“E di që nuk jam personazh i dashur”, Beqaj kundër gjobitjes masive të kompanive që abuzuan me çmimet e maskave dhe dezinfektantëve gjatë pandemisë 

Ish-ministri i Shëndetësisë, Ilir Beqaj ka dalë kundër gjobitjes masive të tregut farmaceutik me shumicë.

Reagimi Beqajt erdhi pasi Autoriteti i Konkurrencës ka gjobitur 24 subjekte të tregtimit me shumicë dhe pakicë të maskave dhe dezinfektantëve.

Pas hetimeve, në periudhën shkurt-maj, në tregun e shitjes me shumicë të maskave,alkoolit dhe dezinfektantit rezultoi se është abuzuar duke rritur çmimet në mënyrë të pajustifikuar.

Beqaj shkruan se nuk pajtohet me trajtimin dhe goditjen “en bloc” që i bëhet masivisht tregut farmaceutik me shumicë.

Sipas tij, si çdo treg tjetër në Shqipëri, edhe ky treg ka problematikat e veta, "por për çfarë ofroi gjatë pandemisë së pari operatorët meritojnë një mirënjohje të madhe në emër të shoqërisë se ia dolën të garantojnë furnizimin e rregullt të tregut me barna, pajisje mjekësore, produkte kozmetike dhe lëndë biocide edhe në mars dhe prill 2020 kur jeta ekonomike e vendit por edhe e Europës pothuajse u ndal"

Reagimi i plotë:

Jam njohur nëpërmjet medias online me vendimin nr. 717, datë 15 tetor 2020 të Autoritetit të Konkurrencës. U bëra kurioz dhe lexova tekstin e vendimit.

Sipas këtij vendimi, 24 kompani shqiptare që tregtojnë me shumicë barna dhe pajisje mjekësore janë gjobitur sepse nuk kanë zbatuar vendimin e Autoritetit të Konkurrencës nr. 685 datë 18.03.2020.

Autoriteti i Konkurrencës paska hetuar prej 7 muajsh tregtimin e atyre që i ka quajtur “materiale paramjekësore”, më konkretisht (dezinfektant, alkool dhe maska).

U habita me termin “materiale paramjekësore”. Në Shqipëri kemi legjislacion për barnat, për pajisjet mjekësore, për lëndët biocide, për produktet kozmetike, por “materiale paramjekësore” nuk kam parë, dëgjuar apo lexuar ndonjëherë.

Unë e di që nuk jam një personazh i dashur për operatorët e tregut farmaceutik. Nuk mund të përjashtoj që midis 24 kompanive të gjobitura të ketë midis tyre kompani që kanë abuzuar me situatën e krijuar prej sëmundjes Covid 19.

Por nuk pajtohem me trajtimin “en bloc” dhe goditjen “en bloc” që i bëhet masivisht tregut farmaceutik me shumicë. Si çdo treg tjetër në Shqipëri edhe ky treg ka problematikat e veta, por për çfarë ofroi gjatë pandemisë së pari operartorët meritojnë një mirënjohje të madhe në emër të shoqërisë se ia dolën të garantojnë furnizimin e rregullt të tregut me barna, pajisje mjekësore, produkte kozmetike dhe lëndë biocide edhe në mars dhe prill 2020 kur jeta ekonomike e vendit por edhe e Europës pothuajse u ndal.

Sa për hetimin nuk është e vështirë të gjendet informacioni në kohë të shkurtër.

Mjafton të kërkohet informacion në:

Drejtorinë e Përgjithshme të Doganave

Agjencinë Kombëtare të Barnave dhe Pajisjeve Mjekësore

Drejtorinë e Përgjithshme të Tatimeve

Kështu mund të zbulohet se cilat kompani kanë vepruar në kundërshtim me rregullat e tregut të lirë duke cënuar interesat e konsumatorëve.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm