Nga ‘bari’, ‘flirtet’ me qeverinë te fushatat kundër opozitës, pse do mbahet mend Yuri Kim

Pas më shumë se tri vitesh, Yuri Kim mbajti fjalimin e lamtumirës si ambasadore e SHBA në Shqipëri.

Në fjalën që mbajti me median, Kim tha se është mirënjohëse që pati mundësinë të njihej me vendin tonë.

Ajo shtoi se edhe pse është bërë mjaft përparim në shumë fusha, korrupsioni mbetet ende një problem për vendin, ku si shembull përmendi të drejtën e pronës dhe mundësinë për të zhvilluar bizneset e tyre evropianët në Shqipëri.

Deklarata të tilla janë sjellë në vëmendje vazhdimisht prej Kim. Megjithatë, Kim pas largimit, do të mbahet mend gjatë për disa momente që nuk do të lënë shijë jo të mirë për shqiptarët.

Më poshtë rendisim disa prej tyre: 

Ajo do të kujtohet, sa herë të shkruhet për ambasadorët e ShBA në Shqipëri, rolin, ndikimin dhe siluetën në politikën shqiptare, si diplomatja që u armiqësua me opozitën dhe u njësua me qeverinë, në vitet kur kjo e fundit zotëronte thuajse 100 për qind të pushtetit në vend.

Në nëntor të vitit 2021, gruaja që ka hyrë në historinë e këtij vendi si ajo që e kërcënoi gjysmën e elektoratit me ngrënie bari, ndërhyri në mënyrë flagrante në betejën mes dy PD-ve.

Sapo Sali Berisha konfirmoi që është shumicë brenda PD-së duke depozituar 4200 nënshkrime për mbledhjen e Kuvendit Kombëtar të demokratëve, Kim dha një intervistë në Top Channel duke deklaruar: “Ne njohim për kryetar Lulzim Bashën dhe … nuk do kemi marrëdhënie me PD-në nëse fiton Berisha”. Më vonë ajo këmbënguli: “ne nuk i japim dorën Sali Berishës dhe as shkelim në zyrën e tij po u zgjodh në krye të PD-së”.

Sikur kjo të mos mjaftonte, para Kuvendit të 11 dhjetorit ajo pozoi në mediat sociale me një foto plot nëntekst. Ajo u shfaq në llogarinë e saj me romanin e Heminguejit: “Për kë bien kambanat”, të cilën mediat pro Ramës e interpretuan me kuptimin e saj të vërtetë.

Kjo përzierje në punët e një partie u shtri më pas edhe në prag të zgjedhjeve të pjesshme lokale të 6 marsit 2022.

Kim i pyeti publikisht kandidatët e Shtëpisë së Lirisë se si mund të marrin pjesë në një fushatë, kur sponsorizohen nga Berisha, të cilin Shtetet e Bashkuara i kanë ndaluar hyrjen në vendin e tyre, pasi e akuzojnë për korrupsion dhe minim të demokracisë.

Kim-demokratëve: Mos hani bar!

Në verën e 2021-shit, ambasadorja përdori sloganin e famshëm propagandistik të kohës së Komunizmit për të nënkuptuar nevojën e shkëputjes së Partisë Demokratike në opozitë nga interesat e Berishës, shpallur i padëshirueshëm për “korrupsion madhor” nga Departamenti i Shtetit. Berisha e konsideroi fyese dhe albanofobike.

Dekada më parë, regjimi komunist në Shqipëri i mësoi shqiptarëve se ata duhej të ishin gati të hanin edhe thjesht bar me qëllim që Partia e Punës të ruante pushtetin e saj.

Shprehja ishte: “Populli shqiptar han bar dhe dorën nuk ia shtrin armikut”, ndaj një shprehje e tij nuk ka se si të tingëllojë veçse absurde sot: armiku të cilit i referohej diktatori, ishte bota demokratike, para së gjithash, Shtetet e Bashkuara të Amerikës.

Dhe në atë që Yuri Kim e quan ironi historike, ajo sugjeron që Partia Demokratike, forca e parë anti-komuniste në vend, “të mos hajë bar” për interesat e një njeriu të vetëm.

“Do të ishte një ironi historike por edhe një tragjedi për vendin, jo vetëm për partinë, nëse partia do të hante bar për hir të interesave personale të një njeriu,” deklaronte Yuri Kim, një referencë jo shumë e fshehtë për Sali Berishën, të cilit ndjekësit i referohen si “lideri historik”.

Arvizu “godet” Yuri Kim

Ish ambasadori i SHBA-ve në Tiranë, Alexander Arvizu, ka dhënë një intervistë për televizionin Euroneës në Shqipëri kritikoi deklaratat e Kim, e cila ka kërkuar vazhdimisht largimin e Sali Berishës nga politika.

Arvizu nënvizoi disa herë se shqiptarët duhet të trajtohen me respekt dhe se kanë të drejtë të zgjedhin udhëheqësit e tyre.

“Këto lloj vendimesh, se kush është në opozitë dhe kush duhet të jetë në qeveri, i takon shqiptarëve dhe jo Ëashingtonit apo Brukselit”, deklaroi ish ambasadori.

Qëndrimet ndaj Ramës dhe Metës, me dy standarde

Një vit më parë Kim mbrojti ish shefin e SPAK, Arben Krajën ndaj sulmeve që i bëri Ilir Meta, pasi mori vesh se po hetohej nga prokuroria e posaçme.

Si gjithmonë, djalli fshihet në detaje. Nëse shohim si ambasadorja ka reaguar ndaj Ramës dhe mënyrës si i’u kundërvu Metës, ndryshimi është nata me ditën.

Pasi kryeministri udhëzoi SPAK-un, se duhej të hetonte ish presidentin, ambasadorja, ka kërkuar disa herë falje se po tejkalonte gjuhën diplomatike, duke u justifikuar se po fliste troç, tha se modeli i drejtësisë nuk është ai i urdhërimit të prokurorëve nga pushteti politik.  

Por kur Meta u “vetëmbrojt” ndaj një SPAK-u që po zbatonte fiks urdhrat që Rama, fjalori i ambasadores ishte disa fish më i ashpër.

Ajo, pa u justifikuar për tejkalimin e gjuhës diplomatike, nxitoi të thotë se ‘pandëshkueshmëria po merr fund”, se “nuk ka më të paprekshëm”, se “reforma në drejtësi po jep gjithnjë e më shumë rezultate”, duke na dëshmuar një aplikim të standardeve të dyfishta.

Për këtë, analistët e kanë komentuar shpesh Kim si ambasadoren më të anshme në vend që prej periudhës së Rajersonit.   

Cila do të jetë trashëgimia e saj?

Në fakt, shenja e saj është e dikujt që nuk diti ta interpretojë politikën amerikane në vendin më pro-amerikan në botë. Nëse shumë vende të tjera e mbajnë si emblemë nderi ameriko-skepticizmin, në Shqipëri nuk ndodh.