Nga Lira Antike te Lahuta Shqiptare: 'Takimet Muzikore të Dy Botëve' nisin nga Himara për të përfunduar në Paris

Projekti “Tingulli i Lirës Antike” nisi me sukses udhëtimin e tij në kuadër të edicionit XVI të “Takimeve Muzikore të Dy Boteve”. Ngjarja e parë u zhvillua në Himarë, duke sjellë në skenë një nga instrumentet më emblematike të antikitetit grek – lirën antike.

Të shtunën më 6 qershor 2026, në Sallën kulturore  “Neço Muko”, u realizua sesioni trajnimi “Një Portë drejt Artit të Lashtë të Lirës”. Nën udhëheqjen e Dr. Nikolaos Xanthoulis dhe ekipit të tij, nxënësit e shkollave të Himarës u njohën me artin e interpretimit të lirës antike greke. Programi kulmoi me një performancë bashkëpunuese midis fëmijëve të Himarës dhe artistëve grekë.

Mbrëmjen e së dielës, më 7 qershor 2026, ora 20:00, Shetitorja e Himarës u mbush me publik për koncertin “Tingulli i Lirës Antike”. Artistët kryesorë të mbrëmjes ishin:

Dr. Nikos Xanthoulis, kompozitor, virtuoz i lirës antike greke me shtatë tela, studiues dhe konsulent artistik pranë Operës Kombëtare Greke. Ai konsiderohet si muzikanti që ringjalli lirën antike pas 1600 vjetësh heshtjeje.

Evangelia Kopsalidou, muzikologe me doktoraturë nga Sorbona, profesore dhe liriste e shquar.

Sophia Karakouta, mezzo-soprano e njohur, e specializuar në repertorin antik grek.

Tingujt e lirës së lashtë e transportuan publikun në kohët e mitologjisë greke, ku muzika dhe poezia ishin të pandara. Banorët e Himarës, vizitorët vendas e të huaj ndoqën me entuziazëm të madh këtë udhëtim magjik nëpër shekuj.

Në fjalën e hapjes, Nënkryetarja e Bashkisë Himarë, znj. Erifili Berberi dhe drejtuesja e Shoqatës Argjiro, Argjiro Ilda Mara, theksuan rëndësinë e dialogut kulturor dhe ruajtjes së trashëgimisë.

Ky edicion i XVI i festivalit Takimet Muzikore te Dy Boteve organizuar nga Shoqata Argjiro në bashkëpunim me Akademinë Ndërkombëtare të Lirës (ILS Academy) dhe Akademinë e Shkencave të Shqipërisë, me mbështetjen e Bashkisë Himarë. Publiku himariot e cilësoi këtë si një nga ngjarjet më cilësore kulturore të këtij fillim-verë në Rivierën Shqiptare.

Sipas Marës, edicioni i këtij viti i “Takimeve Muzikore të Dy Boteve” i kushtohet ruajtjes, promovimit dhe transmetimit të lirës antike greke dhe të lahutës shqiptare. Pas Himarës dhe Tiranës, takimet do të vazhdojnë në Paris në vjeshtë, ku do të organizohet një seri aktivitetesh rreth lahutës shqiptare me rapsoden e njohur Lumturije Nonaj.

Ky projekt synon të evidentojë vlerat e trashëgimisë kulturore, duke nxitur ruajtjen, studimin dhe transmetimin e saj tek brezat e rinj, si dhe krijimin e urave kulturore midis popujve.

Udhëtimi i projektit vazhdon në Tiranë, ku të martën më 9 qershor 2026, ora 18:00, në Muzeun Arkeologjik (Sheshi Nënë Tereza) do të zhvillohet Koncerti-Konferencë me titull “Nga Lira e Lashtësisë drejt Teatrit Lirik” me Dr. Nikolaos Xanthoulis.