Ironia e ish ministrit socialist: Vetëm Zegjineja ka atribute intelektuale dhe patrotike në PS

Ish-ministri socialist Arben Malaj ka shprehur mbështetje për Petro Koçin dhe ish-kontributorët e Partisë Socialiste, duke akuzuar Edi Ramën se nuk po vlerëson figurat që kanë luajtur rol në themelimin, ringritjen dhe modernizimin e partisë.

Malaj kujton periudhën e përplasjeve politike në vitet e para të pluralizmit, kur Fieri u kthye në një bastion të socialistëve, dhe përmend ngjarje si rrahja e socialistëve në Libofshë dhe arrestimin e Petro Koçit e Lad Shehut, të cilëve policia u kishte qethur kokën në qeli.

Sipas tij, pavarësisht përndjekjeve, Koçi nuk nxiti urrejtje politike pas vitit 1997, duke kontribuar për paqen sociale.

Malaj thekson se historia e PS-së deri në vitin 2005 nuk mund të rishkruhet nga Rama dhe “rilindasit” e tij, ndërsa reagimin e mbyll me një ironi ndaj deputetes socialiste Zegjine Çaushi.

“Plotësisht solidar me Petron dhe këdo tjetër që Rama dhe Rilindasit e tij nuk e respektojnë për kontributet përcaktuese në fazën e themelimit, rringritjes dhe modernizimit të Partisë Socialiste.

Është e vërtetë që Fieri u bë kryeqyteti i socialistëve në periudhën e përplasjeve të ashpra, deri kriminale.

Ngjarjet kriminale të rrahjes së socialistëve në Libofshe u bënë lajm ndërkombëtar dhe filluan të tregonin fytyrën e vërtetë të një regjimi kriminal ndaj opozitës së vendit të tyre.

Momenti më i vështirë për Petron, Lad Shehun, për socialistët e Fierit dhe për ne, ishte kur policia e Fierit i arrestoi të dy dhe u qethi kokën në birucë.

Pas vitit 1997, shefi i policisë i PD-së që u qethi kokën u bë deputet i PD-së në parlament, dhe Petro kurrë nuk nxiti urrejtje partiake sepse vendi kishte nevojë për paqe sociale”, shkruan Malaj.

Sipas ish ministrit të Financave, “Rama dhe manikinet e tij nuk mund ta ndryshojnë historinë e themelimit dhe modernizimit te PS-se , deri ne vitin 2005”.

Në fund të reagimit të tij, Malaj shkruan me ironi se “vetëm Zeqineja ka atribute intelektuale dhe patrotike te bej ndonjë retushim te fotografive, përfshi edhe këtë”, duke iu referua deputetes së re të PS për qarkun e Fierit, Zegjine Çaushi.