet ata ndëshkohen vazhdimisht. Dikur në turrën e druve, e më vonë si komplotisë. Në botën që na mashtron çdo ditë, është fat të kemi shkrimtarë që e sfidojnë atë. ‘Komploti’ i Ben Blushit është vazhdim i një sage ‘kriminale’ të nisur kohë më parë prej tij.

5.            Shihemi në gusht- Gabriel Garsia Markez

është romani që Garsia e shkroi atë pak vite para se të ikte nga kjo botë. Është një roman kushtuar dashurisë. Ai e shkroi atë mes përpjekjesh për të arrirë përsosmërinë artistike dhe davaritjes së aftësive të tij mendore.

6.            Të mbyturit dhe të shpëtuarit- Primo Levi

Ka ndodhur, ndaj mund të ndodhë sërish... ky është thelbi i gjithë asaj çfarë mund të themi. Primo Levi i kthehet Lagerit nazist për ta analizuar jo si një fakt të kryer tashmë, një ngjarje të paparashikuar apo si një aksident të historisë, por si një ngjarje përmes së cilës mund të kuptojmë deri ku mund të arrijë njeriu në rolin e xhelatit dhe të viktimës.

7.            Orlando – Virginia Woolf

një roman biografik i autores përmes të cilit, personazhi kryesor kapërcen shekuj dhe kontinente si dhe identitetin gjinor ndërsa lexuesi ndjek aventurat e dashurisë. I cilësuar si një roman që kërkon të përmbysë sisteme ai është frymëzuar nga historia e trazuar e së dashurës dhe shoqes së ngushtë së Virginias.

8.            Libraria e Teheranit- Marjan Kamali

Është viti 1953. Në Teheran po ndërron sistemi. Dy të rinj, të dashuruar në një librari për shkak të turbulencave të kohës nuk përfundojnë bashkë. Në roman, eksplorohen çështje politike por edhe të emigracionit, asimilimit kulturor dhe se si të rendësh pas fatit.

9.            Intervistë me Armikun –Virgjil Muçi

 autori tregon se si për të zbuluar vendin e vet, njeriu nuk duhet t’i përmbahet nacionalizmave emocionale. Bota është globalizuar dhe problemi i fqinjit padyshim mbetet dhe problemi jonë. Po si erdhi ky libër tek autori?

10.        Shi me baltë (poezi)- Mero Baze

një libër me poezi, një poemë elegjiake që i këndon humbjes, asaj të përgjithshmes dhe vetjakes, të përbotshmes dhe të përveçmes, si dhe pritjes gjithashtu. Libri mbart poezi që mbështetet mbi gjërat që autori ka përjetuar. Është një vëllim poetik, por edhe një thirrje për të rikthyer vlerat e humbura në një shoqëri që duket se po i largohet gjithnjë e më tepër rrënjëve të saj.